ގާޑިއޯލާ އިޓަލީއާ ހަވާލު ނުވީ، އާއިލާ އަށް ވަގުތު ދޭން ބޭނުންވާތީ: މަލްޑިނީ
10 އޯގަސްޓު 2026 | ހޯމަ 04:18އިޓަލީގެ މަޝްހޫރު ނޫހެއް ކަމަށް ކޮރިއޭލާ އަށް ދިން އިންޓަވިޔުއެއްގައި މަލްޑިނީ ބުނީ، އިޓަލީއާ ހަވާލުވުމަށް ގާޑިއޯލާ އާއެކު ކުރިއަށް ގެންދިޔަ މަޝްވަރާތައް ދިޔައީ ވަރަށް ކާމިޔާބު ކަމާ އެކު ކަމަށް. އެގޮތުން އިޓަލީގެ ކުރީގެ ކޯޗަށް ދެމުން ދިޔަ މުސާރައާ އެއްވަރުގެ މުސާރަ އަކަށް ގާޑިއޯލާ އެއްބަސްވި ކަމަށާއި، ޓީމުގެ ކުޅުންތެރިންނާއި ޓީމު އަތުރާނެ ގޮތްތަކާ މެދު ވެސް ގާޑިއޯލާ ވިސްނަން ފެށި ކަމަށް މަލްޑިނީ ބުނި
އިޓަލީގެ ޤައުމީ ޓީމުގެ ހެޑް އޮފް ސްޕޯޓިން އޮޕަރޭޝަން މަޤާމުން ދާދި ފަހުން އިސްތިއުފާ ދެއްވި ޕައޮލޯ މަލްޑިނީ އާއި އިޓަލީ އިން ކޯޗަކަށް ހަމަޖައްސަން މަސައްކަތް ކުރި ޕެޕް ގާޑިއޯލާ | ރޮއިޓާސް
އިޓަލީ ޤައުމީ ޓީމުގެ ކޯޗުކަމާ ޕެޕް ގާޑިއޯލާ ހަވާލު ނުވީ، އާއިލާ އަށް ވަގުތު ދޭން އޭނާ ބޭނުންވާތީ ކަމަށް އިޓަލީގެ ޤައުމީ ޓީމުގެ ހެޑް އޮފް ސްޕޯޓިން އޮޕަރޭޝަން މަޤާމުން ދާދި ފަހުން އިސްތިއުފާ ދިން ޕައޮލޯ މަލްޑިނީ ބުނެފި އެވެ.
އިޓަލީގެ ކުރީގެ ކެޕްޓަން މަލްޑިނީ، ޤައުމީ ޓީމުގައި އޭނާ ހުރި މަޤާމުން އިސްތިއުފާ ދީފައި ވަނީ މިދިޔަ ޖުލައި މަހުގެ ތެރޭގައި އެވެ. އެއީ އިޓަލީގެ ކޯޗަކަށް އެ ޤައުމުގެ ކުރީގެ ކުޅުންތެރިޔާ އަންދްރެއާ ޕިރްލޯ ހަމަޖައްސަން ކުރި މަސައްކަތް ނާކާމިޔާބުވުމާ ގުޅިގެންނެވެ. އޭގެ ކުރިން އިޓަލީ އިން މަސައްކަތް ކުރީ ގާޑިއޯލާ އެ ޓީމަށް ގެނައުމަށެވެ.
އިޓަލީގެ މަޝްހޫރު ނޫހެއް ކަމަށް ކޮރިއޭލާ އަށް ދިން އިންޓަވިޔުއެއްގައި މަލްޑިނީ ބުނީ، އިޓަލީއާ ހަވާލުވުމަށް ގާޑިއޯލާ އާއެކު ކުރިއަށް ގެންދިޔަ މަޝްވަރާތައް ދިޔައީ ވަރަށް ކާމިޔާބު ކަމާއެކު ކަމަށެވެ. އެގޮތުން އިޓަލީގެ ކުރީގެ ކޯޗަށް ދެމުން ދިޔަ މުސާރައާ އެއްވަރުގެ މުސާރައަކަށް ގާޑިއޯލާ އެއްބަސްވި ކަމަށާއި، ޓީމުގެ ކުޅުންތެރިންނާއި ޓީމު އަތުރާނެ ގޮތްތަކާމެދު ވެސް ގާޑިއޯލާ ވިސްނަން ފެށި ކަމަށް މަލްޑިނީ ބުނި އެވެ.
ނަމަވެސް، މަޝްވަރާތައް ކުރިއަށް ދަނިކޮށް ކުޑަ ދުވަސްކޮޅެއްގެ ތެރޭގައި ގާޑިއޯލާ ވަނީ އޭނާގެ ނިންމުން ބަދަލުކޮށްފައި ކަމަށް މަލްޑިނީ ބުނި އެވެ. އެގޮތުން ވަރަށް ބޮޑަށް ވަރުބަލިވެފައި ހުރުމުން، އެ މަޤާމަށް ގާޑިއޯލާ ނޫނެކޭ ބުނި ކަމަށް މަލްޑިނީ ހާމަ ކުރި އެވެ. މަލްޑިނީ ބުނީ، އިޓަލީއާ ހަވާލުވާން ގާޑިއޯލާ ބޭނުން ނުވީ އޭނާގެ އާއިލާ އަށް ވަގުތު ދޭން ބޭނުންވާތީ ކަމަށެވެ.
އެކަމާ ގުޅޭ ގޮތުން މަލްޑިނީ އިތުރަށް ބުނެފައި ވަނީ، ގާޑިއޯލާގެ ނިންމުމަށް އިޓަލީގެ ފުޓުބޯޅަ ފެޑެރޭޝަން އިން ފުރިހަމަ އަށް އިހުތިރާމް ކުރާ ކަމަށެވެ. އައު ކޯޗެއް ހޯދުމަށް ކުރަމުން އައި މަސައްކަތުގައި އިޓަލީ އިން އެންމެ ފަހުން ކޯޗަކަށް ހަމަޖެއްސީ ރޮބާޓް މަންޗިނީ އެވެ. އޭނާ އަކީ 2020 ވަނަ އަހަރުގެ ޔޫރޯ މުބާރާތް އިޓަލީ އަށް ކާމިޔާބު ކޮށްދިން ކޯޗެވެ.
