އެމެރިކާއާ ދެކޮޅަށް، އައިސީސީ އަށް ދެމުންދާ އެއްބާރުލުން ކެނެޑާ އިން ދަމަހައްޓާނަން: ބޮޑު ވަޒީރު ކާނީ
6 އޯގަސްޓު 2026 | ބުރާސްފަތި 08:38ބޮޑު ވަޒީރު ކާނީ ވިދާޅުވީ، ކެނެޑާ އަކީ އައިސީސީގެ ފަޚުރުވެރި މެންބަރެއް ކަމަށާއި، މާލީ ގޮތުންނާއި އިންސާނީ ވަސީލަތްތަކުގެ ގޮތުން ވެސް އެ ކޯޓަށް އެހީތެރިކަން ފޯރުކޮށްދެމުންދާ ކަމަށް. އަދި ކެނެޑާގެ އުސޫލުތަކާއި އަމަލުތަކުން ވެސް އެ ކޯޓަށް ތާއީދު ކުރާކަން ހާމަވާނެ ކަމަށާއި، ކުރިއަށް އޮތް ތަނުގައި ވެސް އެ ސިޔާސަތު ބަދަލު ނުވާނެ ކަމަށް އޭނާ ވިދާޅުވި
ކެނެޑާގެ ބޮޑު ވަޒީރު މާާކް ކާނީ އާއި އެމެރިކާާގެ ރައީސް ޑޮނަލްޑް ޓްރަމްޕް | ގެޓީ އިމޭޖަސް
ބައިނަލްއަޤުވާމީ ޖިނާއީ ކޯޓު (އައިސީސީ) އަށް އެމެރިކާ އިން ފިއްތުންތައް ކުރިމަތި ކުރަމުންދާ ދަނޑިވަޅެއްގައި، އެ ކޯޓަށް ކެނެޑާ އިން ދެމުންދާ އެއްބާރުލުން ދަމަހައްޓާނެ ކަމުގެ ޔަޤީންކަން، ކެނެޑާގެ ބޮޑު ވަޒީރު މާާކް ކާނީ ދެއްވައިފި އެވެ.
ބޮޑު ވަޒީރު ކާނީ ވިދާޅުވީ، އައިސީސީގެ މެންބަރު ކަމުން ވަކިވުމަށާއި، އެ ކޯޓަށް ދޭ ފަންޑު ހުއްޓާލުމަށް އެމެރިކާ އިން އެކުވެރި ޤައުމުތަކަށް ބާރު އަޅަމުން ދިޔަ ނަމަވެސް، ކެނެޑާ އިން އެ މުއައްސަސާ އަށް ފުރިހަމަ އަށް ތާއީދު ކުރާނެ ކަމަށެވެ.
މިކަމާ ގުޅޭ ގޮތުން ވާހަކަ ދައްކަވަމުން ބޮޑު ވަޒީރު ކާނީ ވިދާޅުވީ، ކެނެޑާ އަކީ އައިސީސީގެ ފަޚުރުވެރި މެންބަރެއް ކަމަށާއި، މާލީ ގޮތުންނާއި އިންސާނީ ވަސީލަތްތަކުގެ ގޮތުން ވެސް އެ ކޯޓަށް އެހީތެރިކަން ފޯރުކޮށްދެމުންދާ ކަމަށެވެ. އަދި ކެނެޑާގެ އުސޫލުތަކާއި އަމަލުތަކުން ވެސް އެ ކޯޓަށް ތާއީދު ކުރާކަން ހާމަވާނެ ކަމަށާއި، ކުރިއަށް އޮތް ތަނުގައި ވެސް އެ ސިޔާސަތު ބަދަލު ނުވާނެ ކަމަށް އޭނާ ވިދާޅުވި އެވެ. ދުނިޔޭގެ މަސްރަހު ނުތަނަވަސްވަމުންދާ މިންވަރަކަށް އައިސީސީގެ ދައުރު އިތުރަށް މުހިންމު ވަމުންދާކަން ވެސް ބޮޑު ވަޒީރު ކާނީ ފާހަގަ ކުރެއްވި އެވެ.
