ހުރްމުޒް ކަނޑުއޮޅިން ދުވާލަކު 8 މިލިއަން ތެޔޮ ފީފާ ބޭރުކުރޭ

ހުރްމުޒް ކަނޑުއޮޅިން ތެޔޮ ބޭރު ކުރުމަށް އެމެރިކާގެ އަސްކަރިއްޔާ އިން އެހީތެރިކަން ފޯރުކޮށްދެމުންދާ ކަމަށާއި، މިދިޔަ އަންގާރަ ދުވަހު އެކަނި ވެސް 15 މިލިއަނަށް ވުރެ ގިނަ ތެޔޮ ފީފާ އެ ސަރަހައްދުން ބޭރުކޮށްފައިވާ ކަމަށް އެމެރިކާގެ އެނާޖީ ސެކްރެޓަރީ ކްރިސް ރައިޓް ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ކްރިސް ރައިޓް ވިދާޅުވީ، ކަނޑުއޮޅިން ބޭރުކުރި ތެލާއި ހޮޅިތައް މެދުވެރިކޮށް ބޭރުކުރި ތެޔޮ އެއްކޮށްލުމުން، އެ ސަރަހައްދުން ބޭރުކުރި ތެލުގެ ޖުމްލަ އަދަދު 20 މިލިއަން ފީފާއާ ގާތްކުރާ ކަމަށެވެ. މީގެ އިތުރުން، ފާއިތުވި ހަތް ދުވަހުގެ ތަފާސްހިސާބުތަކަށް ބަލާއިރު، އެ ކަނޑުއޮޅިން ދުވާލަކު އެވްރެޖުކޮށް އަށް މިލިއަނަށް ވުރެ ގިނަ ފީފާ ތެޔޮ ބޭރު ކުރަމުންދާ ކަމަށް ވެސް އޭނާ ފާހަގަ ކުރެއްވި އެވެ.

އެމެރިކާގެ އެނާޖީ ސެކްރެޓަރީ ވިދާޅުވީ، ހުރްމުޒް ކަނޑުއޮޅިން ތެޔޮ އުފުލުމުގެ މަސައްކަތް މެދުކެނޑުމެއް ނެތި ކުރިއަށް ދަނީ އެމެރިކާގެ ނޭވީގެ އެހީތެރިކަމާ އެކުގައި ކަމަށެވެ. އަދި މިކަމުގައި އެއްވެސް އޮޅުމެއް ނެތް ކަމަށް ވެސް އޭނާ ވިދާޅުވި އެވެ.

ކްރިސް ރައިޓް މިހެން ވިދާޅުވެފައި މިވަނީ، ދުނިޔޭގެ އިޤްތިސާދަށް މުހިންމު މި ކަނޑުއޮޅިން މުދާ އުފުލުމަށް އީރާން އިން ހުރަަސް އަޅަމުން އަންނަ ވަގުތެއްގައި އެވެ. މިއަހަރުގެ ފެބްރުވަރީ މަހު އެމެރިކާ އާއި އިސްރާއީލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން، އީރާން އިން ވަނީ ހުރްމުޒް ކަނޑުއޮޅިން ދަތުރު ކުރުމަށް ހުރަސް އަޅައިފަ އެވެ. 

އެހެން ނަމަވެސް، ރައިޓް ފާހަގަކުރެއްވި ގޮތުގައި ދުވާލަކު 8 މިލިއަން ފީފާގެ އެވްރެޖު އަދަދަކީ، މިހާރު ހިނގަމުންދާ ހަނގުރާމަ ފެށުމުގެ ކުރިން އެ ސަރަހައްދުން ދުވާލަކު ބޭރު ކުރަމުންދިޔަ ތެލުގެ އެވްރެޖު އަދަދުގެ ދެބައިކުޅަ އެއްބަޔަށް ވުރެ ވެސް މަދު އަދަދެކެވެ. އެމެރިކާ އިން އަންނަނީ ހުރްމުޒް ކަނޑުއޮޅީގެ ފުރިހަމަ ކޮންޓްރޯލް އޮތީ އެ ޤައުމުގެ އަތުގައި ކަމަށް ބުނަމުންނެވެ. ނަމަވެސް، އީރާން އިން އަންނަނީ އެކަން ދޮގު ކުރުމާާ އެކު، އެ ޤައުމުގެ ހުއްދަ ނެތި ހުރްމުޒް ކަނޑުއޮޅިން ދަތުރު ކުރާ އުޅަނދުތަކަށް ހުރަސް އަޅަމުންނެވެ.