ޓްރަމްޕް މިފަހަރު ކުރެއްވީ އީރާން އަށް ތައުރީފު!

އީރާން އާއެކު ކުރިއަށްގެންދާ މަޝްވަރާތަކަކީ ވަރަށް ކާމިޔާބު މަޝްވަރާތަކެއް ކަމަށް ސިފަ ކުރައްވައި، އެމެރިކާގެ ރައީސް ޑޮނަލްޑް ޓްރަމްޕް އަނެއްކާ ވެސް އެ ޤައުމަށް ތައުރީފު ކުރައްވައިފި އެވެ. 

އީރާން އާއެކު ކުރަމުން އަންނަ ހަނގުރާމަ ހުއްޓާލުމާ ގުޅޭ ގޮތުން ކުރިއަށްދާ މަޝްވަރާތަކުގެ ތަފްސީލުތަކަށް ވަޑައިނުގެން، ޓްރަމްޕް ވިދާޅުވީ އެ މަޝްވަރާތައް ކުރިއަށް ދަނީ ވަރަށް ރަނގަޅަށް ކަމަށް އޭނާ އަށް މައުލޫމާތު ލިބިވަޑައިގެންފައިވާ ކަމަށެވެ. 

ފޮކްސް ފައިވްގެ ލަސްވޭގަސްގެ ނޫސްވެރިޔާ ޓޮމް ޑޫރިއަން އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާން އިން ބޭނުންވީ މަޝްވަރާ ކުރަން ކަމަށާއި، މިހާރު އެ މަސައްކަތް ވަރަށް އުންމީދީ ގޮތެއްގައި ކުރިއަށްދާ ކަމަށެވެ. ބުދަ ދުވަހުގެ ރޭ އާންމު ކުރި މި އިންޓަވިޔުގައި ޓްރަމްޕް ވަނީ، އިންސާނުން މަރައި، ހުރިހާ ތަނެއް ސުންނާފަތި ކުރުމަަކީ އޭނާ ބޭނުންފުޅުވާ ގޮތެއް ނޫން ކަމަށް ވިދާޅުވެފައި އެވެ. 

ނަމަވެސް، މަޝްވަރާތައް ފެށުމުގެ ކުރިން މަސްރަހު އޮތީ އެފަދަ ނުރައްކާތެރި މިސްރާބަކަށް ކަމަށް ޓްރަމްޕް ފާހަގަ ކުރެއްވި އެވެ. މީގެ ކުރިން ވެސް ޓްރަމްޕް ވަނީ، ގިނަ ބަޔަކު މަރުވެ، އެތައް ބަޔަކަށް ގެއްލުންވުމަކީ އޭނާ ބޭނުންފުޅުވާ ގޮތް ނޫން ކަމަށް ވިދާޅުވެފައި އެވެ. 

އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމަ އަށް ހަ މަސް ދުވަސް ވެފައިވާއިރު، ދާއިމީ ސުލްހައަކަށް އައުމަށް ދެ ފަރާތުން ކުރާ މަސައްކަތްތަކުން އަދި އެއްވެސް ނަތީޖާއެއް ފެނިފައި ނުވެ އެވެ. އެހެން ނަމަވެސް، ހަނގުރާމަ ފެށުމާ އެކު އީރާން އިން ބަންދު ކޮށްފައިވާ ހުރްމުޒް ކަނޑު އޮޅި ހުޅުވުމުގެ އެއްބަސްވުމާ ގާތަށް އާދެވިފައިވާ ކަމަށް ޓްރަމްޕް ވަނީ ވިދާޅުވެފައި އެވެ. 

ލަސްވޭގަސްގައި ބޭއްވި އިތުރު ހަރަކާތެއްގައި ވާހަކަ ދައްކަވަމުން ޓްރަމްޕް ވިދާޅުވީ، ދެ ވަނަ ބޮޑު ހަނގުރާމަ އަށް ފަހު ދޭނެ އެންމެ ވަރުގަދަ ހަމަލާ އީރާން އަށް ދިނުމަށް އެމެރިކާ އޮތީ ތައްޔާރުވެފައި ކަމަށެވެ. ނަމަވެސް، އެ ހަމަލާ ދިނުމުގެ ކުރިން އީރާން އިން ގުޅި ކަމަށާއި، ހަމަލާ ނުދިނުމަށާއި މަޝްވަރާ ކުރުމަށް އެ ޤައުމުން އެދުނު ކަމަށް ޓްރަމްޕް ފާހަގަ ކުރެއްވި އެވެ. އެއާ އެކު ޓްރަމްޕް ވިދާޅުވީ ފާއިތުވި މަސްތަކުގައި އީރާން އަށް ވަރުގަދަ ހަމަލާތަކެއް ދީފައިވާ ކަމަށެވެ. 

މީގެ ކުރިން އެކި ފަހަރު މަތިން ޓްރަމްޕް ވަނީ އީރާން އަށް ދޭން ރޭވި ހަމަލާތައް ކެންސަލް ކުރެއްވި ކަމަށް ވިދާޅުވެފައި އެވެ. އަދި އެއީ އީރާން އިން މަޝްވަރާ ކުރަން ބޭނުންވާތީ، މަޝްވަރާތަކަށް ފުރުސަތު ދިނުމުގެ ގޮތުން ނިންމެވި ނިންމުމެއް ކަމަށް ވެސް ޓްރަމްޕް ވިދާޅުވެފައިވެ އެވެ.