އީރާނު ހަނގުރާމައަށް ބޭނުންވާ އެމެރިކާގެ ހަތިޔާރު މަދުވި މައްސަލައިގައި އޮޅުވާލިކަމަށް ވިދާޅުވެ ޓްރަމްޕް ވަރަށް ބޮޑަށް ކޯފާވެ ހަނގުރާމަ އާ ބެހޭ ވަޒީރުއާ ކުރިމަތިލައްވައިފި

އީރާނުން ދެމުންގެންދާ ރައްދު ހަމަލާތަކުގެ ކުރިމަތީގައި އެމެރިކާގެ އަސްކަރީ ބާރުތައް ތަކުރާރުކޮށް ނާކާމިޔާބުވަމުންދާތީ، އެމެރިކާގެ ރައީސް ޑޮނަލްޑް ޓްރަމްޕް ނުހަނު ބޮޑަށް ކަންބޮޑުވުން ފާޅުކުރައްވައި، އެމެރިކާގެ ހަނގުރާމައާ ބެހޭ ވަޒީރު (ސެކްރެޓަރީ އޮފް ވޯ) ޕީޓް ހެގްސެތާ ސުވާލު ކުރިމަތިކުރައްވައިފި ކަމަށް ރިޕޯޓުތައް ބުނެފި އެވެ. މިގޮތުން އެމެރިކާގެ އަސްކަރިއްޔާގައި ބޭނުންކުރާ މުހިންމު ހަތިޔާރުތައް މަދުވަމުންދާ މައްސަލައިގައި ޓްރަމްޕް ވަނީ ވަރަށް ބޮޑަށް ކޯފާވެ ހެގްސެތާ ކުރިމަތިލައްވާފަ އެވެ.

ވޮޝިންޓަން ޕޯސްޓުން ބުދަ ދުވަހު ޝާއިއުކުރި ރިޕޯޓެއްގައިވާ ގޮތުން، މި ކުރިމަތިލުން ހިނގާފައިވަނީ މިދިޔަ ހުކުރު ދުވަހު ކޭމްޕް ޑޭވިޑްގަ އެވެ. ދުރު ރާސްތާގެ ގައިޑެޑް މިސައިލާއި ވައިގެ ދިފާއީ ނިޒާމުތަކުގެ އިންޓަރސެޕްޓަރުތައް އެމެރިކާގައި މަދުވަމުންދާ ދަނޑިވަޅެއްގައި، އެމެރިކާގެ އަސްކަރީ ގާބިލުކަމާ ގުޅޭގޮތުން ހަގީގަތާ ހިލާފު މައުލޫމާތުތަކެއް ދީފައިވަނީ ކީއްވެގެންތޯ ވިދާޅުވެ، ޓްރަމްޕް ވަނީ ހެގްސެތުގެ ކިބައިން ޖަވާބަކަށް އެދިވަޑައިގެންފަ އެވެ.

ހަތިޔާރު މަދުވުމުގެ ސަބަބުން އެމެރިކާގެ އަސްކަރީ ފިޔަވަޅުތައް އެޅުމަށް ވަނީ ހުރަސްތަކެއް ކުރިމަތިވެފަ އެވެ. ވަކިން ހާއްސަކޮށް، އީރާނުގެ ހަމަލާތަކުން އެމެރިކާގެ ސިފައިން ރައްކާތެރިކުރުމަށް ބޭނުންވާ "ޓާމިނަލް ހައި އެލްޓިޓިއުޑް އޭރިއާ ޑިފެންސް" (ތާޑް) ސިސްޓަމްތައް އެމެރިކާގައި ވަނީ ވަރަށް ބޮޑަށް މަދުވެފަ އެވެ.

މި މައްސަލައާ ގުޅޭ މައުލޫމާތު އެނގޭ ދެ ފަރާތަކާ ހަވާލާދީ ވޮޝިންޓަން ޕޯސްޓުން ރިޕޯޓުކޮށްފައިވާ ގޮތުގައި، ކެބިނެޓް ބައްދަލުވުމެއްގެ ތެރޭގައި ޓްރަމްޕްގެ މި ކަންބޮޑުވުންތައް ވަނީ ވަރަށް ބޮޑަށް ގޮސްފަ އެވެ.

