ކޮލަމްބިއާގެ ހަތިޔާރު އެޅި ޖަމާއަތްތަކާ ދެކޮޅަށް ވަރުގަދަ ފިޔަވަޅުތަކެއް އަޅުއްވާނެ ކަމުގެ ވައުދާއެކު އަބެލާޑޯ ޑި ލާ އެސްޕްރިއޭލާ ކޮލަމްބިއާގެ ރައީސްކަމުގެ ހުވާ ކުރައްވައިފި

ކޮލަމްބިއާގެ ހަތިޔާރު އެޅި ޖަމާއަތްތަކާ ދެކޮޅަށް ވަރުގަދަ ފިޔަވަޅުތަކެއް އަޅުއްވާނެ ކަމުގެ ވައުދާއެކު، ކަނާތު ފިޔައިގެ ގާނޫނީ ވަކީލު އަބެލާޑޯ ޑި ލާ އެސްޕްރިއޭލާ އެ ގައުމުގެ ރައީސްކަމުގެ ހުވާ ކުރައްވައިފި އެވެ. އޭނާ ރައީސްކަމަށް އިންތިޚާބުވެވަޑައިގަތީ، ހަތިޔާރު އެޅި ޖަމާއަތްތައް ނައްތާލުމުގެ އިތުރުން، ސަރުކާރުގެ ޚަރަދުތައް 40 އިންސައްތައާ ހަމައަށް ކުޑަކުރުމަށާއި، ދެކުނު އެމެރިކާގެ މި ގައުމުގެ ތެލާއި ގޭހުގެ ސިނާއަތް އަލުން ދިރުވުމަށް ވެވަޑައިގެންނެވި ވައުދުތަކާ އެކުގަ އެވެ.

ޢުމުރުން 48 އަހަރުގެ ޑި ލާ އެސްޕްރިއޭލާ ރައީސްކަމުގެ ހުވާ ކުރެއްވީ މިދިޔަ ހުކުރު ދުވަހު އެވެ. އޭނާ ވަނީ ޒަމާނުއްސުރެ އަމަލުކުރަމުން އައި އުސޫލުތަކާ ޚިލާފަށް، ހުވާކުރުމުގެ ރަސްމިއްޔާތު ވެރިރަށް ބޮގޯޓާގެ ބަދަލުގައި ކާލީ ސިޓީގައި ބާއްވާފަ އެވެ. ކޮލަމްބިއާގެ ހުޅަނގު ދެކުނުގައި އޮންނަ މި ސިޓީއަކީ ސަރުކާރާއި ހަތިޔާރު އެޅި ޖަމާއަތްތަކާ ދެމެދު ހިނގާ ކުރިމަތިލުންތަކުގެ ނުރައްކާ އެންމެ ބޮޑަށް ކުރިމަތިވާ އެއް ސަރަހައްދެވެ.

މި ނިންމުމަކީ، ޖޫން މަހު ބޭއްވި ރިޔާސީ އިންތިޚާބުގެ ދެވަނަ ބުރުގައި ޑި ލާ އެސްޕްރިއޭލާ އަތުން ބަލިވި، ކުރީގެ ރައީސް ގުސްތާވޯ ޕެޓްރޯ ގެންގުޅުއްވި މަޝްވަރާގެ ސިޔާސަތާ ދުރަށް ޖެހިލުމަށް ނިންމި ނިންމުމެއްކަން ހާމަވެގެންދިޔަ ކަމެކެވެ. ވާތު ފިޔައިގެ ލީޑަރު ޕެޓްރޯ ހަތިޔާރު އެޅި ޖަމާއަތްތަކާއެކު ސުލްހަ ގާއިމުކުރުމަށް ގެންގުޅުއްވި ސިޔާސަތަކީ ނާކާމިޔާބު ސިޔާސަތެއްގެ ގޮތުގައި ޑި ލާ އެސްޕްރިއޭލާ ވަނީ ސިފަކުރައްވާފަ އެވެ.

