އިނގިރޭސި ފުޓްބޯޅައިގެ މަޝްހޫރު ތަރި މައިކަލް އޯވެންގެ ފުޓްބޯޅަ ކޭމްޕް ފަރެސްގައި ދެވަނަ ފަހަރަށް ބާއްވަނީ

އަވާނީ ޕްލަސް ފަރެސް މޯލްޑިވްސް ރިސޯޓުން އިންތިޒާމުކުރާ މައިކަލް އޯވެންގެ ފުޓްބޯޅަ ކޭމްޕް، ދެވަނަ އަހަރަކަށް އެ ރިސޯޓަށް އެނބުރި އަންނަކަން އޭނާ އިއުލާނުކޮށްފި އެވެ.

އެ ރިސޯޓުގެ އީސްޓާ ޗުއްޓީ ޕްރޮގްރާމުގެ ބައެއްގެ ގޮތުގައި ކުރިއަށްގެންދާ މި ކޭމްޕް އޮންނާނީ 2026 ވަނަ އަހަރުގެ މާރިޗު 31 އިން އޭޕްރީލް 3 ގެ ނިޔަލަށެވެ. 2025 ވަނަ އަހަރު ބޭއްވި ފުރަތަމަ ކޭމްޕަށް ލިބުނު ބޮޑު ތަރުހީބަށްފަހު، ބ. އަތޮޅު ފަރެސް އައިލެންޑުގައި ބާއްވާ މި ހަރަކާތުގައި، އިންގްލެންޑުގެ ކުރީގެ މަޝްހޫރު ފޯވާޑް މައިކަލް އޯވެންއާއެކު ކުޑަކުދިންނާއި ފުރާވަރުގެ ކުދިންނަށް ތަމްރީނުތަކުގައި ބައިވެރިވުމުގެ ފުރުސަތު އަލުން ލިބިގެންދާނެ އެވެ.

5 އަހަރާއި 13 އަހަރާ ދެމެދުގެ ކުދިންނަށް އަމާޒުކޮށްގެން ހަތަރު ދުވަހުގެ މުއްދަތަށް ކުރިއަށްގެންދާ މި ކޭމްޕުގައި، މައިކަލް އޯވެންގެ އިރުޝާދުގެ ދަށުން ކޮންމެ ދުވަހަކު ތަމްރީނު ސެޝަންތަކާއި، ހުނަރު ތަރައްގީކުރުމުގެ ހަރަކާތްތަކުގެ އިތުރުން ޓީމުތަކުގެ މެދުގައި ވާދަވެރި މެޗްތައް ކުރިއަށްދާނެ އެވެ. މި ޕްރޮގްރާމް ނިމިގެންދާނީ ކުލަގަދަ ރަސްމިއްޔާތަކުން ބްރޭކިންޓްރެވަލްނިއުސް ވެބްސައިޓްގައި ބުނެފައިވެ އެވެ. އެގޮތުން ކޭމްޕުގެ ކޮންމެ ބައިވެރިއަކަށް ސެޓްފިކެޓާއި، މެޑަލް އަދި އޯވެންގެ ސޮޔާއެކު ޖާރޒީ ހަދިޔާކުރެވޭނެ އެވެ. މި ކޭމްޕް ކުރިއަށްދާ މުއްދަތުގައި އަވާނީ ޕްލަސް ފަރެސް މޯލްޑިވްސްގައި ތިބޭ ހުރިހާ މެހެމާނުންނަށް މިއީ ހިލޭ ބައިވެރިވެވޭނެ ހަރަކާތެކެވެ. އަދި ކޭމްޕުގައި ރަޖިސްޓްރީވާ ކޮންމެ ކުއްޖަކަށް ދެ ސެޓުގެ ޖާރޒީއާއި، ސޯޓު އަދި އިސްޓާކީނު ހިމެނޭ ރަސްމީ ފުޓްބޯޅަ ކިޓެއް ލިބޭނެއެވެ.

