ހުރްމުޒް ކަަނޑުއޮޅީގެ މަޝްވަރާތަކަށް އޮމާންގެ ފޮރިން މިނިސްޓަރު އީރާން އަށް ވަޑައިގަންނަވަނީ

އޮމާންގެ ފޮރިން މިނިސްޓަރު ބަދުރު އަލްބުސައިދީ އީރާން އަށް ވަޑައިގެން، އެ ޤައުމުގެ އިސް އޮފިޝަލުންނާ ބައްދަލުކުރެއްވުމަށް ހަމަޖެހިފައިވާ ކަމަށް ހާމަކޮށްފި އެވެ.

މިކަން ހާމަކޮށްފައި ވަނީ އީރާންގެ ފޮރިން މިނިސްޓްރީ އިންނެވެ. އެ މިނިސްޓްރީ އިން ބުނެފައި ވަނީ، އޮމާންގެ ފޮރިން މިނިސްޓަރު އަންގާރަ ދުވަހު އެ ޤައުމަށް ވަޑައިގަންނަވާނެ ކަމަށެވެ. 

މި ދަތުރުފުޅާ ގުޅޭ ގޮތުން އީރާންގެ ރަސްމީ ނިއުސް އެޖެންސީ "އިރްނާ" އިން ނެރުނު ބަޔާނެއްގައި ބުނެފައިވަނީ، އޮމާންގެ ފޮރިން މިނިސްޓަރުގެ މި ދަތުރުފުޅުގައި އީރާންގެ ފޮރިން މިނިސްޓަރު އައްބާސް އަރާގްޗީއާ ބައްދަލު ކުރައްވައި، ދެ ޤައުމުގެ ގުޅުމާއި ސަރަހައްދީ މުހިންމު ކަންކަމާ ގުޅޭ ގޮތުން މަޝްވަރާ ކުރައްވާނެ ކަމަށެވެ.

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، މި ދަތުރުފުޅަކީ ދެ ޤައުމުގެ ދެމެދުގައި އޮންނަ ސިޔާސީ މަޝްވަރާތަކުގެ ތެރެއިން ކުރިއަށްދާ ދަތުރުފުޅެއް ކަމަށެވެ. އަދި ހުރްމުޒް ކަނޑުއޮޅީގެ ސަލާމަތާއި ރައްކާތެރިކަން ބެލެހެއްޓުމުގައި އީރާން އާއި އޮމާން އަކީ ބޮޑު މަސްއޫލިއްޔަތެއް އުފުލާ ދެ ޤައުމުކަން އޭނާ ފާހަގަ ކުރެއްވި އެވެ.

ބަޣާއީ އިތުރަށް ވިދާޅުވި ގޮތުގައި، މި ދަތުރުފުޅުގެ މައިގަނޑު މަޤުސަދަކީ އީރާން އާއި އޮމާންއާ ދެމެދު އޮތް ދޭދޭ ގުޅުންތައް އިތުރަށް ވަރުގަދަ ކުރުމެވެ. މީގެ އިތުރުން ހުރްމުޒް ކަނޑުއޮޅީގެ އައްސޭރި ފަށުގެ ޤައުމުތަކުގެ ހައިސިއްޔަތުން، ސަރަހައްދީ ސުލްހަ އާއި ހަމަޖެހުން ޤާއިމުކުރުމަށްޓަކައި ދެ ޤައުމުގެ ދެމެދުގައި މެދުކެނޑުމެއް ނެތި ކުރިއަށްދާ ސިޔާސީ މަޝްވަރާތައް މި ދަތުރުފުޅުގެ ސަބަބުން އިތުރަށް ހަރުދަނާ ވެގެންދާނެ ކަމަށް ވެސް ބަޣާއީ ވިދާޅުވި އެވެ.

އޮމާންގެ ފޮރިން މިނިސްޓަރު އީރާން އަށް މި ވަޑައިގަންނަވަނީ މެދުއިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި އެވެ. ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑުއޮޅީގެ ސަލާމަތީ ކަންކަމާ ގުޅޭ ގޮތުން މި ދަތުރުފުޅުގައި ފުޅާ ދާއިރާއެއްގައި މަޝްވަރާ ކުރެވޭނެ ކަމަށް ބެލެވެ އެވެ.

އޮމާން އަކީ އާންމު ގޮތެއްގައި އީރާން އާއި ހުޅަނގުގެ ޤައުމުތަކާ ދެމެދު އުފެދޭ މައްސަލަތައް ހައްލު ކުރުމުގައި މެދުވެރިއެއްގެ ދައުރު އަދާކުރާ ޤައުމެކެވެ.