އީރާން އާއެކު ހަނގުރާމަ އިން ނުކުތުމަށް ސާފު ޕްލޭނެއް ބޭނުންވާ ކަމަށް، އެމެރިކާގެ އަސްކަރީ އިސްވެރިޔާ އަންގަވައިފި

އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމަ އިން ވަކިވުމަށް ސާފު އެގްޒިޓް ސްޓްރެޓަޖީ އެއް އެެމެރިކާ އަށް ބޭނުންވާ ކަމަށް، އެ ޤައުމުގެ އަސްކަރިއްޔާގެ އެންމެ އިސްވެރިޔާ، ޖޮއިންޓް ޗީފްސް އޮފް ސްޓާފްގެ ޗެއާމަން އަންގަވައިފި އެވެ.

އެމެރިކާގެ މީޑިއާތަކުން ރިޕޯޓު ކޮށްފައިވާ ގޮތުގައި، އަސްކަރިއްޔާގެ އިސްވެރިޔާ މިހެން އަންގަވާފައި ވަނީ، އެމެރިކާގެ ރައީސް ޑޮނަލްޑް ޓްރަމްޕްގެ އެޑްވައިޒަރުންނަށެވެ. މީޑިއާތަކުން މި ވާހަކަ ރިޕޯޓު ކޮށްފައި ވަނީ، އެކަމުގެ މައުލޫމާތު އެނގޭ އަދި އިތުބާރު ހުރި މަސްދަރުތަކާ ހަވާލާދީ އެވެ. 

މީޑިއާ ރިޕޯޓުތައް ބުނާ ގޮތުގައި، ޖޮއިންޓް ޗީފްސް އޮފް ސްޓާފްގެ ޗެއާމަން ވަނީ، އީރާންއާ ދެކޮޅަށް ކުރާ ހަނގުރާމައިގައި ހަމައެކަނި ވައިގެ މަގުން ދޭ ހަމަލާތަކުން، އެ ޤައުމުގެ ރައީސް ޓްރަމްޕް ބޭނުންފުޅުވާ މަޤުސަދުތައް ހާސިލުވުމަކީ ދުރު ކަމެއްކަން ވައިޓް ހައުސްގެ އެޑްވައިޒަރުންނަށް ސާފު ކޮށްދެއްވައިފަ އެވެ. އަދި މި ހަނގުރާމަައިގައި ކުރިއަށް ދާނެ ސާފު މިސްރާބެއް އޮތުމުގެ މުހިންމުކަން އޭނާ ފާާހަގަ ކުރައްވާފައިވެ އެވެ. 

މި މައްސަލައިގައި އަސްކަރީ އިސްވެރިންގެ ކަންބޮޑުވުންތައް ހުރީ ހަމައެކަނި ހަމަލާ ދިނުމަކުން ނަތީޖާ ނެރެވޭނެ ކަމާ މެދު ނޫން ކަމަށާއި، ދިގު ލައިގެންދާ ހަނގުރާމައަކުން ސަލާމަތް ވާނެ ގޮތުގެ ރޭވުމެއް ނެތުމުން ކަމަށް ވެސް ރިޕޯޓުތައް ބުނެ އެވެ. އެމެރިކާގެ ރައީސް ޓްރަމްޕްގެ ސަރުކާރުން އީރާންއާ މެދު ގެންގުޅޭ ހަރުކަށި ސިޔާސަތުތަކުގެ ސަބަބުން، ސަރަހައްދީ މަސްލަހަތަށް ކުރާނެ އަސަރުތަކާ މެދު ވެސް އަސްކަރީ މާހިރުން ދަނީ ސުވާލު އުފައްދަމުންނެވެ.

އީރާންގެ މައްސަލައިގައި އެމެރިކާގެ ސަރުކާރުގެ ތެރޭގައި ޚިޔާލު ތަފާތުވުންތައް ހުރިކަން ހާމަވެފައިވާއިރު، މިއީ މަސްރަހު އިތުރަށް ގޯސް ވެދާނެ ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ދެކެ އެވެ. ޚާއްސަކޮށް ވައިގެ ބާރުގެ ބޭނުން ކޮށްގެން އެކަނި، އީރާންގެ އަސްކަރީ ގާބިލުކަން ކުޑަ ނުކުރެވޭނެ ކަމަށް އަސްކަރިއްޔާގެ އެންމެ މަތީ ވެރިޔާ ވިދާޅުވުމަކީ، ކުރިއަށް އޮތް ތަނުގައި އެމެރިކާގެ ސިޔާސަތަށް ބަދަލުތަކެއް އަތުވެދާނެ ކަމެއް ކަމަށް ބެލެވެ އެވެ.

މި ރިޕޯޓުތަކާ ގުޅޭ ގޮތުން ވައިޓް ހައުސް އިން، ނުވަތަ ޕެންޓަގަން އިން ރަސްމީކޮށް އެއްވެސް އެއްޗެއް ބުނެފައި ނުވެ އެވެ. ނަމަވެސް އީރާން އާއި އެމެރިކާއާ ދެމެދު އޮތް ނުތަނަވަސްކަން މި ދުވަސްވަރު ވަނީ ވަރަށް ބޮޑަށް އިތުރުވެފައި އެވެ.