ދުނިޔޭގެ ތާރީޚު ނުދެކޭފަދަ ދަތިކުރުމުގެ ފިޔަވަޅު އީރާނާ ދެކޮޅަށް އަޅާނަން: އެމެރިކާގެ މާލީ ވަޒީރު

އެމެރިކާއިން އީރާނާ ދެކޮޅަށް "ތާރީޚުގައި ވެސް ނުދެކޭ ފަދަ ހަރުކަށި ދަތިކުރުމުގެ ފިޔަވަޅުތަކެއް" އަޅާނެ ކަމަށް އެ ގައުމުގެ ޓްރެޜަރީ ސެކްރެޓަރީ ސްކޮޓް ބެސެންޓް ބުރާސްފަތި ދުވަހު ވިދާޅުވެއްޖެ އެވެ. މީގެ އިތުރުން ބެސެންޓް ވަނީ ވޮޝިންޓަނާއެކު އެއްބާރުލުން ދިނުމަށް ޗައިނާގެ ސަރުކާރަށް ގޮވާލައްވާފަ އެވެ.

މި ފިޔަވަޅުތަކާ ގުޅޭ އިތުރު ތަފްސީލުތައް ހާމަކުރުމަށް އަންނަ ހޯމަ ދުވަހު ނޫސްވެރިންގެ ބައްދަލުވުމެއް ބާއްވާނެ ކަމަށް ބެސެންޓް ވިދާޅުވި އެވެ.

ސީއެންބީސީއަށް ދެއްވި ބަސްދީގަތުމެއްގައި ބެސެންޓް ވިދާޅުވީ، އީރާނާ ދެކޮޅަށް އެމެރިކާއިން މައިގަނޑު ދެ ފިޔަވަޅެއް އެއްފަހަރާ އަޅާނެ ކަމަށެވެ. އެއީ އީރާނު ބަންދުކޮށްލުމުގެ (ބްލޮކޭޑް) އިތުރުން، ތާރީޚުގައި ވެސް އަޅާ އެންމެ ވަރުގަދަ ދަތިކުރުމުގެ ފިޔަވަޅުތައް އެ ގައުމާ ދެކޮޅަށް އެޅުން ކަމަށް އޭނާ ވިދާޅުވި އެވެ. އަދި މި ފިޔަވަޅުތަކުގެ ނަތީޖާ ފެންނާނެ ކަމަށާއި، އީރާނުގެ މިހާރުގެ ސަރުކާރު އިނދަޖައްސާލާނެ ކަމަށް ވެސް ބެސެންޓް ވިދާޅުވި އެވެ.

ބެސެންޓް އިތުރަށް ވިދާޅުވީ، މިއީ އެމެރިކާގެ ބައިވެރިންނާއި ދުނިޔޭގެ އެހެން ގައުމުތަކުން ވެސް ވަކި ގޮތެއް ނިންމަންޖެހޭ ވަގުތު ކަމަށެވެ.

އިސްރާއީލާ ގުޅިގެން އެމެރިކާއިން ފެށި ހަނގުރާމައަށް ހަ މަސް ދުވަސް ވެފައިވާއިރު، އެ ހަނގުރާމަ ނިމުމަކަށް ގެނައުމަށް އެމެރިކާއިން ކުރާ މަސައްކަތުގެ ތެރެއިން، އީރާނަށް އެއްވެސް ބާވަތެއްގެ އެހީތެރިކަމެއް ފޯރުކޮށްދޭ ކޮންމެ ގައުމަކާ ދެކޮޅަށް އިގްތިސާދީ ގޮތުން ފިޔަވަޅު އަޅާނެ ކަމުގެ އިންޒާރު ރައީސް ޑޮނަލްޑް ޓްރަމްޕް ވަނީ ބުދަ ދުވަހު ދެއްވާފަ އެވެ.

ބެސެންޓް ވިދާޅުވީ، މި އިގްތިސާދީ ފިއްތުންތަކުގެ މާނަ ތެލުގެ ބާޒާރުން ދެނެގަންނަނީ ނުބައިކޮށް ކަމަށް ގަބޫލުކުރައްވާ ކަމަށެވެ. ބުރާސްފަތި ދުވަހު ތެލުގެ އަގު ވަނީ ފާއިތުވި ތިން ހަފުތާގެ ތެރޭގައި އުފުލިފައި ނުވާ މިންވަރަށް މައްޗަށް ގޮސްފަ އެވެ.

