މޮޅުވެވެން ނެތް، އަދި ބަލިވެވެން ވެސް ނެތް ހަނގުރާމައެއްގައި އެމެރިކާގެ ރައީސް ތާށިވެފައި!

އީރާނާ ދެކޮޅަށް ކުރަމުންދާ ހަނގުރާމައިން ސަލާމަތްވާނެ މަގެއް ޑޮނަލްޑް ޓްރަމްޕަށް ނުފެނިއްޖެ ނަމަ، ތާރީޚުގައި އޭނާގެ ރިޔާސަތު ސިފަވެގެންދާނީ ހަނގުރާމައެއް އިޚްތިޔާރުކުރުމުގެ ސަބަބުން ބޮޑު ގޯހެއް ހެއްދެވި ބޭފުޅެއްގެ ގޮތުގަ އެވެ.

ނަމަވެސް، މިހާތަނަށް އޭނާ ވަނީ ނުރައްކާތެރި އެއް ކަމަކުން ރެކިވަޑައިގެންފަ އެވެ. އެއީ އޭނާގެ ކޮންޓްރޯލުން ނެއްޓޭ މިންވަރަށް މި ހަނގުރާމަ ފުޅާކޮށް ވަރުގަދަކުރުމެވެ.

ތާރީޚުން ފެންނަން އޮތް ގޮތުގައި، ހަނގުރާމައަކުން ސަލާމަތްވާނެ މަގެއް ހޯދުމަށް ނުވަތަ އަމިއްލަ އަބުރާއި އެމެރިކާގެ ގަދަރު ހިފެހެއްޓުމުގެ ނަމުގައި ހަނގުރާމަ ވަރުގަދަކުރާ ރައީސުން، އަމިއްލައަށް ކޮންޓްރޯލް ނުކުރެވޭ ފަދަ ނުރައްކާތެރި ފުންގަނޑަކަށް ވެއްޓިގެންދެ އެވެ. ވިއެޓްނާމް، އިރާގު އަދި އަފްޣާނިސްތާނުގައި ވެސް ކަން ހިނގީ މިފަދައިންނެވެ. ގިނަ ފަހަރަށް އެ ބޭފުޅުން އެކަން ކުރެއްވީ ބޭނުންފުޅުވެގެން ނޫން ނަމަވެސް، އެއީ ކާމިޔާބު ނުކުރެވޭނެ ހަނގުރާމަތަކެއްގެ ގޮތުގައި އޮތީ ކަނޑައެޅިފަ އެވެ.

އީރާނުން އަމާންދިނުމަށް ނުވަތަ ސީރިއަސް މަޝްވަރާތަކެއް ކުރުމަށް ދެކޮޅުހަދަމުންދާތީ، ޓްރަމްޕް މިހާރު ހުންނެވީ ތިން ގޮތަކުން ކުރެ ގޮތެއް އިޚްތިޔާރުކުރަން ޖެހިފައިވާ ހަތަރު އަނގޮޅިއެއްގެ ކަންމަތީގަ އެވެ.

ޑިޕްލޮމެސީ ނުވަތަ ޚާރިޖީ ގުޅުންތައް ފޭލްވަމުންދާ ނަމަ، މިހާތަނަށް ވަކި ނަތީޖާއެއް ނުފެނި ކުރިއަށްދާ ވައިގެ ހަމަލާތަކާއި، ނާޒުކު ސުލްހައިގެ އެއްބަސްވުންތަކާއި، އެމެރިކާ އާއި އީރާނުން ކަނޑުގެ ސަރަހައްދުތައް ބަންދުކޮށްގެން ހިންގާ ހަރަކާތްތައް ނިމުމެއް ނެތި ކުރިއަށް ގެންދަވަން އެމަނިކުފާނު ތައްޔާރު ހެއްޔެވެ؟

