ރޮހިންޖާ މުސްލިމުންނަށް ފާޑުކިޔުމުން މިޔަންމާގެ ރީތީގެ ރާނީގެ ލަޤަބު އަތުލައިފި
ޝްވޭ ވަނީ ރޮހިންޖާ މުސްލިމުންގެ ހަމްދަރުދީ ހޯދުމަށް މީޑިއާ ކެމްޕޭނެއް ހިންގަމުންދާ ކަމަށް ބުނެފަ
އުމުރުން 19 އަހަރުގެ މިސް ގްރޭންޑް މިޔަންމާ، ޝްވޭ އެއައިން ސީ
ރޮހިންޖާ މުސްލިމުންނާއި ގުޅޭގޮތުން ތައްޔާރުކުރި ވީޑިއޯ އަކާއި ގުޅިގެން މިޔަންމާގެ ރީތީގެ ރާނީއެއްގެ ލަޤަބު އަތުލައިފިއެވެ.
އުމުރުން 19 އަހަރުގެ މިސް ގްރޭންޑް މިޔަންމާ، ޝްވޭ އެއައިން ސީ، ގެ ލަޤަބު އަތުލި ސަބަބެއްކަމުގައި ޝޯ އިންތިޒާމް ކުރި ފަރާތުން ބުނެފައިވަނީ، އޭނާ ކޮންޓްރެކްޓާއި ޚިލާފުވެ، ރޯލް މޮޑެލްއެއްގެ ފަރާތުން ފެނިގެން ނުވާނެ އަހުލާގު ދެއްކުމެވެ.
ޝްވޭގެ ލަޤަބު އަތުލާފައިވާއިރު، ނިމިގެންދިޔަ ހަފްތާގައި އޭނާ ވަޏީ ރޮހިންޖާ ދަރިކޮޅަށް ނިސްބަތްވާ ޖަމާޢަތެއް ކަމަށްވާ އަރާކަން ރޮހިންޖާ ސެލްވޭޝަން އާމީ (އަރްސާ) އަކީ އަމިއްލަ ޚިލާފަތެއް ޤާއިމް ކޮށްގެން އުޅޭ ބައެއް ކަމަށް ބުނެފައެވެ. އަދި ރަހައިން ސްޓޭޓްގައި އަރްސާއިން ޓެރަރިޒަމްގެ އަނިޔާވެރި އަމަލުތައް ހިންގުމަށްފަހު، އެމީހުންނަކީ އަނިޔާ ލިބެމުންދާ މީހުން ކަމަށް ދެއްކުމަށް މީޑިއާ ކެމްޕެއިނެއް ހިންގައި ދުނިޔޭގެ ހަމްދަރުދީ ހޯދަމުންދާ ކަމަށްވެސް އޭނާ ވަނީ ތުޙުމަތު ކޮށްފައެވެ.
އޭނާގެ ވީޑިއޯގައި މިޔަންމާގެ އަސްކަރިއްޔާއިން ރޮހިންޖާ ދަރިކޮޅުގެ މުސްލިމުންނާއި ދެކޮޅަށް ހިންގަމުންދާ ޖަރީމާތަކާއި، ނަސްލު ނައްތާލުމުގެ އަމަލުތަކަށް އެއްވެސް ވަރަކަށް އަލިއަޅުވާލާފައި ނުވާއިރު، މަދު ބައެއް ފިޔަވާ މުޅި ދުނިޔެއިން ވެސް ދަނީ މިޔަންމާގެ އަސްކަރިއްޔާގެ އަމަލުތައް ކުށްވެރިކުރަމުންނެވެ.
ރީތީގެ ރާނީ ކަމުގެ ލަޤަބު އަތުލި ސަބަބުތަކުގެ ތެރޭގައި މި ވީޑިއޯގެ ވާހަކަ ސީދާ ބަޔާން ކޮށްފައި ނުވި ނަމަވެސް، ލަޤަބު އަތުލުމާއި ގުޅިގެން ފޭސްބުކްގައި އާންމު ކުރި ބަޔާނެއްގައި ޝްވޭ ބުނީ، އޭނާ އަރްސާ އާއި ގުޅިގެން ދެއްކި ވާހަކަތަކަކީ ލަޤަބު އަތުލާ ވަރުގެ ވާހަކަތަކެއް ނޫން ކަމަށާ، ލިބިފައިވާ މަޝްޙޫރުކަމުގެ ބޭނުން ޤައުމީ ކަންކަމަށް ބޭނުން ކުރުމަކީ ޙައްޤެއް ކަމަށެވެ.
ނިމިގެންދިޔަ އޯގަސްޓް މަހުގެ 25 ވަނަ ދުވަހުއްސުރެ، މިޔަންމާ އަސްކަރިއްޔާއިން ހިންގަމުންދާ ޖަރީމާތަކުގެ ސަބަބުން ރޮހިންޖާ ދަރިކޮޅުގެ ބައި މިލިއަނަށް ވުރެ ގިނަ މުސްލިމުން ވަނީ ބަންގާޅަށް ހިޖުރަކޮށްފައެވެ.