"ގައުމުގެ ހަމަޖެހުމަށް ބުރޫއަރާ ފަދަ އެއްވެސް ކަމަކަށް މި ސަރުކާރުން ފުރުސަތެއް ނުދޭނަން،" ހުކުރު ދުވަހު ވާހަކަދައްކަވަމުން ޑި ލާ އެސްޕްރިއޭލާ ވިދާޅުވި އެވެ. އަދި "މަސްތުވާތަކެތީގެ ޓެރަރިޒަމް" އެއްކޮށް ނައްތާލުމަށް އޭނާ ވަނީ އަޒުމް ކަނޑައަޅާފަ އެވެ.

އޭނާ އިތުރަށް ވިދާޅުވީ، ހަތިޔާރު އެޅި ޖަމާއަތްތަކާއެކު މަޝްވަރާކުރުމުގެ ފުރުސަތު މިހާރު މުޅިން ބަންދުވެފައިވާ ކަމަށެވެ.

ކޮލަމްބިއާގެ ވިޔަފާވެރިންނާ މުޚާތަބު ކުރައްވަމުން ޑި ލާ އެސްޕްރިއޭލާ ވިދާޅުވީ، އޭނާގެ ސަރުކާރު ވެގެންދާނީ ކޮލަމްބިއާގައި އިންވެސްޓްކުރުމަށް ލިބޭނެ އެންމެ ގާތް ބައިވެރިޔާ ކަމަށެވެ.

އަދި ޒިންމާދާރު އަދި ދެމެހެއްޓެނިވި ގޮތެއްގައި "ފްރެކިންގް" ނުވަތަ ބިމުގެ އަޑިން ތެލާއި ގޭސް ނެގުމުގެ މަސައްކަތް ކުރިއަށްގެންދިއުމަށް އޭނާ ގޮވާލެއްވި އެވެ.

"ކުރިއަށް އޮތް މަދު އަހަރުތަކަކަށް ފުދޭވަރުގެ ތެލުގެ ރިޒާވެއް އޮތުމުން އެވަރުން ފުއްދާލައިގެން ތިބެވޭކަށް ނެތް. އަދި ގޭހުގެ ރިޒާވް ދަށްވަމުންދާ ދިއުންވެސް ގަބޫލެއް ނުކުރެވޭނެ،" އޭނާ ވިދާޅުވި އެވެ. އަދި ދައުލަތުގެ ތެޔޮ ކުންފުނި "އެކޯޕެޓްރޯލް" ވަރުގަދަކުރުމަށް ސަރުކާރުން މަސައްކަތް ކުރާނެ ކަމަށްވެސް ވިދާޅުވި އެވެ.

‘އެލް ޓިގްރޭ’

ސަޕޯޓަރުންގެ މެދުގައި "އެލް ޓިގްރޭ" ނުވަތަ މިނިކާވަގުގެ ނަމުން މަޝްހޫރުވެފައިވާ ޑި ލާ އެސްޕްރިއޭލާ އަކީ ސިޔާސީ ދާއިރާއަށް އަލަށް ނުކުމެވަޑައިގެންނެވި ބޭފުޅެކެވެ. އޭނާގެ މުއްސަނދިކަމާއި މަގުބޫލުކަން ހޯއްދެވީ ވަކީލެއްގެ ގޮތުގަ އެވެ. އިންތިޚާބީ މަގާމެއް މީގެ ކުރިން ފުރުއްވާފައި ނުވާއިރު، އޭނާގެ ކެމްޕޭނަށް ބޭނުންވާ ޚަރަދުތައްވެސް ބޮޑަށް ހަމަޖެއްސެވީ އަމިއްލަ ފައިސާއިންނެވެ.