ނުވަތަ އަމިއްލައަށް ކަނޑައަޅާފައިވާ އިންތައް ހުރަސްކޮށް، ހަމައެކަނި އަސްކަރީ އަމާޒުތަކުގެ ބަދަލުގައި އީރާނުގެ އާންމު ރައްޔިތުންނާއި އުމްރާނީ ވަސީލަތްތަކަށް ހަމަލާދީ، އެއްގަމު މަގުން ސިފައިން ފޮނުވައިގެން ހަނގުރާމަ އިތުރަށް ވަރުގަދަކުރާނީ ހެއްޔެވެ؟

ތިންވަނަ ގޮތަކީ ވަރަށް ހިތްދަތި ގޮތެކެވެ. އެއީ އޭނާގެ މައިގަނޑު މަގްސަދުތައް ހާސިލްނުވި ނަމަވެސް، ލިބޭ ގެއްލުންތަކަށް ބަލައި، ހަނގުރާމަ ހުއްޓާލާފައި އެނބުރި ދިއުމަކީ އެމެރިކާއަށް އެންމެ ފައިދާހުރި ގޮތް ކަމަށް ގަބޫލުކުރުމެވެ.

މި ކޮންމެ ސުވާލަކަށް އޮތީ ސިޔާސީ ގޮތުންނާއި އަސްކަރީ ގޮތުން ބަލައިގަންނަން އުނދަގޫ ޖަވާބުތަކެކެވެ. މިއީ މޮޅުވެވެން ނެތް، އަދި ބަލިވެވެން ވެސް ނެތް ހަނގުރާމައެއްގައި އޭނާ ތާށިވެފައި ހުރި ސަބަބެވެ. ސީއެންއެންގެ އެކްސްކްލޫސިވް ރިޕޯޓެއްގައިވާ ގޮތުން، އީރާނަށް އަދަބު ދޭނެ އާ ގޮތްތަކެއް ހޯދުމަށް ޕެންޓަގަންއިން އަސްކަރީ މާހިރުންގެ ކިބައިން އެހީތެރިކަމަށް އެދިފައިވުމަކީ އެމެރިކާ މިހާރު އޮތް ދަތި ހާލަތު ހާމަކޮށްދޭ ކަމެކެވެ.

އީރާނުގެ ވެރިކަމުގެ "ބޯބުރިކޮށްލާނެ" ކަމުގެ އިންޒާރު ޓްރަމްޕް ދެއްވުން

އީރާނުން ޓްރަމްޕްގެ އެންމެ ފަހުގެ ހުށަހެޅުމަށް ފުރަގަސްދިނުމާ ގުޅިގެން، އޭނާގެ ހިތްހަމަނުޖެހުންތައް ހޯމަ ދުވަހު "ޓްރުތް ސޯޝަލް" އެކައުންޓުން ވަނީ ފެނިގެން ގޮސްފަ އެވެ. އެއްބަސްވުމަކާ ގާތަށް އާދެވިއްޖެ ކަމަށް ތަކުރާރުކޮށް ވިދާޅުވުމަށްފަހު، ހަފުތާ ބަންދުގައި ދޭން ނިންމި ވަރުގަދަ ހަމަލާތައް އޭނާ ވަނީ މަޑުޖައްސާލާފަ އެވެ.

"އީރާނުގެ ވެރިންނަކީ ގަބޫލުކުރަން ދަތި މިންވަރަށް މަކަރުވެރި ބައެއް،" ޓްރަމްޕް ވިދާޅުވި އެވެ. މިއީ އޭނާގެ މަޖުބޫރުކުރުވުމުގެ ޚާރިޖީ ސިޔާސަތާ މެދު އީރާނުން ކުރާ ޝަކުވާތަކާ ދާދި އެއްގޮތް ވާހަކައެކެވެ. ހޯމަ ދުވަހުގެ މެންދުރު ފަހު ޓްރަމްޕް އަނެއްކާވެސް ވަނީ އިންޒާރުތައް ދޭން ފައްޓަވާފަ އެވެ. އޯވަލް އޮފީހުގައި ހުންނަވައި އޭނާ ވިދާޅުވީ، "މިއީ ރަނގަޅު އެއްބަސްވުމެއްގައި ސޮއިކުރަން އެމީހުންނަށް ލިބޭ އެންމެ ފަހު ފުރުސަތު" ކަމަށެވެ.

