ދުނިޔޭގެ ޓޫރިޒަމް ދުވަހާ ގުޅުވައިގެން ބ އަތޮޅުގައި އެއްފަހަރާ އެންމެ ގިނަ މީހުން ސްނޯކްލިންގ ކޮށްގެން ދުނިޔޭގެ ރިކޯޑް ފޮތަށް އަރައިފި އެވެ.

ރާއްޖެއެމްވީއާއި ވާހަކަ ދައްކަވަމުން ބ. އަތޮޅު ކައުންސިލްގެ ރައީސް އަޙްމަދު އަފްރާހް ވިދާޅުވީ 623 މީހުން ބައިވެރި ކަމަށާއި މިއީ ރާއްޖެއަށް ލިބުނު ފަހުރެއް ކަމަށެވެ.

"ބާނި" ނަމުގައި ފްރީޑައިވް މޯލްޑިވްސް އާއި ބ. އަތޮޅު ކައުސިލުން ގުޅިގެން ކުރިއަށް ގެންދިއަ މި ހަރަކާތަކީ ދުނިޔޭގެ ޓޫރިޒަމް ދުވަހާ ގުޅުވައިގެން، ފަތުރުވެރިކަމުގެ މަންޒިލެއްގެ ގޮތުގައި ބ. އަތޮޅު ޑެސްޓިނޭޝަން ޕްރޮމޯޝަންއާއި ތިމާވެއްޓަށް މީހުން ހޭލުންތެރިކަން އިތުރުކުރުމުގެ ގޮތުން ކުރިއަށް ގެންދިޔަ ހަރަކާތެކެވެ.

ބ. އަތޮޅުގެ ރަށްތަކުގެ އިތުރުން ރިސޯޓްތަކާއި، ގެސްޓް ހައުސްތަކުން މި ހަރަކާތުގައި ބައިވެރިވެފައިވާއިރު، އެ އަތޮޅު އަނގަފަރު ސަރަހައްދަށް އެއްފަހަރާ އެތައް ބަޔަކު ވަނީ ފީނާފައެވެ.

ދުނިޔޭގެ ރެކޯޑް ހެދުމަށް މިބޭއްވި ހަރަކާތަކީ އަތޮޅު ތެރޭގައި ފުރަތަމަ ފަހަރަށް ބޭއްވި މިފަދަ އެންމެ ބޮޑު ހަރަކާތެވެ.

މިހަރަކާތް ބާއްވާ އަނގަފަރު ސަރަހައްދަކީ ބ. އަތޮޅު ބަޔޮސްފިއާ ރިޒާވްގައި ހިމެނޭ ސަހަރައްދެކެވެ. ކަނޑުގެ ދިރުމުގެ މުއްސަނދި އަތޮޅެއްގޮތުގައި ބެލެވޭ ބ. އަތޮޅުގައި އޮންނަ، އަނގަފަރު ސަރަހައްދު މަޝްހޫރުވެފައިވަނީ ޅަ މިޔަރު ވިހާ އާލާވާ ތަނެއްގެ ގޮތުގަ އެވެ.