ސަވާހިލި އައްޑޫ އިން ވަކިކޮށް، އެ ސިޓީގެ ރައްޔިތުން ޓޫރިޒަމަށް އަލިކުރި އުއްމީދުގެ ހުޅުކޮޅު މި ސަރުކާރުން ނިއްވާލައިފި: މެންބަރު ދީދީ
23 އޯގަސްޓު 2026 | އާދީއްތަ 08:01އައްޑޫ ސިޓީ ކައުންސިލުން ބީލަމަށް ހުޅުވާލާފައިވަނިކޮށް، "ސަވާހިލި" ރަށް އެ ސިޓީގެ އިހުތިސާސުން ވަކިކުރުމުން އައްޑޫގެ ފަތުރުވެރިކަމުގެ އުއްމީދުތަކަށް ހުރަސްއެޅިފައިވާ ކަމަށް މަރަދޫ ދާއިރާގެ މެންބަރު އަހްމަދު ދީދީ ވިދާޅުވެއްޖެ. ސަރުކާރުގެ މި ނިންމުމާ ގުޅިގެން ކައުންސިލާއި ރައްޔިތުންގެ ކަންބޮޑުވުން އޮތްއިރު، މިއީ ލާމަރުކަޒީ ނިޒާމުގެ ތެރެއިން ރައްޔިތުންނަށް ލިބެންޖެހޭ ބާރުވެރިކަން ނިގުޅައިގަތުން ކަމަށް އޭނާ ފާހަގަކުރެއްވި
ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހްމަދު ދީދީ | ރައްޔިތުންގެ މަޖިލިސް
އައްޑޫ ސިޓީ ކައުންސިލުން ތަރައްގީކުރުމަށް އިއުލާނުކޮށްފައިވާ "ސަވާހިލި" ރަށް، ރައީސް މުއިއްޒު ނެރުއްވި ކުއްލި ގަރާރަކާއެކު އެ ސިޓީގެ އިހުތިސާސުން ވަކިކޮށް، މި ސަރުކާރުން އައްޑޫ ސިޓީގެ ރައްޔިތުން ޓޫރިޒަމާމެދު ކުރަމުން އައި އުއްމީދުގެ ހުޅުކޮޅު ނިއްވާލާފައިވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހްމަދު ދީދީ ވިދާޅުވެއްޖެ އެވެ.
އާދިއްތަ ދުވަހުގެ ރައްޔިތުންގެ މަޖިލީހުގެ ޖަލްސާގައި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހުށަހަޅާފައިވާ އިސްލާހު އަނބުރާ ގެންދިއުމަށް ގޮވާލާ، ހުށަހަޅާފައިވާ ޕެޓިޝަނަށް ބަހުސް ކުރައްވަމުން މެންބަރު ދީދީ ވިދާޅުވީ މި ސަރުކާރުން ދަނީ، ސަރުކާރުގެ އެކިއެކި ބާރުތައް ބޭނުންކޮށްގެން ރައްޔިތުންގެ އަތުން ބިންތައް އަތުލަމުން ކަމަށެވެ.
އެގޮތުން ބޭނުން ވަގުތަކު ބޭނުން ބަޔަކަށް ނެގޭ ގޮތަށް ކައުންސިލްތަކުގެ ނުވަތަ ސިޓީތަކުގެ އިހުތިސާސްގެ ތެރޭގައިވާ ބިންތައް ސަރުކާރަށް ނަގައި ރައްޔިތުންނަށް ލިބެންޖެހޭ މަންފާއާ ބާރުވެރިކަން އެއްކޮށް ނައްތާލަމުން ދާ ކަމަށް ދީދީ ވިދާޅުވި އެވެ.
މިސާލެއްގެ ގޮތުގައި ސަވާހިލި ނަންގަވާ މެންބަރު ވަނީ އެކަމުގައި ހުރި ގިނަ ކަންބޮޑުވުންތައް ހިއްސާ ކުރައްވާފަ އެވެ. އަދި އެކަމުގެ ސަބަބުން އައްޑޫގެ ރައްޔިތުންގެ އުއްމީދުތައް ފުނޑުފުނޑުވެފައިވާ ކަމަށް ވެސް ވިދާޅުވި އެވެ.