ނަމަވެސް، އީރާނުގެ ވެރިކަން ނައްތާލާނެ ނުވަތަ "ބޯބުރިކޮށްލާނެ" ކަމަށް ވިދާޅުވެ ދެއްވި އިންޒާރާއެކު އުފެދޭ ސުވާލަކީ، އީރާނުން އަނެއްކާވެސް އޭނާގެ ބަހަށް އިޖާބަ ނުދީފި ނަމަ ދެން ކުރައްވާނީ ކީއްތޯ އެވެ؟

ޓްރަމްޕް ހަނގުރާމަ އިތުރަށް ފުޅާކުރުމަކީ ނުރައްކާތެރި ކަމެކެވެ. ސަބަބަކީ ބޮން އަޅައިގެން އީރާނު މަޝްވަރާގެ މޭޒަށް ގެނެވިދާނެ ކަމުގެ އެއްވެސް ނިޝާނެއް ފެންނަން ނެތުމެވެ.

އީރާނުގެ ފާލަންތަކާއި، އިންޖީނުގެތަކާއި އެހެނިހެން ވަސީލަތްތަކަށް ހަމަލާދީފި ނަމަ، އީރާނުން ބަދަލުހިފުމުގެ ގޮތުން ގަލްފުގެ ގައުމުތަކުގައި ހުރި އެމެރިކާގެ ބައިވެރިންގެ އެފަދަ ތަންތަނަށް ހަމަލާދީ، ހަނގުރާމައިގެ ސަބަބުން އިގްތިސާދަށް ކުރާ އަސަރު ބޮޑުކުރާނެ އެވެ. ސަރަހައްދީ ލީޑަރުން ވަނީ މިދިޔަ ހަފުތާ ބަންދުގައި ޓްރަމްޕާ މިކަމާ ބެހޭގޮތުން ވާހަކަދައްކަވާފަ އެވެ. "އަޅުގަނޑުމެން ތިބީ ތައްޔާރަށް. އެބޭފުޅުން ގުޅުއްވި. ސައުދީ އަރަބިއްޔާ، ޔޫއޭއީ އަދި ގަތަރުން ވެސް ގުޅުއްވި،" ޓްރަމްޕް ވިދާޅުވި އެވެ.

ތިއަރީ ގޮތުން ބަލާއިރު، ހުރްމުޒް ކަނޑުއޮޅި ބާރުގެ ބޭނުންކޮށްގެން ހުޅުވުމަށް ޓްރަމްޕަށް އެމެރިކާގެ ކަނޑުގެ ސިފައިން ބޭނުންކުރެވިދާނެ އެވެ. ނަމަވެސް މީގެ ސަބަބުން އެމެރިކާގެ މަނަވަރުތަކަށް މިސައިލާއި ޑްރޯން ހަމަލާތަކުގެ ނުރައްކާ ބޮޑުވާނެ އެވެ. އީރާނުގެ ތެޔޮ އެކްސްޕޯޓްކުރާ މަރުކަޒެއް ކަމަށްވާ ޚާރްގް އައިލެންޑަށް ހަމަލާދިނުމަށް ނުވަތަ ކަނޑުއޮޅިން އީރާނުގެ ސިފައިން ފަހަތަށް ޖެއްސުމަށް ހިންގާ އެއްގަމު އޮޕަރޭޝަންތަކަކީ ވަރަށް ގިނަ ބައެއްގެ ލޭ އޮހޮރިގެންދާނެ ކަމެކެވެ.

