އީރާން ހަނގުރާމައިން މެދުއިރުމަތީގެ ހާލަތު އިތުރަށް ގޯސްވާނެކަމަށް އެމެރިކާ ރައްޔިތުން ގަބޫލުކުރޭ: ސާވޭ

އީރާނާއި އެމެރިކާއާ ދެމެދު ހިނގަމުންދާ ހަނގުރާމައަށް ފަސް މަސް ފުރިފައިވާއިރު، މި ހަނގުރާމައިގެ ސަބަބުން މެދުއިރުމަތީގެ މަސްރަހު އިތުރަށް ގޯސްވެ، ހަމަނުޖެހުމުގެ ތެރެއަށް ވެއްޓިގެންދާނެ ކަމަށް ގަބޫލުކުރާ އެމެރިކާ ރައްޔިތުންގެ އަދަދު، މިކަމުގެ ސަބަބުން ސަރަހައްދަށް ހަމަޖެހުން އަންނާނެ ކަމަށް ގަބޫލުކުރާ މީހުންނަށްވުރެ ތިން ގުނަ އިތުރުކަމަށް ރޮއިޓާސް/އިޕްސޯސް އިން ކުރި އާ ހިޔާލު ހޯދުމުގެ ސާވޭއަކުން ދައްކައިފި އެވެ.

ހަ ދުވަހުގެ މުއްދަތަށް ކުރިއަށްގެންދިޔަ މި ސާވޭ ނިންމާލާފައިވަނީ މިދިޔަ ހޯމަ ދުވަހު އެވެ. މި ސާވޭގެ ނަތީޖާ އާންމުކޮށްފައި މިވަނީ، އީރާނަށް "ވަރުގަދަ ހަމަލާތަކެއް" ދޭނެ ކަމަށް ވިދާޅުވެ ރިޕަބްލިކަން ޕާޓީއަށް ނިސްބަތްވާ ރައީސް ޑޮނަލްޑް ޓްރަމްޕް ދެއްވަމުން ގެންދެވި އިންޒާރުތަކާ ފަހަތަށް ޖެހިވަޑައިގެންފައިވާ ދަނޑިވަޅެއްގަ އެވެ. މީގެ ކުރިން ޓްރަމްޕް ވިދާޅުވަމުން ގެންދެވީ މި ހަނގުރާމައިގައި ވަރަށް އަވަސް ކާމިޔާބީއެއް ލިބޭނެ ކަމަށެވެ. ނަމަވެސް، މިހާރު މި ހަނގުރާމައާ މެދު ވަނީ ނުތަނަވަސްކަމާއި އޮޅުންބޮޅުންތަކެއް އުފެދިފަ އެވެ.

މި ސާވޭގައި ބައިވެރިވި މީހުންގެ ތެރެއިން 50 އިންސައްތަ މީހުން ގަބޫލުކުރާ ގޮތުގައި، އީރާނާ ދެކޮޅަށް އެމެރިކާއިން ކުރިއަށްގެންދާ އަސްކަރީ ހަރަކާތްތަކުގެ ސަބަބުން ކުރިއަށް އޮތް އަހަރު ދުވަހުގެ ތެރޭގައި މެދުއިރުމަތީގެ ހަމަޖެހުން ގެއްލިގެންދާނެ އެވެ. މިއީ މި ހަނގުރާމައިގެ ސަބަބުން ސަރަހައްދަށް ހަމަޖެހުން އަންނާނެ ކަމަށް ބުނި 17 އިންސައްތަ މީހުންނާ އަޅާބަލާއިރު ގާތްގަނޑަކަށް ތިން ގުނަ އިތުރު އަދަދެކެވެ. މީގެ އިތުރުން، ސަރަހައްދުގެ ހަމަޖެހުމަށް އެއްވެސް ބަދަލެއް ނާންނާނެ ކަމަށް 16 އިންސައްތަ މީހުން ބުނެފައިވާއިރު، ބާކީ ތިބި 17 އިންސައްތަ މީހުން ބުނެފައިވަނީ އެކަމާ މެދު ވަކި އެއްޗެއް ބުނަން ނޭނގޭ ކަމަށެވެ.