ޓްރަމްޕްގެ 400 މިލިއަން ޑޮލަރުގެ ބޯލް ރޫމްގެ މަސައްކަތް ހުއްޓާލުމަށް ދަށު ކޯޓުން ހުކުމްކޮށްފައި ވަނިކޮށް، އެކަން ކުރިއަށް ގެންދިޔުމުގެ ހުއްދަ ސުޕްރީމް ކޯޓުން ދީފި
23 އޯގަސްޓު 2026 | އާދީއްތަ 05:35އެމެރިކާގެ އުއްތަމަ ފަނޑިޔާރު ޖޯން ރޮބަޓްސް ހުކުރު ދުވަހު ސޮއި ކުރެއްވި ވަގުތީ އަމުރުގައިވާ ގޮތުން، ޓްރަމްޕްގެ ސަރުކާރުން ހުށަހަޅާފައިވާ ކުއްލި އިސްތިއުނާފު މައްސަލަ ކޯޓުން ބަލައި ނިމެންދެން މަޝްރޫއުގެ މަސައްކަތްތައް ކުރިއަށް ގެންދެވޭނެ. އެމެރިކާާގެ ވެރި ރަށް ވޮޝިންޓަން ޑީސީ ސަރަހައްދުގެ އިސްތިއުނާފީ މައްސަލަތައް ބެއްލެވުމުގެ ޒިންމާ އުއްތަމަ ފަނޑިޔާރު ރޮބަޓްސް އަށް އޮންނާތީ، މި އަމުރު ނެރުއްވީ ސީދާ އެމަނިކުފާނު
އެމެރިކާާގެ ރައީސް ޑޮނަލްޑް ޓްރަމްޕް އާއި އެ ޤައުމުގެ އުއްތަމަ ފަނޑިޔާރު ޖޯން ރޮބަޓްސް | ގެޓީ އިމޭޖަސް
އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ކުރިއަށް ގެންދަވާ 400 މިލިއަން ޑޮލަރުގެ ބޯލް ރޫމް މަޝްރޫއު، ވަގުތީ ގޮތުން ކުރިއަށް ގެންދިޔުމުގެ ހުއްދަ އެ ޤައުމުގެ ސުޕްރީމް ކޯޓުން ދީފި އެވެ.
އެމެރިކާގެ ސުޕްރީމް ކޯޓުން މި ހުއްދަ ދީފައިވަނީ އެ މަޝްރޫއު ހުއްޓާލުމަށް ދަށު ކޯޓަކުން ނެރުނު އަމުރު ތަންފީޒު ކުރުން ފަސްކުރުމަށްފަހު އެވެ.
ޓްރަމްޕް ބޭނުންފުޅު ވެގެން ވައިޓް ހައުސްގައި ތަރައްޤީ ކުރަން ފެށި 400 މިލިއަން ޑޮލަރަށް ވުރެ އަގުބޮޑު ބޯލްރޫމްގެ މަސައްކަތް ހުއްޓާލަން ކޯޓުން އަމުރުކޮށްފި
އެމެރިކާގެ އުއްތަމަ ފަނޑިޔާރު ޖޯން ރޮބަޓްސް ހުކުރު ދުވަހު ސޮއިކުރެއްވި ވަގުތީ އަމުރުގައިވާ ގޮތުން، ޓްރަމްޕްގެ ސަރުކާރުން ހުށަހަޅާފައިވާ ކުއްލި އިސްތިއުނާފު މައްސަލަ ކޯޓުން ބަލައި ނިމެންދެން މަޝްރޫއުގެ މަސައްކަތްތައް ކުރިއަށް ގެންދެވޭނެ އެވެ. އެމެރިކާާގެ ވެރި ރަށް ވޮޝިންޓަން ޑީސީ ސަރަހައްދުގެ އިސްތިއުނާފީ މައްސަލަތައް ބެއްލެވުމުގެ ޒިންމާ އުއްތަމަ ފަނޑިޔާރު ރޮބަޓްސް އަށް އޮންނާތީ، މި އަމުރު ނެރުއްވީ ސީދާ އެމަނިކުފާނެވެ.
