ހުރްމުޒް ކަނޑުއޮޅި ބުދަ ދުވަހާ ހަމައަށް ހުޅުވާލެވޭނެ ކަމަށް އުންމީދު ކުރަން: އެމެރިކާގެ ޓްރެޜަރީ ސެކްރެޓަރީ
4 އޯގަސްޓު 2026 | އަންގާރަ 13:15އީރާނާއެކު މަޝްވަރާކޮށްގެން ހުރްމުޒް ކަނޑުއޮޅި އަލުން ހުޅުވުމުގެ ފުރުސަތު އެބައޮތް ކަމަށް އެމެރިކާއިން ބުނި ނަމަވެސް، އީރާނުން ވަނީ އެފަދަ އެއްބަސްވުމެއް ނެތް ކަމަށް ބުނެ އެކަން ދޮގުކޮށްފައި. މި ނުތަނަވަސްކަމުގެ ތެރޭގައި އެ ސަރަހައްދުން ދަތުރުކުރި ބޯޓަކަށް ހަމަލާއެއް އަމާޒުވެފައިވާއިރު، ކަނޑުއޮޅި ހުޅުވިއްޖެނަމަ ދުނިޔޭގެ ބާޒާރުގައި ހަކަތައިގެ އަގުތައް ހަމައަކަށް އެޅޭނެ ކަމަށް އެމެރިކާގެ ޓްރެޜަރީ ސެކްރެޓަރީ ވިދާޅުވި
އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް، 2026 ޖުލައި 30 ގައި ވޮޝިންގޓަން ޑީސީގައި ހުންނަ ވައިޓް ހައުސްގެ ބޭރުގައި މީޑިއާތަކާ ވާހަކަދައްކަވަނީ | ގެޓީ އިމޭޖަސް
އީރާނާއެކު އެއްބަސްވުމަކަށް އާދެވި، ހުރްމުޒް ކަނޑުއޮޅި ބުދަ ދުވަހުގެ ކުރިން އަލުން ހުޅުވާލެވޭނެ ކަމަށް އުންމީދު ކުރައްވާ ކަމަށާއި، މީގެ ސަބަބުން ހަކަތައިގެ ބާޒާރުގައި އަގުތައް ހަމައަކަށް އެޅިގެންދާނެ ކަމަށް އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވެއްޖެ އެވެ.
އަންގާރަ ދުވަހު ސީ.އެން.ބީ.ސީ އަށް ދެއްވި އިންޓަވިއުއެއްގައި ބެސެންޓް ވިދާޅުވީ، އެމެރިކާއިން އީރާނާއެކު މަޝްވަރާތައް ކުރަމުންދާ ކަމަށެވެ. އަދި މިއަދު ނުވަތަ މާދަމާގެ ވަގުތެއްގައި އެއްބަސްވުމަކަށް އާދެވި، ހުރްމުޒް ކަނޑުއޮޅި ހުޅުވާލައި، މިހާރު ހިނގަމުންދާ ހަމަނުޖެހުންތަކަށް ހައްލެއް ލިބި އާންމު ހާލަތަކަށް ރުޖޫއަވުމުގެ ފުރުސަތު އެބައޮތް ކަމަށް އޭނާ ފާހަގަކުރެއްވި އެވެ.
މި އެއްބަސްވުމުގެ ދަށުން، ކަނޑުއޮޅި ބޭނުންކުރާ އުޅަނދުފަހަރުގެ އަތުން އީރާނަށް ފީއެއް ނެގުމުގެ ފުރުސަތު އޮންނާނެތޯ ސުވާލުކުރުމުން ބެސެންޓް ވިދާޅުވީ، އޭނާ ގަބޫލުކުރައްވާ ގޮތުގައި އެއްބަސްވުމުގެ ދަށުން އުޅަނދުފަހަރަށް މިނިވަންކަމާއެކު ދަތުރުފަތުރު ކުރުމުގެ ފުރުސަތު ލިބިގެންދާނެ ކަމަށެވެ.
ބެސެންޓްގެ މި ވާހަކަތަކަކީ އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ދެއްކެވި ވާހަކަފުޅުތަކާ އެއްގޮތް ވާހަކަތަކެކެވެ. އީރާނަށް ވަރުގަދަ އަސްކަރީ ހަމަލާއެއް ދޭނެ ކަމަށް ވިދާޅުވެ ކުރިން ދެއްވި އިންޒާރުތައް އަނބުރާ ގެންދެވުމަށްފަހު، ޓްރަމްޕް ވިދާޅުވީ މަދު ގަޑިއިރުތަކެއްގެ ތެރޭގައި އެ ކަނޑުއޮޅި އަލުން ހުޅުވާލެވިދާނެ ކަމަށެވެ.
ނަމަވެސް، ވޮޝިންގޓަނާއެކު އެއްވެސް މަޝްވަރާއެއް ކުރިއަށް ނުދާ ކަމަށް ބުނެ އީރާނުގެ ފޮރިން މިނިސްޓްރީން ވަނީ އެ ވާހަކަތައް ދޮގުކޮށްފަ އެވެ. އަދި އަންގާރަ ދުވަހު، އެމެރިކާއާއި އީރާނުގެ މެދުގައި ނުތަނަވަސްކަން ބޮޑުވެފައިވާ ހުރްމުޒް ކަނޑުއޮޅިން ދަތުރުކުރި މުދާ އުފުލާ ބޯޓަކަށް، ކޮން އެއްޗެއްކަން ނޭނގޭ ހަމަލާއެއް ވަނީ އަމާޒުވެފަ އެވެ.
ހުރްމުޒް ކަނޑުއޮޅި ހުޅުވުމާ ގުޅޭގޮތުން އީރާނާއެކު އެއްބަސްވުމަކަށް އާދެވިއްޖެނަމަ، ހަކަތައިގެ އަގުތަކަށް އަންނާނެ ހެޔޮ ބަދަލާ މެދު ބެސެންޓް ހުންނެވީ އުންމީދާއެކުގަ އެވެ. އޭނާ ވިދާޅުވި ގޮތުގައި މިހާރުވެސް އެ ސަރަހައްދުން ބޭރަށް ނުދެވި ސަތޭކައަށްވުރެ ގިނަ އުޅަނދުފަހަރު ވަނީ މަޑުކޮށްގެންނެވެ.
ވޭތުވެދިޔަ މަދު ދުވަސްތަކުގައި އެ ސަރަހައްދުގެ ހާލަތު ނުރައްކާތެރިކޮށް އޮތް ނަމަވެސް، މިހާރުވެސް ބައެއް އުޅަނދުފަހަރު އެ ސަރަހައްދުން ނުކުންނަމުންދާކަން ފާހަގަކުރެވޭ ކަމަށް ބެސެންޓް ވިދާޅުވި އެވެ.
އޭނާ އިތުރަށް ވިދާޅުވީ، ހަކަތައިގެ އަގުތައް އަލުން ދަށްވެ ހަމައަކަށް އެޅޭނެ ކަމަށް ބެލެވޭ ކަމަށާއި، މިއީ މުޅި ދުނިޔެއަށްވެސް ލިބިގެންދާނެ ވަރަށް ބޮޑު ފަސޭހައަކަށް ވާނެ ކަމަށެވެ.