އޭނާ ވެރިކަމަށް ވަޑައިގަތުމަކީ ކޮލަމްބިއާގެ ފިކުރަށް އައި ބޮޑު ބަދަލެކެވެ. ފާއިތުވި ހަތަރު އަހަރު އެ ގައުމުގެ ވެރިކަމުގައި ހުންނެވީ ކުރީގެ ހަނގުރާމަވެރިއެއް ކަމަށްވާ ޕެޓްރޯ އެވެ. ޕެޓްރޯ އަކީ އެމެރިކާގެ ރައީސް ޑޮނަލްޑް ޓްރަމްޕްގެ މަސްތުވާތަކެއްޗާއި ހިޖުރަވެރިންނާ ގުޅޭ ސިޔާސަތުތަކަށް ވަރަށް ބޮޑަށް ފާޑުވިދާޅުވި ބޭފުޅެކެވެ.

ނަމަވެސް، ޑި ލާ އެސްޕްރިއޭލާ ގެންގުޅުއްވަނީ ޓްރަމްޕްގެ ސިޔާސަތުތަކާ އެއްގޮތް، ލެޓިން އެމެރިކާގެ މަސްތުވާތަކެތީގެ ކުށްތަކާ ދެކޮޅަށް އަސްކަރީ ބާރު ބޭނުންކުރުމުގެ ސިޔާސަތެކެވެ.

ހުކުރު ދުވަހުގެ ރަސްމިއްޔާތު ބޭއްވީ ކޮންގްރެސްގެ ކުރިމަތީގައި ހުންނަ ޔުނިވާސިޓީ އޮޑިޓޯރިއަމެއްގަ އެވެ. މި ރަސްމިއްޔާތުގައި ސަލާމަތީ ކަންކަން ވަރަށް ވަރުގަދަކޮށްފައިވާއިރު، މަގުތަކުގައި ސިފައިންނާއި ހަތިޔާރުއެޅި އުޅަނދުތައް ބަހައްޓާފައި ހުއްޓެވެ. އަދި ފާއިތުވި ދުވަސްތަކުގައި ފުލުހުން ވަނީ ޗެކްޕޮއިންޓްތައް ގާއިމުކޮށް، ގޮވާތަކެތި ހުރިތޯ ބެލުމަށް އުޅަނދުތައް ބަލައި ފާސްކޮށްފަ އެވެ.

ހުވާކުރުމުގެ ރަސްމިއްޔާތަށްފަހު، ޑި ލާ އެސްޕްރިއޭލާ ވަނީ ކައިރީގައި ހުރި އަސްކަރީ މަރުކަޒަކަށް ވަޑައިގެން ސިފައިންނާ މުޚާތަބު ކުރައްވާފަ އެވެ. މިއީ ސިފައިންގެ ރޫހު އާލާކުރުމަށާއި، އޭނާގެ ވެރިކަމުގައި ގެންގުޅޭނެ ހަރުކަށި ސިޔާސަތު ހާމަކުރުމަށް ކުރެއްވި ޒިޔާރަތެކެވެ.

ކޮލަމްބިއާގެ ހުޅަނގު ދެކުނު ސަރަހައްދަކީ މީގެ ދިހަ އަހަރު ކުރިން ސަރުކާރާއެކު ސުލްހައިގެ އެއްބަސްވުމެއްގައި ސޮއިކުރި "ފާކް" (FARC) ޖަމާއަތުން ވަކިވި ހަނގުރާމަވެރިންގެ ނުފޫޒު އޮތް ސަރަހައްދެކެވެ. މީގެ އިތުރުން "ކްލޭން ޑެލް ގޮލްފޯ" ނަމަކަށް ކިޔާ މަސްތުވާތަކެތީގެ ކާޓެލްއާއި "ނޭޝަނަލް ލިބަރޭޝަން އާމީ" (ELN) ގެ ހަރަކާތްތައްވެސް އެ ސަރަހައްދުގައި ވަރުގަދަ އެވެ.