އެމެރިކާގެ އަތުގައި ހުރި މައުލޫމާތުތަކަށް ބަލާއިރު، ތެލުގެ އަގު މިހާ ބޮޑަށް އުފުލެންޖެހޭ ސަބަބެއް ނެތް ކަމަށް ބެސެންޓް ވިދާޅުވި އެވެ. އޭނާ ވިދާޅުވީ، އެމެރިކާއިން އީރާނަށް އެންމެ މަތީ ދަރަޖައިގެ އިގްތިސާދީ ފިއްތުންތައް ކުރިމަތިކުރުވާ ނަމަ، އޭގެ މާނައަކީ ބޮޑު ހަނގުރާމައެއް އަލުން ފެށުމުގެ ފުރުސަތު ކުޑަވުން ކަމަށެވެ.

އީރާނާއެކު ވިޔަފާރީގެ މުއާމަލާތްތައް ކުރާތީ ޗައިނާއަށް އެމެރިކާއިން އަމާޒުކޮށްފާނެތޯ ސުވާލުކުރުމުން ބެސެންޓް ވިދާޅުވީ، ބައެއް ވާހަކަތަކަކީ ސިއްރުން ދެއްކުން ރަނގަޅު ވާހަކަތައް ކަމަށެވެ.

ހުރްމުޒް ކަނޑުއޮޅި އަލުން ހުޅުވުމަށާއި ހަކަތައިގެ އަގުތައް ދަށްވުމަށް ހުރިހާ ގައުމަކުން ވެސް ބޭނުންވާނެ ކަމުގެ ޔަގީންކަން އެބައޮތް ކަމަށް ބެސެންޓް ވިދާޅުވި އެވެ. އަދި ޗައިނާއަށް ބޭނުންވާ ހަކަތައިގެ 50 އިންސައްތަ ހޯދަނީ ގަލްފް ސަރަހައްދުން ކަމަށްވާތީ، އެމެރިކާގެ މި ސިޔާސަތާ އެއްގޮތަށް އަމަލުކުރުމަކީ ޗައިނާއަށް ލިބޭނެ ވަރަށް ބޮޑު ފަސޭހައެއް ކަމަށް ވެސް އޭނާ ފާހަގަކުރެއްވި އެވެ.

ކޭޕްލާ އެނަލިޓިކްސް ފާމްގެ 2025 ވަނަ އަހަރުގެ ތަފާސްހިސާބުތަކުން ދައްކާގޮތުގައި، އީރާނުން ބޭރުކުރާ ތެލުގެ 80 އިންސައްތައަށްވުރެ ގިނައިން ގަންނަނީ ޗައިނާއިންނެވެ. އެމެރިކާއަށް ބޭނުންވާ މުހިންމު މަޢުދަންތައް ހިމެނޭހެން ގިނަ ބާވަތްތަކެއް އެކްސްޕޯޓްކުރާ ޗައިނާއާއެކު އެމެރިކާއިން އިގްތިސާދީ ހަނގުރާމައެއް އިތުރަށް ވަރުގަދަކޮށްފި ނަމަ، ޗައިނާއިން ވެސް ރައްދުގައި ފިޔަވަޅު އެޅުމުގެ ނުރައްކާ އެބައޮތެވެ.

އީރާނުން ދަނީ 1979 ވަނަ އަހަރުގެ އިސްލާމީ އިންގިލާބަށްފަހު، ފާއިތުވި 50 އެއްހާ އަހަރު ދުނިޔޭގެ ގައުމުތަކުން ކުރިމަތިކުރި ހަރުކަށި އިގްތިސާދީ ދަތިކުރުމުގެ ފިޔަވަޅުތަކާއެކު ވެސް ކެތްތެރިކަމާއެކު ކުރިމަތިލަމުންނެވެ.

އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، ޓްރަމްޕްގެ މި ވާހަކަތަކަކީ އެމެރިކާގެ ދަރަނި ރެކޯޑް މިންވަރަކަށް އިތުރުވުމާއި އިންޓްރެސްޓް ރޭޓް މަތިވުން ފަދަ އެ ގައުމުގެ އެތެރޭގެ މާލީ މައްސަލަތަކުން އާންމު ރައްޔިތުންގެ ސަމާލުކަން އަނބުރާލުމަށް ދައްކާ ވާހަކަތަކެއް ކަމަށެވެ.