ވޯލްޑް ރެކޯޑް ފްރީޑައިވަރ ހެންލީ ޕްރިންސްލޫ އަނެއްކާވެސް ރާއްޖެ އަންނަނީ

ދުނިޔޭގެ ފްރީޑައިވިންގ ރެކޯޑް 11 ފަހަރު މުގުރާލާފައިވާ، އަދި ކަނޑުތަކުގެ ދިރުންތައް ހިމާޔަތްކުރުމަށް މަސައްކަތްކުރާ ހެންލީ ޕްރިންސްލޫ، ދެ ރިޓްރީޓެއްގައި ބައިވެރިވުމަށް އަނެއްކާވެސް ރާއްޖެ އައުމަށް ހަމަޖެހިއްޖެ އެވެ. 2025 ވަނަ އަހަރު އަވާނީ ޕްލަސް ފަރެސް މޯލްޑިވްސް ރިސޯޓުގައި ބޭއްވި ފްރީޑައިވިންގ ރިޓްރީޓަށް ލިބުނު ބޮޑު ކާމިޔާބީއަށްފަހު، މައިނަރ ހޮޓެލްސްގެ ދެ ރިސޯޓެއްގައި ކުރިއަށްގެންދާ މި ޕްރޮގްރާމްތަކަށް ހެންލީ ބާ އަތޮޅަށް އެނބުރި އަންނާނީ މިއަހަރުގެ ސެޕްޓެމްބަރު މަހުގަ އެވެ.

ހެންލީގެ މި ދަތުރު ފަށާނީ ސެޕްޓެމްބަރު މަހުގެ 7 އިން 10 އަށް އަވާނީ ޕްލަސް ފަރެސް މޯލްޑިވްސްގައި ބާއްވާ "ފެމިލީ ފްރީޑައިވިންގ ރިޓްރީޓް" އިންނެވެ. އޭގެ ފަހުން ސެޕްޓެމްބަރު 14 އިން 18 އަށް އެންއެޗް ކަލެކްޝަން މޯލްޑިވްސް ރީތި ރިސޯޓުގައި "އިންޓު ދަ ބްލޫ" ގެ ނަމުގައި ހަތަރު ރޭގެ ރިޓްރީޓެއް ކުރިއަށްދާނެ އެވެ. ޔުނެސްކޯގެ ބަޔޯސްފިއަރ ރިޒާވެއްގެ ގޮތުގައި ކަނޑައަޅާފައިވާ ބާ އަތޮޅުގެ ކަނޑުއަޑީގެ ރީތިކަން ތަޖުރިބާކުރުމަށް މި ދެ ރިޓްރީޓުން ތަފާތު ފުރުސަތުތަކެއް ލިބިގެންދާނެ އެވެ. މީގެ ތެރޭގައި އާއިލާތަކަށް ހާއްސަ މަޖާ ހަރަކާތްތަކާއި، އުމުރުން 16 އަހަރުން މަތީގެ ފްރީޑައިވިންގ އަށް އަލަށް ވަންނަ ފަރާތްތަކާއި ތަޖުރިބާކާރުންނަށް ހާއްސަ ފުން ޕްރޮގްރާމްތައް ހިމެނެ އެވެ.

އަވާނީ ޕްލަސް ފަރެސްގައި ކުރިއަށްދާ ހަރަކާތްތަކުގައި، ނޭވާ ހިފަހައްޓާނެ ގޮތާއި، ފެންމަތީގައި އޮންނާނެ ގޮތާއި، ސްނޯކްލިންގް އަދި ކަނޑުއަޑީގެ އެކި ކުޅިވަރުތަކުގެ އެހީގައި ހެންލީ ބެލެނިވެރިންނާއި ކުދިންނަށް ފްރީޑައިވިންގ ތައާރަފްކޮށްދޭނެ އެވެ. 