އާ ރައީސް ވަނީ މަސްތުވާތަކެތީގެ ވިޔަފާރިއާ ދެކޮޅަށް އެމެރިކާގެ އެހީތެރިކަމާއެކު އުފައްދާފައިވާ "ޝީލްޑް އޮފް ދަ އެމެރިކާސް" އިއްތިހާދުގައި ބައިވެރިވާނެ ކަމަށް ވައުދުވެވަޑައިގެންފަ އެވެ. މިއީ މާރިޗު މަހު ޓްރަމްޕްގެ ސަރުކާރުން ބޭއްވި ސަމިޓަކުން އުފެދުނު އިއްތިހާދެކެވެ. މީގެ އިތުރުން، އިސްރާއީލާއެކު އަލުން ސިޔާސީ ގުޅުން ގާއިމުކުރުމަށާއި، ކިއުބާ އަދި ނިކަރާގުއާ އަކީ "ޚުދުމުޚުތާރު" ގައުމުތަކެއްގެ ގޮތުގައި ސިފަކޮށް، އެ ގައުމުތަކާއެކު އޮތް ގުޅުން ކަނޑާލުމަށްވެސް އޭނާ ވަނީ ނިންމާފަ އެވެ.

އިންތިޚާބުގެ ނަތީޖާ އޮޅުވާލާފައިވާ ކަމަށް ބުނެ، ކުރީގެ ރައީސް ޕެޓްރޯ ފުރަތަމަ ނަތީޖާ ގަބޫލުކުރަން ދެކޮޅު ހެއްދެވި އެވެ. ނަމަވެސް ބައިނަލްއަގުވާމީ އޮބްޒާވަރުންނާއި ކޮލަމްބިއާގެ އިންތިޚާބީ އިދާރާތަކުން އެ ތުހުމަތުތައް ދޮގުކުރުމުން، އެންމެ ފަހުން ޕެޓްރޯ ވަނީ ނަތީޖާއަށް އިހުތިރާމް ކުރައްވާނެ ކަމަށް ވިދާޅުވެފަ އެވެ.

އެހެންނަމަވެސް، އާ ރައީސް ހުވާކުރެއްވި ދުވަހު ކާލީ، ބޮގޯޓާ އަދި ބަރަންކީލާ ފަދަ ސިޓީތަކުގައި ވަނީ މުޒާހަރާތައް ބާއްވާފަ އެވެ.

ކާލީގެ ޕުއެރްޓޯ ރެސިސްޓެންސިއާ ސަރަހައްދުގައި މުޒާހަރާކުރި އުމުރުން 25 އަހަރުގެ ސެބަސްޓިއަން އޯކަމްޕޯ ބުނީ، ރައްޔިތުން ނުކުމެ ތިބީ އެމީހުންގެ ތާއީދު ނެތް ރައީސަކާ ދެކޮޅަށް "އިއްޒަތާއި ކަރާމާތް" ދިފާއުކުރުމަށް ކަމަށެވެ.

އަލްޖަޒީރާއާ ވާހަކަދައްކަވަމުން ބޮގޯޓާގެ ޖަވޭރިއާނާ ޔުނިވާސިޓީގެ އިގްތިސާދީ މާހިރު ޖޯޖް ރެސްޓްރެޕޯ ވިދާޅުވީ، އިންތިޚާބުގެ ނަތީޖާ ކައިރިވުމުން އެނގެނީ ފިކުރީ ގޮތުން ބައިބައިވެފައިވާ ގައުމެއް ކުރިއަށް ގެންދިއުމުގައި ބޮޑެތި ގޮންޖެހުންތަކެއް ހުރިކަން ކަމަށެވެ.

"އޭނާގެ މިއަދުގެ ތަގުރީރުން ފެންނަނީ ތަފްސީލެއް ނެތް، ގިނަ ނިޔަތްތަކަކާއި ސިޔާސީ އުސޫލުތަކެއް. މިއީ ކުރީގެ ރައީސް ގުސްތާވޯ ޕެޓްރޯގެ ސިޔާސަތުތަކާ މުޅިން ތަފާތު ކަންކަން،" ރެސްޓްރެޕޯ ވިދާޅުވި އެވެ.