އައްޑޫގައި ތަރައްގީ ކުރަމުންދާ ޒޯންގައި އައްޑޫގެ އިހުތިސާސްގައި އޮތް ސަވާހިލި، އައްޑޫ ރައްޔިތުންގެ އަތުން ވަކި ކޮށްލި. ވަކި ކޮށްލީމަ، އައްޑޫ ސިޓީ ރައްޔިތުން ދެކެމުން އައި ހުވަފެން، ޓޫރިޒަމް ބިނާ ކުރުމަށް އެ ދެކެމުން ދިޔަ ހުވަފެން، އުއްމީދުގެ ހުޅުކޮޅު، ނިއްވާލުމުގެ މަސައްކަތް ސަރުކާރުން އެ ކުރީ. އެ ޒޯނުގައި ތިބި ޓޫރިސްޓު ހޮޓަލްތަކަށް އިމާރާތް ކުރެވެމުން ދިޔަ ގާތްގަނޑަކަށް 350 ރޫމުގެ ސަރަހައްދެއް ތަރައްގީ ކުރެވެމުން ދިޔައީ. ސަވާހިލި ކުއްޔަށް ދޭން އިއުލާނު ކުރުމާއެކު، ސަރުކާރުން ވަގުތުން އެ ބިން ނެގީ. ނަގާފަ މިހާރު އައްޑޫ ރައްޔިތުންނަށް ކިހިނެއް ކަމެއް ވާނީ، އޭގެ ސަބަބުން އައްޑޫ ރައްޔިތުންނަށް ކޮން ކަމެއްތޯ ވާނީ، އައްޑޫ ސިޓީގެ ރައްޔިތުން ދެކެމުން އައި ހުވަފެނަަށް މި ދިޔައީ ހުރަސް އެޅިގެންއަހްމަދު ދީދީ
އައްޑޫ ސިޓީ ކައުންސިލުން ތަރައްގީކުރުމަށް އިއުލާނުކޮށްފައިވާ ސަވާހިލި ރަށް، ރައީސް މުއިއްޒު ނެރުއްވި ކުއްލި ގަރާރަކާއެކު އެ ސިޓީގެ އިހުތިސާސުން ވަކިކޮށް ސަރުކާރަށް ނަގާފައިވަނީ އެ ރަށް ތަރައްގީކުރަން ކައުންސިލުން ބީލަމަށް ވެސް ހުޅުވާލާފައި ވަނިކޮށެވެ. އެގޮތުން ސަވާހިލި އެންޓަޓެއިންމަންޓް އެންޑް ރެކްރިއޭޝަން ފެސިލިޓީއެއްގެ ގޮތުގައި ތަރައްގީކުރާނެ ބަޔަކު ހޯދުމަށް އައްޑޫ ސިޓީ ކައުންސިލުން އިއުލާނުކޮށް، އެ މަސައްކަތަށް ބީލަމަށް ހުޅުވާލާފައިވެ އެވެ.
ރައީސްގެ ގަރާރުގައިވާ ގޮތުން އެ ރަށް އައްޑޫ ސިޓީގެ އިހުތިސާސުން ވަކިކުރަން ނިންމެވީ ފަތުރުވެރިކަމުގެ ބޭނުމަށް އެ ރަށް ބޭނުން ކުރުމަށެވެ. ނަމަވެސް އެކަމާ ގުޅޭ އިތުރު އެއްވެސް ތަފްސީލެއް އެ ގަރާރުގައި ހިމަނުއްވާފައެއް ނުވެ އެވެ.
މި މައްސަލައާ ގުޅިގެން އައްޑޫ ސިޓީގެ ރައްޔިތުން ދަނީ ނުރުހުން ފާޅުކުރަމުންނެވެ. އަދި މިއީ މި ސަރުކާރުން އައްޑޫ ސިޓީގެ ތަރައްގީއަށް ހުރަސްއެޅުން ކަމުގައި އެ ސިޓީގެ ކައުންސިލުން ވެސް ވަނީ ބުނެފަ އެވެ.
