އިންފަންޓީނޯގެ މަޤާމު ދެމެހެއްޓޭނެ ގޮތެއް ނެތް: ޔޫރަޕުގެ ލީގުތަކުގެ އިސްވެރިޔާ
3 އޯގަސްޓު 2026 | ހޯމަ 04:32ފިރިހެން އަދި އަންހެން ހިމެނޭހެން ޕްރޮފެޝަނަލް 53 ލީގު ތަމްސީލު ކުރާ އޯގަނައިޒޭޝަންގެ ވެރިޔާ ކްލޯޑިއުސް ޝެފާ އާދީއްތަ ދުވަހު ވިދާޅުވީ، އިންފަންޓީނޯގެ ޕްލޭން އަށް ސަރަހައްދީ އެސޯސިއޭޝަންތަކުގެ ބޮޑު ކުރިމަތިލުމަކަށް ގޮސްފައިވާއިރު، އެކަމުގައި އޮތީ އެންމެ ނަތީޖާއެއް ކަމަށް
ޔޫރަޕުގެ ލީގުތަކުގެ އިސްވެރިޔާ ކްލޯޑިއުސް ޝެފާ | ރޮއިޓާސް
ފީފާ ވޯލްޑް ކަޕް ހިމެނޭހެން، ފީފާގެ މުބާރާތްތަކުގެ ވިޔަފާރި ވިއްކުމަށް ހުށަހެޅި ޕްލޭން ފެއިލްވެފައިވާއިރު، ފީފާގެ ރައީސް ޖިއާނީ އިންފަންޓީނޯގެ މަޤާމު ދެމެހެއްޓޭނެ ގޮތެއް ނެތް ކަމަށް ޔޫރަޕުގެ ޕްރޮފެޝަނަލް ފުޓުބޯޅަ ލީގުތަކުގެ ވެރިޔާ ވިދާޅުވެއްޖެ އެވެ.
ފިރިހެން އަދި އަންހެން ހިމެނޭހެން ޕްރޮފެޝަނަލް 53 ލީގު ތަމްސީލު ކުރާ އޯގަނައިޒޭޝަންގެ ވެރިޔާ ކްލޯޑިއުސް ޝެފާ އާދީއްތަ ދުވަހު ވިދާޅުވީ، އިންފަންޓީނޯގެ ޕްލޭން އަށް ސަރަހައްދީ އެސޯސިއޭޝަންތަކުގެ ބޮޑު ކުރިމަތިލުމަކަށް ގޮސްފައިވާއިރު، އެކަމުގައި އޮތީ އެންމެ ނަތީޖާއެއް ކަމަށެވެ.
ސްވިޒަލެންޑުގެ މީޑިއާއަކަށް ދެއްވި އިންޓަވިޔުއެއްގައި މުޅި މި މައްސަލަ ހިނގައި ދިޔަ ގޮތާއި، ފީފާގެ މުހިންމު ގުނަވަންތަކުން މިކަމުގައި ބައިވެރި ނުވުމުން ފެންނަނީ ވެސް އެންމެ ނަތީޖާއެއް ކަމަށެވެ. އެއާ އެކު ޝެފާ ވިދާޅުވީ، މިއީ ފީފާގެ ރައީސް ކަމުގައި އިންފަންޓީނޯ ދެމި ހުންނަން އެސޯސިއޭޝަންތަކުން ބޭނުން ނުވާ ކަމުގެ ހެއްކެއް ކަމަށް ވެސް ބުނެވިދާނެ ކަމަށެވެ.
ގިނަ ބައެއްގެ ނުރުހުން އަމާޒުވެފައި ވަނިކޮށް، އެންމެ ފަހުން ފީފާ އިން ވަނީ އެ ޕްލޭން ކުރިއަށް ނުގެންދަން ނިންމައިފަ އެވެ. އެ މައްސަލައިގެ ތެރޭގައި އިންފަންޓީނޯ އަށް ޕްރެޝަރު ބޮޑުވެފައިވާއިރު، ޔުއެފާ އާއި ކޮންކާކަފް އިން ވެސް ވަނީ އިންފަންޓީނޯގެ އިތުބާާރު ގެއްލިފައިވާ ކަމަށް ބުނެފައި އެވެ.
ސްވިސް ފުޓުބޯޅަ ލީގުގެ ވެރިޔާގެ ގޮތުގައި ވެސް ހުންނެވި ޝެފާ ވިދާޅުވީ، އެ ހުށަހެޅުމުން ދައްކުވައި ދެނީ ފީފާގެ މައިގަނޑު މަޤުސަދަކީ ކުރިއަށް އޮތް ތަނުގައި އިތުރު އަދި ބޮޑެތި މުބާރާތްތައް ބޭއްވުމަށް ފަހު، ތިން ވަނަ ފަރާތަކަށް ފައިދާ އިތުރު ކުރުން ކަމަށެވެ. އޭނާ ވިދާޅުވީ މިއީ ފައިސާގެ ފައިދާ އަށް ވިސްނައިގެން ކޮށްފައިވާ ކަމެއް ކަމަށާއި، މިކަމުގައި އިތުރު އެހެން ކަމެއް ފެންނަން ނެތް ކަމަށެވެ.
މީގެ އިތުރުން ޝެފާ ވިދާޅުވީ، އިންފަންޓީނޯގެ އެ ޕްލޭންގެ ވާހަކަ އެއްވެސް މީހަކަށް ނޭނގޭ ކަމަށެވެ. ފީފާގެ ގަވަނިން ބޮޑީ ކަމަށްވާ ފީފާ ކައުންސިލަށް ވެސް އެކަމުގެ މައުލޫމާތު ނޭނގޭ ކަމަށް އޭނާ ވިދާޅުވި އެވެ. އެކަމުގެ ތެރޭގައި އިންފަންޓީނޯ އެކަނި ހުންނެވުމަކީ ވެސް ހައިރާންވާން ޖެހޭ ކަމެއް ކަމަށް ޝެފާ ވިދާޅުވި އެވެ.
އިންފަންޓީނޯ އަށް ޕްރެޝަރު ބޮޑުވެފައިވާ މި ދަނޑިވަޅުގައި، ފީފާގެ ކައުންސިލް އިން އެކްސްޓްރާއޯޑިނަރީ ބައްދަލުވުމެއް ބޭއްވުމުގެ މަސައްކަތް ކުރަމުން އަންނަ ކަމަށް ވެސް މީޑިއާތަކުގައި ވަނީ ބުނެފައި އެވެ.