އައިސީސީ އަށް ދެމުން އަންނަ އެއްބާރުލުން ދަމަހައްޓާނެ ކަމަށް ވިދާޅުވެ، ކެނެޑާގެ ބޮޑު ވަޒީރު ކާނީ ވިދާޅުވުން
އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އައިސީސީ އަށް އަމާޒުކޮށް ފާޑު ކިޔުންތައް އިތުރު ކޮށްފައި ވަނީ، ޣައްޒާގައި ހިންގަމުންދާ ގަތުލު އާންމާ ގުޅިގެން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ހިމެނޭހެން، އެ ޤައުމުގެ އިސް އޮފިޝަލުން ހައްޔަރު ކުރުމުގެ އަމުރު އެ ކޯޓުން ނެރުމާ ގުޅިގެންނެވެ. އައިސީސީ އުފެއްދި ރޯމް މުއާހަދާގައި އެމެރިކާ އިން ބައިވެރިވެފައި ނުވެ އެވެ.
ޣައްޒާގައި ހިންގާފައިވާ ހަނގުރާމައިގެ ކުށްތަކާއި، އިންސާނިއްޔަތާ ޚިލާފު ޖަރީމާތަކާ ގުޅިގެން 2024 ވަނަ އަހަރު ނަތަންޔާހޫ ހައްޔަރު ކުރުމުގެ އަމުރު ނެރުއްވި އައިސީސީގެ ކުރީގެ ޕްރޮސިކިއުޓަރު ކަރީމް ޚާން، ދާދި ފަހުން ވަނީ ސުލޫކީ މައްސަލަތަކެއްގައި މަޤާމުން ވަކި ކޮށްފައި އެވެ.
މީގެ އިތުރުން، އަފްޣާނިސްތާނުގައި ތިބި އެމެރިކާ ސިފައިންނާ ގުޅޭ މައްސަލައެއް ބެއްލެވުމާ ގުޅިގެން، 2025 ވަނަ އަހަރުގެ އޮގަސްޓް މަހު އެމެރިކާ އިން ވަނީ އައިސީސީގެ ކެނެޑާ ފަނޑިޔާރު ކިމްބާލީ ޕްރޯސްޓް އަށް ދަތި ކުރުމުގެ ފިޔަވަޅު އަޅާފައި އެވެ. ޕްރޯސްޓް އަކީ އެމެރިކާގެ ދަތި ކުރުމުގެ ފިޔަވަޅުތައް އަމާޒުވި އައިސީސީގެ ހަތަރު އޮފިޝަލުންގެ ތެރެއިން އެކަކެވެ. މިފަދަ ފިއްތުންތަކާ އެކު ވެސް، ކެނެޑާ އިން ދެމި އޮތީ ބައިނަލްއަޤުވާމީ އިންސާފު ގާއިމުކުރުމުގައި އައިސީސީ އާއެކު ކަމަށް ބޮޑު ވަޒީރު ކާނީގެ ވާހަކަތަކުން ސާފު ވެގެންދެ އެވެ.
އައިސީސީ އަށް ދެމުން އަންނަ އެއްބާރުލުން ދަމަހައްޓާނެ ކަމަށް ކާނީ ވިދާޅުވުމާ ގުޅިގެން، އެމެރިކާ އާއި ކެނެޑާއާ ދެމެދު އޮތް ގުޅުން އިތުރަށް ގޯސްވެގެން ދާނެ ކަމަށް ބެލެވެ އެވެ. މީގެ ކުރިން ވެސް ގްރީންލޭންޑުގެ މައްސަލަ އާއި އެހެނިހެން މައްސަލަތަކުގައި ޓްރަމްޕް ވަނީ ކެނެޑާ އާއި އެ ޤައުމުގެ ބޮޑު ވަޒީރު ކާނީ އަށް ވަރަށް ބޮަޑަށް ފާޑު ވިދާޅުވެފައި އެވެ.
މަސްދަރު: އަލް ޖަޒީރާ
