ރާއްޖޭގައި މަސައްކަތްކުރާ ބިދޭސީންނަށް ސިމްކާޑު ލިބުން ދަތިކުރަން ވަޒީރުންގެ މަޖިލީހުން ނިންމައިފި
18 އޯގަސްޓު 2026 | އަންގާރަ 16:25ރާއްޖޭގައި މަސައްކަތްކުރާ އަންސްކިލްޑް ބިދޭސީންނަށް ކޮންމެ މީހަކަށް އެންމެ ސިމްކާޑެއް ދޫކުރާގޮތަށް ވަޒީރުންގެ މަޖިލީހުން ނިންމަވައިފި. ސިމްކާޑު ގެއްލިގެން ނުވަތަ ހަލާކުވެގެން އާ ސިމެއް ނެގޭނީ ފުލުހުން މެދުވެރިކޮށް ހާއްސަ އުސޫލެއްގެ ދަށުން ކަމަށާއި، ޖަލުތަކަށް ވައްދާ ސިމްތަކުގެ ވެރިފަރާތްތަކަށް ގާނޫނީ ފިޔަވަޅު އެޅުމަށް ވެސް ވަނީ ނިންމަވާފައި
ވަޒީރުންގެ މަޖިލީހުގެ ޖަލްސާއެއްގެ މަންޒަރެއް | ރައީސް އޮފީސް
ރާއްޖޭގައި މަސައްކަތްކުރާ ބިދޭސީންނަށް ސިމްކާޑު ލިބުން ދަތިކުރަން ވަޒީރުންގެ މަޖިލީހުން ނިންމައިފި އެވެ.
16 އޮގަސްޓު 2026 ވީ އާދީއްތަ ދުވަހު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި، މިކަމާ ބެހޭ ގޮތުން މަޝްވަރާކޮށް ނިންމާފައިވަނީ އަންސްކިލްޑް ބިދޭސީންނަށް، ކޮންމެ ފަރާތަކަށް 1 ސިމްކާޑަށްވުރެ އިތުރަށް ދޫނުކުރާގޮތަށް ހަމަޖެއްސެމުށެވެ.
އަދި ސިމްކާޑު ހަލާކުވެ ނުވަތަ ގެއްލިއްޖެ ޙާލަތެއްގައި، ފުލުހުންނަށް ހުށަހަޅައިގެން ކަނޑައެޅޭ ވަކި ޕްރޮސެސްއެއްގެ ތެރެއިން މެނުވީ އިތުރު ނަންބަރެއް ދޫނުކުރާ ގޮތަށް ހަމަޖެއްސެވުމަށް ވަނީ ނިންމަވާފަ އެވެ.
މީގެ އިތުރުން، ޖަލުތަކަށް ވައްދާ މޯބައިލް ސިމްކާޑުތައް ރަޖިސްޓަރީކޮށްފައިވާ ފަރާތްތަކަށް ޤާނޫނީ އަދި އިދާރީ ގޮތުން އަޅަން ޖެހޭ ފިޔަވަޅުތައް އެޅޭކަން ކަށަވަރުކުމަށް ވެސް ވަނީ ނިންމަވާފަ އެވެ.