ވޭތުވެދިޔަ 60 އަހަރުގެ ތާރީޚަށް ބަލާއިރު، ވައިގެ ހަނގުރާމައެއް އެއްގަމު ހަނގުރާމައަކަށް ބަދަލުވުމުން ކުރިމަތިވާ ނުރައްކާ އިންތިހާއަށް ބޮޑުވެ އެވެ. އެމެރިކާގެ ރައްޔިތުންނަށް މިފަދަ ހަނގުރާމަތައް ފެންނަނީ ތަފާތު ގޮތަކަށެވެ. ސިފައިން މަރުވާ މިންވަރު އިތުރުވާ ވަރަކަށް ސިޔާސީ ގޮތުން ކުރަންޖެހޭ ހޭދަ ބޮޑުވެ އެވެ. މިއީ މިޑްޓާމް އިންތިޚާބަށް މަދު ހަފުތާތަކަކަށް ވެފައި ވަނިކޮށް ޓްރަމްޕަށް އުފުއްލޭނެ ބުރައެއް ނޫނެވެ. އަދި ހަނގުރާމައިން ވަކިވާނެ ގޮތެއް ހޯދުމުގެ ތެރޭގައި ސިފައިން މަރުވުމުން، އެމީހުންގެ ގުރުބާނީ ބޭކާރުވެގެން ދިޔަ ނުދިނުމަށްޓަކައި، ހަނގުރާމަ އިތުރަށް ދިގުދަންމަން މަޖުބޫރުވެ އެވެ.

މީގެ ކުރިން ވެސް ގިނަ ރައީސުންނަށް ވަނީ ޓްރަމްޕް މިހާރު ހުންނެވި ފަދަ ނިންމުންތައް ނިންމަންޖެހޭ ހާލަތްތަކާ ކުރިމަތިވެފަ އެވެ. ވިއެޓްނާމް، އިރާގު، އަފްޣާނިސްތާނު އަދި އީރާނުގެ މައްސަލަ ފެށުނު ގޮތް ތަފާތުވި ނަމަވެސް، މި ހުރިހާ ކަމެއް ވެސް ނިމެނީ "އޮތް ހާލަތުގައި ތިބުން، ހަނގުރާމަ ވަރުގަދަކުރުން ނުވަތަ ދޫކޮށްލާފައި ދިއުން" މި ތިން ގޮތުން ކުރެ ގޮތަކަށެވެ.

އަދި އެއްވެސް ރައީސަކީ ހަނގުރާމައަކުން ބަލިވި ބޭފުޅެއްގެ ގޮތުގައި ތާރީޚުގައި ލިޔެވިގެންދާކަށް ބޭނުމެއް ނުވާނެ އެވެ.

ޖޯންސަން އާއި ބުޝް ނުރައްކާތެރި ފުންގަނޑަކަށް ވެއްޓުނު ގޮތް

1965 ވަނަ އަހަރު، ރައީސް ލިންޑަން ބީ. ޖޯންސަން (އެލްބީޖޭ) ވަނީ އަވަހާރަކޮށްލި ރައީސް ޖޯން އެފް. ކެނެޑީގެ ފަރާތުން ވާރުތަވި ވިއެޓްނާމް ހަނގުރާމަ ފުޅާކުރުމާ މެދު ވަރަށް ބޮޑަށް ފިކުރުކުރައްވާފަ އެވެ. "އަޅުގަނޑުމެން މިދަނީ އެމީހުންނަށް ބޮން އަޅަމުން. އެ ހަރުފަތް ގިރާކޮށްފިން،" ޓްރަމްޕްގެ މިހާރުގެ ނިންމުންތަކާ އެއްގޮތްވާ ގޮތަށް، އޭރުގެ ޑިފެންސް ސެކްރެޓަރީ ރޮބަޓް މެކްނަމާރާއަށް ޖޯންސަން ވިދާޅުވި އެވެ. "ބަލިވުމަށްވުރެ ގޯސް ކަމެއް އޮންނާނެ ކަމަކަށް އަޅުގަނޑު ގަބޫލެއް ނުކުރަން. އެކަމަކު މޮޅުވާނެ އެއްވެސް ގޮތެއް ވެސް އަޅުގަނޑަކަށް ނުފެނޭ،" ޖޯންސަން ވިދާޅުވި އެވެ.

