އީރާނުގެ ޕައިލެޓުން ޖީޕީއެސް ނެތި އެމެރިކާގެ މަރުކަޒުތަކަށް ބޮން އެޅި

އީރާނުގެ ޕައިލެޓުން އެމެރިކާގެ އަސްކަރީ މަރުކަޒުތަކަށް ބޮން އެޅީ ޖީޕީއެސް ނުވަތަ އައިއެންއެސްގެ އެހީތެރިކަމާ ނުލައި ކަމަށް އީރާނުގެ ވައިގެ ސިފައިންގެ އިސް ކޮމާންޑަރު ވިދާޅުވެއްޖެ އެވެ.

އީރާނުގެ ވައިގެ ސިފައިންގެ އިސް ކޮމާންޑަރަކު ވިދާޅުވި ގޮތުގައި، ހުޅަނގު އޭޝިއާގައި ހުންނަ އެމެރިކާގެ އަސްކަރީ މަރުކަޒުތަކަށް އަމާޒުކޮށް ހިންގި ނުރައްކާތެރި އޮޕަރޭޝަންތަކުގައި، އީރާނުގެ ޕައިލެޓުން ގްލޯބަލް ޕޮޒިޝަނިންގ ސިސްޓަމް (ޖީޕީއެސް) އާއި އިނާޝިއަލް ނެވިގޭޝަން ސިސްޓަމް (އައިއެންއެސް) ހިމެނޭހެން އެއްވެސް ނެވިގޭޝަން ނިޒާމެއް ބޭނުންކޮށްފައެއް ނުވެ އެވެ.

އިސްލާމިކް ރިޕަބްލިކް އޮފް އީރާން އެއަރ ފޯސް (އައިއާރްއައިއޭއެފް) ގެ ޑެޕިއުޓީ ކޯޑިނޭޓަރު ބްރިގޭޑިއަރ ޖެނެރަލް މަސްއޫދު ޖަޢުފަރީ މިހެން ވިދާޅުވީ، ގަތަރުގައި ހުންނަ އެމެރިކާގެ އަލް-އުދައިދު އެއަރ ބޭސްއަށް އަމާޒުކޮށް މިދިޔަ މާރިޗު މަހުގެ 2 ވަނަ ދުވަހު ދިން ކާމިޔާބު ހަމަލާއާ ގުޅޭގޮތުން ބުރާސްފަތި ދުވަހު ވާހަކަދައްކަވަމުންނެވެ. އެމެރިކާގެ ޓެރަރިސްޓް 10،000 ސިފައިން އާންމުކޮށް ތިބޭ އެ މަރުކަޒަށް ދިން މި ހަމަލާއަކީ ވަރަށް ކާމިޔާބު އޮޕަރޭޝަނެއްގެ ގޮތުގައި އޭނާ ސިފަކުރެއްވި އެވެ.

މީގެ އިތުރުން، ހަމަ މާރިޗު މަހުގެ 2 ވަނަ ދުވަހު އީރާނުގެ ވައިގެ ސިފައިންގެ އެފް-5 މަރުކާގެ ފައިޓަރު ޖެޓުތަކުން ވަނީ ކުވެއިތުގައި އެމެރިކާއިން ހިންގާ އަލް-އަދީރީ މަރުކަޒަށް ވެސް ހަމަލާދީފަ އެވެ.

ޖަޢުފަރީ ވިދާޅުވި ގޮތުގައި އީރާނުގެ ސިފައިން މިހާރު ތިބީ ދަތިކުރުމުގެ ފިޔަވަޅުތަކުގެ ތެރޭގައި މަސައްކަތްކުރަން އާދަވެފަ އެވެ. އަދި އީރާނުގެ ވައިގެ ސިފައިންގެ ޕައިލެޓުން މިހާރު ވަނީ ޖީޕީއެސް ނުވަތަ އައިއެންއެސްގެ އެހީއާ ނުލައި، ހަމައެކަނި ޗާޓު ބަލައިގެންނާއި އާދައިގެ ނެވިގޭޝަން އުކުޅުތައް ބޭނުންކޮށްގެން މިޝަންތައް ފުރިހަމަކުރަން ދަސްކޮށްފައި ކަމަށް އޭނާ ވިދާޅުވި އެވެ.