އޭނާ އިތުރަށް ވިދާޅުވީ، ކަންކަން ކުރާނެ ތަފްސީލުތައް ހާމަނުކުރުމުން، ކޮލަމްބިއާއަކީ "މުއުޖިޒާތެއް ފަދަ ގައުމަކަށް" ހެދުމަށް އޭނާ ވެވަޑައިގެންނެވި ވައުދުތައް ފުއްދުމަކީ ވަރަށް އުނދަގޫ ކަމަކަށް ވާނެ ކަމަށެވެ.

އެމެރިކާގެ އެހީގެ ޕްލޭން

ޑި ލާ އެސްޕްރިއޭލާގެ ކާމިޔާބީއަކީ ލެޓިން އެމެރިކާގައި ކަނާތު ފިޔައިގެ ލީޑަރުން ހޯދަމުންދާ ކާމިޔާބީތަކުގެ ތެރެއިން އެއް ކާމިޔާބެވެ. 2025 ވަނަ އަހަރުގެ ޖެނުއަރީ މަހު ޓްރަމްޕް އަލުން ވައިޓް ހައުސްއަށް ވަޑައިގެންނެވި ފަހުން، ލެޓިން އެމެރިކާގެ ހަތް ގައުމެއްގައި ކަނާތު ފިޔައިގެ ލީޑަރުން ވަނީ އިންތިޚާބު ކާމިޔާބު ވެފަ އެވެ. އޭގެ ތެރޭގައި ޕެރޫގެ ކެއިކޯ ފުޖިމޯރީ، ޗިލީގެ ހޯސޭ އެންޓޯނިއޯ ކާސްޓް އަދި އާޖެންޓީނާގެ ހާވިއޭ މިލެއި ހިމެނެ އެވެ.

ޑޮނަލްޑް ޓްރަމްޕް ވަނީ އަމިއްލަފުޅަށް ޑި ލާ އެސްޕްރިއޭލާގެ ކެމްޕޭނަށް ތާއީދު ކުރައްވާފަ އެވެ.

އެމެރިކާގެ ސްޓޭޓް ޑިޕާޓްމަންޓުން ހުކުރު ދުވަހު ބުނީ، ޓްރަމްޕްގެ ސަރުކާރުން ޑި ލާ އެސްޕްރިއޭލާއަށް ސަލާމަތީ އެހީގެ ގޮތުގައި 1 ބިލިއަން ޑޮލަރު ދިނުމަށް ރާވާފައިވާ ކަމަށެވެ. ނަމަވެސް މިކަމަށް އެމެރިކާގެ ކޮންގްރެސްގެ ހުއްދަ ބޭނުންވާނެ އެވެ.

"އަލުން އާލާކުރެވުނު މި ގުޅުމުގެ ބިންގަލެއްގެ ގޮތުން، އެމެރިކާގެ ކޮންގްރެސްއާ ގުޅިގެން، ރައީސް ޑި ލާ އެސްޕްރިއޭލާގެ ސަރުކާރަށް އެހީތެރިވުމަށް 1 ބިލިއަން ޑޮލަރުގެ ސަލާމަތީ އެހީގެ ޕެކޭޖެއް އިއުލާން ކުރުމަށް އެމެރިކާއިން ގަސްދުކުރޭ،" ސްޓޭޓް ޑިޕާޓްމަންޓުގެ ބަޔާނުގައިވެ އެވެ.

ހުކުރު ދުވަހުގެ ރަސްމިއްޔާތުގައި ބައިވެރިވެވަޑައިގެންނެވި ބޭފުޅުންގެ ތެރޭގައި ސްޕެއިންގެ ރަސްގެފާނު ފެލިޕޭ ހަވަނަ، އެމެރިކާގެ އެކްޓިން އެޓާނީ ޖެނެރަލް ޓޮޑް ބްލާންޗް، ފީފާގެ ރައީސް ޖިއާނީ އިންފަންޓީނޯ އަދި ލެޓިން އެމެރިކާގެ ކަނާތު ފިޔައިގެ ލީޑަރުން ކަމަށްވާ މިލެއި އާއި ކާސްޓް ހިމެނެ އެވެ.