އެހެންނަމަވެސް، ޖޯންސަން ވަނީ "އޮޕަރޭޝަން ރޯލިންގ ތަންޑަރ" ކުރިއަށް ގެންދިއުމަށް އަމުރުކުރައްވައި، އުތުރު ވިއެޓްނާމަށް ދޭ ބޮމުގެ ހަމަލާތައް ވަރުގަދަކޮށް، އެތައް ހާސް އެމެރިކާ ސިފައިންނެއް އެ ނުރައްކާތެރި ހަނގުރާމައިގެ ތެރެއަށް ފޮނުއްވާފަ އެވެ. އޭނާ އަޑުއައްސަވަން ޖެހިވަޑައިގަތީ އޭރުގެ އަންޑަރ ސެކްރެޓަރީ އޮފް ސްޓޭޓް ޖޯޖް ބޯލްގެ ވާހަކަފުޅެވެ. ބޯލް ލިޔުއްވި މެމޯއެއްގައިވާ ގޮތުން، އެމެރިކާ ސިފައިން މަރުވާން ފެށުމުން، އެމެރިކާ ތާށިވާނީ "އަނބުރާ އިއާދަނުކުރެވޭ ފަދަ މަރުހަލާއެއްގަ އެވެ." އަދި މަގްސަދު ހާސިލްނުކޮށް ހަނގުރާމަ ހުއްޓާލައިފި ނަމަ، އެއީ "ގައުމީ ފެންވަރުގައި ލިބޭނެ ލަދުވެތިކަމެއް" ކަމަށް އޭނާ ވިދާޅުވި އެވެ.

ކުރިމަތިވާން އޮތް ބޮޑު ނުރައްކާ އޭރުވެސް ލަފާކުރެއްވި ބޯލް ވިދާޅުވީ، ހަނގުރާމަ ކުރިއަށް ގެންދިއުމަށްވުރެ، "ވިސްނުންތެރިކަމާއެކު އެއްބަސްވުމަކަށް ދިއުމަކީ" އެމެރިކާގެ ދުނިޔޭގެ ލީޑަރޝިޕަށް ލިބޭ ގެއްލުން ކުޑަވާނެ ގޮތް ކަމަށެވެ.

މި ހަނގުރާމައިގެ ސަބަބުން ޖޯންސަންގެ ދެވަނަ ދައުރެއްގެ އުންމީދުތައް ފެނަށް ދިޔަ އެވެ. އަދި 1968 ގެ އިންތިޚާބު ކާމިޔާބު ކުރެއްވި ރިޗަޑް ނިކްސަނަށް ޖެހިވަޑައިގަތީ ވިއެޓްނާމް ހަނގުރާމައާ ހަވާލުވާށެވެ. ގިނަ ތާރީޚީ އިލްމުވެރިން ބުނާ ގޮތުގައި، ނިކްސަން އާއި ގައުމީ ސަލާމަތާ ބެހޭ މުޝީރު ހެންރީ ކިސިންޖަރަށް އޭރުވެސް އޮތީ ހަނގުރާމަ ކާމިޔާބު ނުކުރެވޭނެކަން އެނގިފަ އެވެ. ނަމަވެސް އެމީހުން ހަނގުރާމަ ކުރިއަށް ގެންދިޔައީ، އެމެރިކާ ބަލިވިކަމުގެ އިހުސާސް ނުވާނެ ފަދަ ގޮތަކަށް ހަނގުރާމައިން ވަކިވާނެ މަގެއް ހޯދުމަށެވެ.