"ފަހަރުގައި އަހަރެމެންނަށް ލިބުނު އެންމެ ބޮޑު ކުރިއެރުމަކީ، މަތިންދާބޯޓުތަކުން އެއްވެސް ކަހަލަ ސިގްނަލެއް، އެއީ ރޭޑިއޯ މުއާސަލާތެއް ނުވަތަ އިލެކްޓްރޯނިކް އެހެން އެމިޝަނެއް ވިޔަސް، ބޭރުނުކޮށް އޮޕަރޭޝަން ކުރިއަށް ގެންދިއުން،" ޖަޢުފަރީ ވިދާޅުވި އެވެ.

ޝީރާޒްގައި ހުންނަ މާޓިއަރ ދައުރާން އެއަރ ބޭސްއިން ފުރައިގެން ގޮސް އަލް-އުދައިދު އެއަރ ބޭސްއަށް ހަމަލާދިން މިޝަންގައި ބައިވެރިވީ ސޫ-24 މަރުކާގެ ފައިޓަރު ޖެޓުތަކުގައި ތިބި ހިތްވަރުގަދަ ހަތަރު ޕައިލެޓުންނެވެ.

މި އޮޕަރޭޝަންގައި ބައިވެރިވި ޕައިލެޓުންގެ ތެރެއިން ބްރިގޭޑިއަރ ޖެނެރަލް މަޖީދު ކާޒިމީގެ ހަށިގަނޑު ދާދި ފަހުން ގައުމަށް ގެނެވުނު ނަމަވެސް، އަނެއް ތިން ޕައިލެޓުންނަށް ވީނުވީއެއް އަދިވެސް ނޭނގެ އެވެ.

އެމެރިކާ އާއި އިސްރާއީލުން އީރާނާ ދެކޮޅަށް ޣައިރު ގާނޫނީ އުދުވާނެއް ފެށީ ފެބްރުއަރީ މަހުގެ 28 ވަނަ ދުވަހު އެވެ. އެ އުދުވާން ފެށީ އިސްލާމީ އިންގިލާބުގެ ލީޑަރު ސައްޔިދު އަލީ ޚާމަނާއީ އާއި އަސްކަރިއްޔާގެ އިސް ކޮމާންޑަރުން އަވަހާރަކޮށްލައިގެންނެވެ. މި ޓެރަރިސްޓް ހަމަލާގައި ފާރިސީ ކަނޑުއޮޅީގެ ބައެއް އަރަބި ގައުމުތަކުން ދުޝްމަނުންނަށް އެހީތެރިކަން ފޯރުކޮށްދީފައިވެ އެވެ.

އެހެންނަމަވެސް، އީރާނުން ދެއްކި ހިތްވަރުގަދަ ސާބިތުކަމާއި، ކާމިޔާބު ރައްދު ހަމަލާތަކުގެ އިތުރުން ހުރްމުޒް ކަނޑުއޮޅީގެ މައްޗަށް އޮތް ވަރުގަދަ ބާރުގެ ސަބަބުން، 40 ދުވަސް ފަހުން އޭޕްރިލް 8 ވަނަ ދުވަހު ހަނގުރާމަ ހުއްޓާލުމުގެ އެއްބަސްވުމަކަށް އަންނަން ދުޝްމަނުންނަށް މަޖުބޫރުވި އެވެ.

ތެހެރާނާއި ވޮޝިންޓަނުން ޖޫން 17 ވަނަ ދުވަހު އިސްލާމްއާބާދު މެމޮރެންޑަމް އޮފް އަންޑަސްޓޭންޑިންގގައި ސޮއިކުރި ނަމަވެސް، އެމެރިކާއިން ވަނީ އީރާނަށް ހަމަލާދީ އެ އެއްބަސްވުމާ އަމަލީގޮތުން ޚިލާފުވެފަ އެވެ.

މީގެ ރައްދުގައި އީރާނުގެ ހަތިޔާރު އެޅި ފައުޖުތަކުން ދަނީ ހުޅަނގު އޭޝިއާގެ އެކި ސަރަހައްދުތަކުގައި ހުރި އެމެރިކާގެ އިސްތިރާޖީ އަމާޒުފަތްތަކަށް ވަރުގަދަ ހަމަލާތަކެއް ދެމުންނެވެ.