މި ފެމިލީ ފްރީޑައިވިންގ ރިޓްރީޓާއެކު، އެ ރިސޯޓުން ކޮންމެ އަހަރަކު ފާހަގަކުރާ "އޯޝަން އެވެއަރ މަންތް" ނުވަތަ ކަނޑުތަކަށް ހޭލުންތެރިކުރުވުމުގެ މަސް ފެށިގެންދާނެ އެވެ. ސެޕްޓެމްބަރު މަހު ކުރިއަށްދާ މި ޕްރޮގްރާމްގައި މުރަކަ އާލާކުރުމުގެ މަސައްކަތްތަކާއި، ކަނޑުއަޑީގެ ފޮޓޯ އަދި ވީޑިއޯ ނެގުމުގެ ސެޝަންތަކާއި، ގޮނޑުދޮށް ސާފުކުރުމުގެ އިތުރުން ޕަޑީ (PADI) ގެ ހާއްސަ ކޯސްތައް ހިމެނެ އެވެ. މީގެ އިތުރުން، ސެޕްޓެމްބަރު 17 ގައި ފާހަގަކުރާ ދުނިޔޭގެ މަޑީގެ ދުވަހާ ގުޅިގެން، ހަނިފަރު ބޭއަށް މަޑި ބަލަންދިއުމުގެ ދަތުރުތަކާއި ތަފާތު އާޓް ވޯކްޝޮޕްތައް ވެސް އަވާނީ ޕްލަސް ފަރެސްގައި އޮންނާނެ ކަމަށް މައުލޫމާތު ލިބިފައިވެ އެވެ.

"ބާ އަތޮޅަކީ އަބަދުވެސް އަހަރެމެން އެނބުރި އަންނަން ބޭނުންވާ ތަނެއް،" ބްރޭކިން ޓްރެވަލް ނިއުސް އަށް ހެންލީ ޕްރިންސްލޫ ބުންޏެވެ. އޭނާ އިތުރަށް ބުނިގޮތުގައި، މިދިޔަ އަހަރު އަވާނީ ޕްލަސް ފަރެސްގައި ބޭއްވި ރިޓްރީޓަށްފަހު، މިއަހަރު މުޅި އާއިލާއަށް ބައިވެރިވެވޭ ޕްރޮގްރާމަކާއެކު އެނބުރި އައުމަކީ ލިބޭ ވަރަށް ބޮޑު އުފަލެކެވެ. އަދި އެންއެޗް ކަލެކްޝަން މޯލްޑިވްސް ރީތި ރިސޯޓުގައި ކުރިއަށްދާ ރިޓްރީޓްގައި، ބައިވެރިންނަށް އެމީހުންގެ ހުނަރުތައް އިތުރަށް ތަރައްގީކުރުމަށް ގިނަ ވަގުތު ލިބޭނެ ކަމަށްވެސް އޭނާ ފާހަގަކުރި އެވެ. މި ދެ ރިޓްރީޓްގެ ވެސް މައިގަނޑު ބޭނުމަކީ ކަނޑުގެ މާހައުލަށް އިތުބާރު އުފެއްދުމާއި، މި ނާޒުކު ތިމާވެށި ހިމާޔަތްކުރުމުގެ މުހިންމުކަން ދަސްކޮށްދިނުމެވެ.

އަވާނީ ޕްލަސް ފަރެސް މޯލްޑިވްސްގައި ބާއްވާ ތިން ރޭގެ "ފެމިލީ ފްރީޑައިވިންގ ރިޓްރީޓް" ގެ އަގުތައް ފެށެނީ މީހަކަށް 3,160 އެމެރިކާ ޑޮލަރަށެވެ. މި އަގުގެ ތެރޭގައި ރިސޯޓުގައި ހުރުމާއި، ކެއުމާއި، ސީޕްލޭން ދަތުރުތަކުގެ އިތުރުން ރިޓްރީޓްގެ ހުރިހާ ސެޝަންތަކެއް ހިމެނެ އެވެ.