"ދުނިޔޭގެ އެންމެ ބާރުގަދަ ގައުމު ކަމަށްވާ އެމެރިކާއިން، ނިކަމެތި އަދި އެހީތެރިކަމެއް ނެތް ބައެއްގެ ގޮތުގައި އަމަލުކޮށްފި ނަމަ، މުޅި ދުނިޔޭގެ މިނިވަން ގައުމުތަކަށް ނުރައްކާވާނެ،" 1970 ވަނަ އަހަރުގެ އޭޕްރިލް 30 ގައި ނިކްސަން ގައުމާ މުޚާތަބުކުރައްވައި ވިދާޅުވި އެވެ. އެއީ ހަނގުރާމަ ކެމްބޯޑިއާއަށް ފުޅާކުރަން ނިންމި ނިންމުން ހާމަކުރައްވަމުންނެވެ. ނިކްސަންގެ ރިޔާސަތުގައި 20،000 އަށްވުރެ ގިނަ އެމެރިކާ ސިފައިން ވިއެޓްނާމްގައި މަރުވި އެވެ. އެމެރިކާގެ އެންމެ ފަހުގެ ހަނގުރާމަވެރި ސިފައިން އެ ގައުމުން ފޭބީ 1973 ގައެވެ. އަދި 1975 ގައި ރައީސް ޖެރަލްޑް ފޯޑްގެ ދަށުން އެމެރިކާގެ އެންމެ ފަހު އޮފިޝަލުން ވަނީ އެ ގައުމުން ބާލާފަ އެވެ.

މީގެ 30 އަހަރަށްވުރެ ގިނަ ދުވަސް ފަހުން، ރައީސް ޖޯޖް ޑަބްލިޔު. ބުޝް ވެސް ވަނީ ހަނގުރާމައާ ގުޅޭ ގޮތުން ގައުމާ މުޚާތަބުކުރައްވާފަ އެވެ. ހެދުނު ގޯސްތަކުގެ ޒިންމާ އޭނާ އުފުއްލެވި ނަމަވެސް، 2007 ވަނަ އަހަރު އޭނާ އިންޒާރު ދެއްވީ "އިރާގުގައި ނާކާމިޔާބުވުމަކީ އެމެރިކާއަށް ކުރިމަތިވާނެ ބޮޑު ކާރިސާއެއް" ކަމަށެވެ. އޭނާ ވަނީ އިރާގުގެ ސިފައިންނަށް އެހީވުމަށްޓަކައި އިތުރު އެތައް ހާސް ސިފައިންނެއް ފޮނުވާނެކަން އިއުލާންކުރައްވާފަ އެވެ.

އެ އޮޕަރޭޝަނާ މެދު ތާރީޚު ދިރާސާކުރާ ފަރާތްތަކުން އަދި ވަކި ގޮތެއް ނުނިންމަ އެވެ. ބައެއް ސަރަހައްދުތަކުގައި އެކަން ކާމިޔާބުވި ނަމަވެސް، އެމެރިކާ ސިފައިން އެންމެ ފަހުން އެ ގައުމުން މުޅިން ފޭބިއިރު، އެމީހުންގެ ގުރުބާނީގެ ބަދަލު ލިބުނުތޯ ކުރެވޭ ސުވާލަކީ ވަރަށް ހިތްދަތި ސުވާލެކެވެ.

ރައީސް ބަރަކް އޮބާމާ އިންތިޚާބުވެވަޑައިގަތީ އެމެރިކާގެ "ނިމުމެއް ނެތް ހަނގުރާމަތައް" ހުއްޓާލާނެ ކަމުގެ ވައުދާއެކުގަ އެވެ. ނަމަވެސް ސެޕްޓެމްބަރު 11 ގެ ހަމަލާއަށް އަށް އަހަރު ފަހުން، އޭނާ ވެސް ވަނީ ތާލިބާނުން ހުއްޓުވުމަށާއި އަލްގައިދާ ނައްތާލުމަށްޓަކައި އަފްޣާނިސްތާނަށް އިތުރު ސިފައިން ފޮނުއްވާފަ އެވެ. ކުރީގެ ރައީސުން ބެދުނު މަޅީގައި ނުޖެހުމަށްޓަކައި، 2011 ވަނަ އަހަރުގެ މެދުތެރޭގައި ސިފައިން ބާލަން ފަށާނެ ކަމަށް އޭނާ ވައުދުވެވަޑައިގަތެވެ. ނަމަވެސް ފާޑުކިޔާ ފަރާތްތަކުން ބުނަނީ، ސިފައިން ބާލާނެ ތާރީޚެއް ކަނޑައެޅުމުން، އެމެރިކާގެ ދުޝްމަނުންނަށް އެމެރިކާ ފައިބަންދެން މަޑުކޮށްލުމުގެ ފުރުސަތު ލިބުނު ކަމަށެވެ.