މީގެ ކުރިން ދަށު ކޯޓުތަކުން ނިންމާފައިވަނީ 400 މިލިއަން ޑޮލަރުގެ މި ބޮޑު މަޝްރޫއު ކުރިއަށް ގެންދެވޭނީ ކޮންގްރެސްގެ ހުއްދަ ލިބިގެން ކަމަށެވެ. އަދި އެ މަސައްކަތް ހުއްޓާލުމަށް ނެރުނު އަމުރަށް އަމަލު ކުރަން ފަށަން އޮތީ މިދިޔަ ހުކުރު ދުވަހު އެވެ. ނަމަވެސް ސުޕްރީމް ކޯޓުގެ މި ނިންމުމާ އެކު އެ އަމުރު ތަންފީޒު ކުރުން މިވަނީ މަޑުޖެހިފައި އެވެ.
ބޯލްރޫމްގެ މަސައްކަތް ހުއްޓާލަން ކޯޓުން އަމުރު ކުރުމާއެކު ޓްރަމްޕް ރުޅި ގަދަވެއްޖެ، ވިދާޅުވީ އެއީ ޤައުމީ ސަލާމަތަށް އޮތް ނުރައްކަލެއް ކަމަށް
މި މައްސަލަ އެމެރިކާގެ އެންމެ މަތީ ކޯޓަށް މި ދިޔައީ، ޓްރަމްޕް ރިޔާސީ ބާރުތައް ފުޅާކުރައްވައި، ވެރިރަށް ވޮޝިންޓަންގެ ސިފަ އޭނާ ބޭނުންފުޅުވާ ގޮތަށް ބަދަލު ކުރެއްވުމަށް މަސައްކަތް ކުރައްވަމުން ގެންދަވާ ދަނޑިވަޅެއްގައި އެވެ. ޓްރަމްޕްގެ ސަރުކާރުން ހުށަހަޅާފައިވާ ކުއްލި މައްސަލަތަކުގައި ސުޕްރީމް ކޯޓުން މީގެ ކުރިން ވެސް ސަރުކާރާ އެއްކޮޅަށް ބައެއް ނިންމުންތައް ނިންމާފައިވެ އެވެ. ނަމަވެސް، ބައެއް މުހިންމު ސިޔާސަތުތައް ފުރިހަމަ އަށް މުރާޖައާ ކުރުމަށް ފަހު، ކޯޓުން ރައީސްއާ ދެކޮޅަށް ވެސް މީގެ ކުރިން ހުކުމް ކޮށްފައިވެ އެވެ.
އެމެރިކާގެ ސުޕްރީމް ކޯޓުގައި މިވަގުތު ތިއްބެވި ނުވަ ފަނޑިޔާރުންގެ ތެރެއިން ހަ ފަނޑިޔާރުންނަކީ ކޮންޒަވޭޓިވް ނުވަތަ ކަނާއަތު ފިޔައިގެ ރައީސުން އައްޔަން ކުރައްވާފައިވާ ބޭފުޅުންނެވެ. އަދި އަނެއް ތިން ފަނޑިޔާރުންނަކީ ލިބަރަލް ނުވަތަ ވާއަތު ފިޔައިގެ ލީޑަރުން އައްޔަން ކުރައްވާފައިވާ ބޭފުޅުންނެވެ.
ސުޕްރީމް ކޯޓުގެ މި ނިންމުމާ ގުޅިގެން ޓްރަމްޕް ވަނީ ސޯޝަލް މީޑިއާގައި އުފާ ފާޅުކުރައްވައި، ކޯޓަށް ޝުކުރު އަދާ ކުރައްވާފައި އެވެ. ޓްރަމްޕް ވިދާޅުވީ މި ބޯލް ރޫމް ވެގެންދާނީ ދުނިޔޭގައި ވެސް ހުރި އެފަދަ އެންމެ ފުރިހަމަ ތަނަށް ކަމަށެވެ.
މީގެއިތުރުން، މިއީ ފާއިތުވި 150 އަހަރު ތެރޭގައި އެމެރިކާގެ ރައީސުން ބޭނުންފުޅުވި ކަމެއް ކަމަށާއި، އަދި އަސްކަރިއްޔާ އިން ވެސް ފާއިތުވި 100 އަހަރު ތެރޭގައި މިފަދަ ތަނަކަށް އެދެމުން ދިޔަ ކަމަށް ޓްރަމްޕް ވިދާޅުވި އެވެ. ޓްރަމްޕް ވިދާޅުވި ގޮތުގައި އެ އެންމެންގެ ހުވަފެންތައް ވަރަށް އަވަހަށް ހަގީގަތަކަށް ވެގެންދާނެ އެވެ.
މަސްދަރު: އަލް ޖަޒީރާ