އީރާނާ ދެކޮޅަށް އަސްކަރީ ފިޔަވަޅު އެޅުމުގެ ފުރުސަތުތައް ހަނިވެގެންދާ މިންވަރަށް ހަތިޔާރު މަދުވެފައިވާއިރު، އެކަމާ ގުޅޭގޮތުން އޮޅުވާލައި މައުލޫމާތު ދީފައިވަނީ ކީއްވެގެންތޯ ވިދާޅުވެ ޓްރަމްޕް ވަނީ ވަރަށް ބޮޑަށް ކޯފާވެފައި ކަމަށް އެ ނޫހަށް މައުލޫމާތު ދިން ފަރާތްތަކުން ބުނެފައިވެ އެވެ.

މީގެ އިތުރުން، ހަތިޔާރު މަދުވުމުގެ މައްސަލަ އޮތީ ހައްލުކުރެވިފައި ކަމަށް ގަބޫލުކުރެއްވި ކަމަށް ޓްރަމްޕް، ހެގްސެތު ގާތު ވިދާޅުވި ކަމަށްވެސް އެ ފަރާތްތަކުން ބުނެ އެވެ.

މި މައްސަލައިގައި ހެގްސެތު ވިދާޅުވެފައިވަނީ، ހަތިޔާރު މަދުވުމާއި އެކަމުގެ މައުލޫމާތު އެންމެ ފުރިހަމައަށް ހިއްސާނުކުރެވުމުގެ ޒިންމާ އުފުލަންޖެހޭނީ ހަނގުރާމައާ ބެހޭ ވުޒާރާގެ ނައިބު ސްޓީވަން ފެއިންބާގް ކަމަށެވެ.

ނަމަވެސް، ވައިޓް ހައުސްއިން ވަނީ މިފަދަ ކުރިމަތިލުމެއް ހިނގިކަމަށް ބުނާ ވާހަކަތައް ވަރަށް ބޮޑަށް ދޮގުކޮށްފަ އެވެ.

ޕްރެސް ސެކްރެޓަރީ ކެރޮލިން ލީވިޓް ވޮޝިންޓަން ޕޯސްޓަށް ވިދާޅުވީ، އެ ރިޕޯޓަކީ ދޮގު ރިޕޯޓެއް ކަމަށާއި، ޓްރަމްޕާއި ހެގްސެތާ ދެމެދު އެއްވެސް ހިޔާލުތަފާތުވުމެއް ހިނގާފައި ނުވާ ކަމަށެވެ.

އީރާނުގެ ހަމަލާތައް އެ ސަރަހައްދުގައި ތިބި އެމެރިކާގެ ސިފައިންނަށާއި މަރުކަޒުތަކަށް އަމާޒުވަމުންދާއިރު، "ތާޑް" (THAAD) ސިސްޓަމްތައް މަދުވުމަކީ އެމެރިކާގެ އަސްކަރިއްޔާއަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ.

މީގެ އިތުރުން، އީރާނާ ދެކޮޅަށް އިތުރު ބޮޑެތި ހަމަލާތަކެއް ދިނުމަށް ޓްރަމްޕް ފަސްޖެހިވަޑައިގަންނަވާ އެއް ސަބަބަކީވެސް މި ހަތިޔާރުތައް މަދުވުން ކަމަށް ރިޕޯޓުތައް ބުނެ އެވެ.

ނިމިދިޔަ މަހުގެ ފަހުކޮޅު، އެމެރިކާގެ ތަހުގީގީ ނޫހެއް ކަމަށްވާ "ދަ އިންޓަރސެޕްޓް" އިން އެމެރިކާގެ އޮފިޝަލަކާ ހަވާލާދީ ބުނެފައިވަނީ، އެޓޭކް ޑްރޯންތަކާއި ކުރިއަރާފައިވާ ބެލިސްޓިކް މިސައިލްތައް ބޭނުންކޮށްގެން މުޅި ހުޅަނގު އޭޝިއާގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދިނުމުގެ ގާބިލުކަން އީރާނުން އިތުރުކޮށްފައިވާ ކަމަށެވެ.

އެ ނޫހުން ފާހަގަކޮށްފައިވާ ގޮތުގައި، ޖުލައި މަހުގެ 9 ވަނަ ދުވަހުން ފެށިގެން އީރާނުން ވަނީ އެ ސަރަހައްދުގެ އެކި ހިސާބުތަކުގައި ހުރި އެމެރިކާގެ މަދުވެގެން 9 އަސްކަރީ މަރުކަޒަކަށް ރައްދު ހަމަލާދީފައެވެ. ނަން ހާމަނުކުރުމަށް އެދި މައުލޫމާތު ދިން އޮފިޝަލަކު ވިދާޅުވި ގޮތުގައި، މީގެ ތެރެއިން ބައެއް މަރުކަޒުތަކަށް ވަނީ "ބޮޑެތި ގެއްލުންތަކެއް" ލިބިފަ އެވެ.