ޓްރަމްޕް ވެރިކަމަށް ވަޑައިގަތީ މިހާރު އޭނާއަށް ކުރިމަތިވެފައިވާ ފަދަ ހަނގުރާމަތަކަށް ވަރަށް ބޮޑަށް ފާޑުވިދާޅުވަމުން

އެމެރިކާގެ މި ޒަމާނުގެ ހަނގުރާމަތަކަށް ޓްރަމްޕްގެ ވަރުގަދަ ފާޑުކިޔުންތަކަކީ 2016 ވަނަ އަހަރުގެ އިންތިޚާބު އޭނާ ކާމިޔާބުކުރެއްވި އެއް ސަބަބެވެ. އިންތިޚާބުގެ ހަތަރު ދުވަސް ކުރިން އޭނާ ވަނީ "ދުވަހަކުވެސް ނުނިމޭ، އަދި ދުވަހަކުވެސް ކާމިޔާބު ނުކުރެވޭ ހަނގުރާމަތަކަށް" ވަރަށް ބޮޑަށް ބަހުގެ ހަމަލާދެއްވާފަ އެވެ.

ނަމަވެސް، އޭނާގެ ފުރަތަމަ ދައުރުގައި ޓްރަމްޕް ވަނީ އަފްޣާނިސްތާނުގެ ހަނގުރާމަ ނިންމުމަށްޓަކައި އިތުރު ސިފައިން ފޮނުވަން އަމުރުކުރައްވާފަ އެވެ. "އަޅުގަނޑުގެ އަސްލު ވިސްނުމަކީ ސިފައިން ބޭލުން. އަދި އަބަދުވެސް އަޅުގަނޑު ބޭނުންވަނީ އަޅުގަނޑުގެ އަމިއްލަ ވިސްނުމާ އެއްގޮތަށް އަމަލުކުރަން،" އޭނާ ވިދާޅުވި އެވެ. އޭގެ ތިން އަހަރު ނުވަނީސް، އޭނާ ވަނީ އެ ނިންމުމުގެ އިލްޒާމް އޭރުގެ ޑިފެންސް ސެކްރެޓަރީ ޖޭމްސް މެޓިސްގެ ބޮލުގައި އަޅުވާފަ އެވެ. "ކުރު މުއްދަތަކަށް އަޅުގަނޑު އޭނާއަށް އިތުރު ސިފައިން ދިނިން، އެކަމަކު އެކަން ކާމިޔާބެއް ނުވި،" ޓްރަމްޕް ވިދާޅުވި އެވެ.

މިހާރު ޓްރަމްޕަށް މިވަނީ އަނެއްކާވެސް އުނދަގޫ ނިންމުމަކާ ކުރިމަތިލާން ޖެހިފައެވެ. 2017 ވަނަ އަހަރު އަފްޣާނިސްތާނާ ބެހޭގޮތުން ވާހަކަދައްކަވަމުން އޭނާ ވިދާޅުވި ފަދައިން، "އޯވަލް އޮފީހުގެ މޭޒު ކައިރީގައި އިށީނުމުން، ނިންމުންތައް ނިންމަން ޖެހޭ ގޮތް ވަރަށް ތަފާތު" ކަން އޭނާއަށް މިހާރު އިހުސާސް ކުރެއްވޭނެ އެވެ.