މިދިޔަ އަހަރު އާއިލާތަކުގެ ފަރާތުން ލިބުނު ފޯރިގަދަ ތަރުހީބަށް ބިނާކޮށް، 2026 ވަނަ އަހަރުގެ ފުޓްބޯޅަ ކޭމްޕް ހިމަނާފައިވަނީ އަވާނީ ޕްލަސް ފަރެސް މޯލްޑިވްސްގެ އީސްޓާ ޕްރޮގްރާމުގެ ތެރޭގައެވެ. މި ޕްރޮގްރާމް ފަރުމާކޮށްފައިވަނީ ކުޅިވަރުގެ ތަމްރީނުތަކުގެ އިތުރުން ރަށުގެ ހިތްގައިމު މާހައުލުގައި އާއިލާތަކަށް ވަގުތު ހޭދަކުރެވޭނެ ގޮތަށެވެ. ފުޓްބޯޅަ ދަނޑުގެ ބޭރުން، ކުޑަކުދިންނަށް "އަވާނީ ކިޑްސް" އަދި "ޓީންސް ކްލަބް" މެދުވެރިކޮށް ތަފާތު މަޖާ ހަރަކާތްތަކާއި، ކުރެހުމާއި ފަންނުވެރިކަމުގެ މަސައްކަތްތަކުގައި ބައިވެރިވެވޭނެއެވެ. 

އާއިލާއާއެކު މޫދުކުޅިވަރުގެ ހަރަކާތްތަކުގައި ބައިވެރިވާން ބޭނުންވާ ފަރާތްތަކަށް، ޔުނެސްކޯ ބަޔޮސްފިއަރ ރިޒާވެއްގެ ގޮތުގައި ކަނޑައަޅާފައިވާ ބާ އަތޮޅުގައި އޮންނަ މި ރިސޯޓުގެ ފަރުގެ ރީތިކަން ބަލާލުމުގެ ފުރުސަތާއި، ތަފާތު ގިނަ މޫދުކުޅިވަރުތަކާއި ޑައިވިންގްގެ ތަޖުރިބާ މެހެމާނުންނަށް ލިބިގެންދާނެއެވެ.

ކުރިއަށް އޮތް ކޭމްޕާ ގުޅޭގޮތުން ވާހަކަދައްކަމުން މައިކަލް އޯވެން ބުނީ، ފުރަތަމަ ކޭމްޕުން ފެނިގެންދިޔަ ފޯރިއާއި ޖޯޝަށްފަހު، އަލުން އަވާނީ ޕްލަސް ފަރެސް މޯލްޑިވްސްއަށް އެނބުރި އައުމަކީ ލިބޭ ވަރަށް ބޮޑު އުފަލެއް ކަމަށެވެ. އަދި މިއީ އާއިލާތަކަށް ވަރަށް ޚާއްސަ މާހައުލެއް ކަމަށާއި، މި ކޭމްޕުގެ މައިގަނޑު މަގުސަދަކީ ކުދިންގެ އަމިއްލަ ނަފްސަށް އޮންނަ އިތުބާރު ބޮޑުކޮށް، ހުނަރުތައް ތަރައްގީކޮށް، އެންމެން ގުޅިގެން ކުޅިވަރުގެ އުފާ ހޯދައިދިނުން ކަމަށް އޭނާ ފާހަގަކުރިއެވެ. އޯވެން ބުނީ 2026 ވަނަ އަހަރު އަލުން އެ ރަށަށް ދިއުމަށް ކެތްމަދުވެފައި ހުރި ކަމަށެވެ.

މި ހަރަކާތުގައި ބައިވެރިވުމަށް ބޭނުންވާ ހަތަރު މީހުންގެ އާއިލާއަކަށް ޕެކޭޖްގެ އަގުތައް ފެށެނީ 3،500 އެމެރިކާ ޑޮލަރަށެވެ. މި އަގުގެ ތެރޭގައި ރިސޯޓުގައި ހުރުމާއި، ސީޕްލޭން ދަތުރުތަކުގެ އިތުރުން ފުޓްބޯޅަ ކޭމްޕުގައި ބައިވެރިވުމުގެ ފީ ހިމެނެއެވެ. މިއީ ދެ ބޮޑު މީހުންނާއި ދެ ކުޑަކުދިންނަށް ހެނދުނުގެ ނާސްތާއާއެކު، ހުރިހާ ޓެކްސްތަކާއި ފީތައް ހިމެނޭހެން ކަނޑައަޅާފައިވާ އަގެއް ކަމަށް ބުނެފައިވެ އެވެ.