ޓްރަމްޕްގެ ވަރުގަދަ އިންޒާރުތަކެއް އީރާން އަށް، "ކުރިއަށް އަދި އޮތީ!"
5 އޯގަސްޓު 2026 | ބުދަ 05:21ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑުއޮޅިއާ ގުޅޭ ގޮތުން ވާހަކަފުޅު ދައްކަވަމުން ޓްރަމްޕް ވިދާޅުވީ، ވަރަށް އަވަހަށް އެ ސަރަހައްދު ހުޅުވާލާނެ ކަމަށް. އަދި އެކަން އެގޮތަށް ނުވެއްޖެ ނަމަ، އީރާން އަށް ވަރުގަދަ ހަމަލާތަކެއް ދޭނެ ކަމަށާއި، އެ ހަމަލާތަކަށް ފަހު ކަނޑުއޮޅި ހުޅުވިގެން ދާނެ ކަމަށް ވެސް ޓްރަމްޕް ވިދާޅުވި
އެމެރިކާާގެ ރައީސް ޑޮނަލްޑް ޓްރަމްޕް | ގެޓީ އިމޭޖަސް
އިރާން އާއެކު ކުރިއަށްދާ މަޝްވަރާތައް ނާކާމިޔާބުވެ، ހުރްމުޒް ކަނޑުއޮޅި ބަންދުކޮށްފައި ބާއްވާ ނަމަ، އީރާން އަށް ވަރުގަދަ ހަމަލާތަކެއް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.
ޓްރަމްޕް ވިދާޅުވީ އިރާން އަށް ދުވަހަކު ވެސް ނިއުކްލިއަރ ހަތިޔާރެއް އުފެއްދުމުގެ ފުރުސަތު ނުދެއްވާނެ ކަމަށާއި، އެކަން މިހާރު ވެސް އޮތީ އެމަގުން ކަމަށް ވިޔަސް، ކުރިއަށް އޮތް ތަނުގައި އެކަން ރަސްމީ އުސޫލަކަށް ވެގެންދާނެ ކަމަށެވެ.
ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑުއޮޅިއާ ގުޅޭ ގޮތުން ވާހަކަފުޅު ދައްކަވަމުން ޓްރަމްޕް ވިދާޅުވީ، ވަރަށް އަވަހަށް އެ ސަރަހައްދު ހުޅުވާލާނެ ކަމަށެވެ. އަދި އެކަން އެގޮތަށް ނުވެއްޖެ ނަމަ، އީރާން އަށް ވަރުގަދަ ހަމަލާތަކެއް ދޭނެ ކަމަށާއި، އެ ހަމަލާތަކަށް ފަހު ކަނޑުއޮޅި ހުޅުވިގެން ދާނެ ކަމަށް ވެސް ޓްރަމްޕް ވިދާޅުވި އެވެ.
އެއާ އެކު ޓްރަމްޕް ވަނީ އީރާން އިން މަޝްވަރާގެ މޭޒަށް އައީ އެމެރިކާ އިން އަޅަމުން ގެންދާ ހަރުކަށި ފިޔަވަޅުތަކުގެ ސަބަބުން ކަމަށް ވެސް ވިދާޅުވެފައި އެވެ.
އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަފުޅުގެ ތެރެއިން
މީގެ ކުރިން އީރާން އަށް ދޭން އުޅުނު ހަމަލާތަކާ ގުޅޭ ގޮތުން ވާހަކަފުޅު ދައްކަވަމުން ޓްރަމްޕް ވިދާޅުވީ، އެއީ ދެ ވަނަ ބޮޑު ހަނގުރާމަ އަށް ފަހު ދެވޭނެ އެންމެ ވަރުގަދަ ހަމަލާއަށް ވާނެ ކަމަށެވެ. ނަމަވެސް އެ ހަމަލާ ދޭން އުޅެނިކޮށް އީރާންގެ ފަރާތުން ވަރަށް އަދަބުވެރިކަމާއެކު ގުޅައި، މަޝްވަރާ ކުރުމަށް އެދުނު ކަމަށް ޓްރަމްޕް ހާމަކުރެއްވި އެވެ. އެހެންކަމުން އެ ފުރުސަތު ދެއްވީ މި މައްސަލަ އަށް ދާއިމީ ހައްލެއް ހޯދުމުގެ ނިޔަތުގައި ކަމަށް ވެސް އޭނާ ވިދާޅުވި އެވެ.
އީރާން އިން އަނެއްކާ ވެސް މަޝްވަރާތަކުން ވަކިވެއްޖެ ނަމަ، އެ ގައުމަށް ވަރަށް ނުރައްކާތެރި ހަމަލާތަކެއް ކުރިމަތިވާނެ ކަމުގެ އިންޒާރު ޓްރަމްޕް ވަނީ ތަކުރާރުކޮށް ދެއްވައިފަ އެވެ. އެމެރިކާ އިން މިހާރު ވެސް އީރާން އަށް ބޮޑެތި ގެއްލުންތަކެއް ދީފައިވާކަން ފާހަގަ ކުރައްވައި ޓްރަމްޕް ވިދާޅުވީ، އެންމެ ވަރުގަދަ ހަމަލާތައް އަދި ކުރިއަށް އޮތީ ކަމަށެވެ. ނަމަވެސް އެފަދަ ބާރެއް ބޭނުން ކުރަން ނުޖެހި މައްސަލަ ހައްލު ވާނެ ކަމަށް އުންމީދު ކުރައްވާ ކަމަށް ވެސް ޓްރަމްޕް ވަނީ ވިދާޅުވެފައި އެވެ.
މަސްދަރު: އަލް ޖަޒީރާ
