އެމެރިކާ އާއެކު އޮތް އެއްބަސްވުން އަލުން އިއާދަކުރުމަށް ޕާކިސްތާން އާއި އީރާން އިން މަޝްވަރާކޮށްފި

މެދުއިރުމަތީގައި އުފެދިފައިވާ ހަމަނުޖެހުންތަކަށް ހައްލެއް ހޯދުމަށްޓަކައި، މީގެ ކުރިން އީރާން އާއި އެމެރިކާއާ ދެމެދު ސޮއިކޮށްފައިވާ ފަހުމުނާމާ އަލުން އިއާދަ ކުރުމާ ގުޅޭ ގޮތުން ޕާކިސްތާން އާއި އީރާން އިން މަޝްވަރާކޮށްފި އެވެ.

މިކަން ހާމަކުރެއްވީ ޕާކިސްތާންގެ އިންޓީރިއާ މިނިސްޓަރު މުހުސިން ނަގްވީ އެވެ.

މިނިސްޓަރު ނަގްވީ އެކްސްގައި ކުރެއްވި ޕޯސްޓެއްގައި ވިދާޅުވީ، އޭނާ އާއި ޕާކިސްތާންގެ އާމީ ޗީފް ފީލްޑް މާޝަލް އާސިމް މުނީރު، އީރާންގެ ރައީސް މަސްއޫދު ޕެޒެޝްކިއާން އާއެކު ވަރަށް ކާމިޔާބު އަދި އުންމީދީ ބައްދަލުވުމެއް ބާއްވާފައިވާ ކަމަށެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ، އީރާން އާއި އެމެރިކާއާ ދެމެދު އޮތް މައްސަލަތަކާއި މެދުއިރުމަތީގެ މަސްރަހު ހޫނުވަމުންދާ ދިއުމާ ގުޅޭ ގޮތުންނެވެ.

މީގެ އިތުރުން، އިސްލާމްއާބާދު ފަހުމުނާމާ އަލުން އިއާދަ ކުރުމަށްޓަކައި ދެ ފަރާތުން އަޅަންޖެހޭ ފިޔަވަޅުތަކާ ބެހޭ ގޮތުން ވެސް މި ބައްދަލުވުމުގައި ފުޅާ ދާއިރާއެއްގައި މަޝްވަރާކުރެއްވި ކަމަށް ނަގްވީ ވިދާޅުވި އެވެ. އޭނާ ފާހަގަ ކުރެއްވި ގޮތުގައި މި ފަހުމުނާމާ އިއާދަ ކުރުމަކީ މިހާރު ހިނގަމުންދާ ހަމަނުޖެހުންތަކަށް ފުރިހަމަ ހައްލެއް ހޯދުމަށް އެޅޭނެ މުހިންމު ފިޔަވަޅެކެވެ.

މި ބައްދަލުވުމުގައި އީރާންގެ ރައީސް ޕެޒެޝްކިއާން ވަނީ އެ ޤައުމުގެ ސަރުކާރުން މި މައްސަލައިގައި ދެކޭ ގޮތާއި، ހުރި ކަންބޮޑުވުންތައް ވަރަށް ސަރީހަކޮށް ހިއްސާ ކުރައްވާފައި އެވެ. ނަގްވީ ވިދާޅުވީ ދެ ޤައުމުގެ ދެމެދުގައި ބަދަލު ކުރެވުނު ޚިޔާލުތަކަކީ މައްސަލަ ހައްލު ކުރުމަށް ލިބުނު ބޮޑު ކުރިއެރުމެއް ކަމަށާއި ބައްދަލުވުން ނިންމާލީ ވަރަށް ޕޮޒިޓިވް ނަތީޖާތަކަކާ އެކު ކަމަށެވެ.

ޕާކިސްތާންގެ އިންޓީރިއާ މިނިސްޓަރު އިތުރަށް ވިދާޅުވީ، މި ބައްދަލުވުމުން ލިބުނު ކުރިއެރުމުގެ ސަބަބުން ސަރަހައްދީ ހަމަޖެހުމާއި ދާއިމީ ސުލްހަ ޤާއިމު ކުރުމަށް އިތުރު މަގުތަކެއް ފަހިވެގެންދާނެ ކަމަށް އުންމީދު ކުރައްވާ ކަމަށެވެ. މި މަޝްވަރާތަކަކީ މެދުއިރުމަތީގެ ނުތަނަވަސްކަން ކުޑަ ކުރުމަށް ބައިނަލްއަޤުވާމީ ފެންވަރުގައި ކުރެވެމުންދާ މަސައްކަތްތަކުގެ ތެރެއިން ކުރެވުނު މުހިންމު މަސައްކަތެކެވެ.