ފީފާގެ ރައީސް އިންފަންޓީނޯއާ ދެކޮޅަށް އޮތް ހައިޖާނު: ފީފާގެ ރައީސް ކަމަށް ނުކުންނަވާނެ ކަމަށް ބެލެވޭ ބޭފުޅުން!

ދުނިޔޭގެ ފުޓުބޯޅައިގެ މައި އިދާރާ ފީފާގެ މުހިންމު މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް ފީފާގެ ރައީސް ޖިއާނީ އިންފަންޓީނޯ ހުށަހެޅުއްވި "ފީފާ ފޯވާޑް އެންޓަޕްރައިޒް" (އެފްއެފްއީ) މަޝްރޫއާ ގުޅިގެން އުފެދުނު ބޮޑު ހަމަނުޖެހުންތަކާ އެކު، އޭނާގެ މަގާމަށް ބޮޑު ނުރައްކަލެއް ކުރިމަތިވެއްޖެ އެވެ.

ފީފާގެ މުބާރާތްތަކުގެ ހިއްސާ ވިއްކާލުމުގެ ހުށަހެޅުން މިހާރު އަނބުރާ ގެންގޮސްފައިވީ ނަމަވެސް، އިންފަންޓީނޯ އަށް އޮތް އިތުބާރު ގެއްލި، 2027 ވަނަ އަހަރުގެ މާޗު މަހު ބާއްވާ ފީފާގެ އިންތިޚާބުގައި އޭނާއާ ވާދަކުރާނެ ވަރުގަދަ ކެންޑިޑޭޓުންތަކެއްގެ ނަންތައް މިހާރު ވަނީ ފެންމަތިވާން ފަށާފައި އެވެ.

މި މައްސަލައިގައި އިންފަންޓީނޯގެ ސީނިއާ އެޑްވައިޒަރު ކާލޯސް ކޯޑޭރޯ އިސްތިއުފާ ދެއްވާފައިވާއިރު، ފީފާގެ ޗީފް އޮޕަރޭޓިން އޮފިސަރު ކެވިން ލަމޫރު ވަނީ އިންފަންޓީނޯ މުވައްޒަފުންނަށް އޮޅުވާލާފައިވާ ކަމަށް ތުހުމަތު ކުރައްވާފައި އެވެ. ޔޫރަޕުގެ ފުޓުބޯޅަ އިދާރާ (ޔުއެފާ) އިން އިންފަންޓީނޯ އަށް އޮތް އިތުބާރު ގެއްލިފައިވާ ކަމަށް ބުނެފައިވާއިރު، އިންތިޚާބަށް ކުރިމަތިލުމުގެ ސުންގަޑި ހަމަވާ ނޮވެމްބަރު 18 ގެ ކުރިން އޭނާއާ ދެކޮޅަށް ނުކުންނާނެ ކަމަށް ބެލެވޭ ފަސް ބޭފުޅެއްގެ ނަން އަލްޖަޒީރާ އިން ވަނީ ފާހަގަ ކޮށްފައި އެވެ.

މި ލިސްޓުގެ އެންމެ ކުރީގައި އުޅެނީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ގެ ރައީސް އަދި ޤަތަރުގެ ވިޔަފާވެރިޔާ ނާޞިރު އެލް ޚެލައިފީ އެވެ. އުމުރުން 52 އަހަރުގެ ޚެލައިފީ އަކީ ބީއިން މީޑިއާ ގްރޫޕުގެ ޗެއާމަންގެ އިތުރުން، ޔޫއެފާ އެގްޒެކެޓިވް ކޮމިޓީގެ މެންބަރެއް ވެސް މެއެވެ. އޭނާގެ ރައީސް ކަމުގައި ޕީއެސްޖީ އިން ވަނީ 2025 އަދި 2026 ވަނަ އަހަރު ޔޫއެފާ ޗެމްޕިއަންސް ލީގު ކާމިޔާބު ކޮށްފައި އެވެ. މީގެ އިތުރުން ކޮންކާކަފްގެ ރައީސް ވިކްޓަރ މޮންޓަގްލިއާނީ އަކީ ވެސް ވަރުގަދަ ކެންޑިޑޭޓެކެވެ. ކެނެޑާ އަށް ނިސްބަތްވާ މޮންޓަގްލިއާނީ އަކީ 2026 ގެ ވޯލްޑް ކަޕް އުތުރު އެމެރިކާގައި ބޭއްވުމުގެ މޭސްތިރި އެވެ.

އޭޝިއާގެ ފުޓުބޯޅަ އިދާރާ (އޭއެފްސީ) ގެ ރައީސް ޝެއިޚް ސަލްމާން ބިން އިބްރާހީމް އަލް ޚަލީފާ އަކީ އިންފަންޓީނޯގެ ހުށަހެޅުމަށް އެންމެ ބޮޑަށް ފާޑު ވިދާޅުވި އެއް ބޭފުޅާ އެވެ. ބަހްރައިންގެ ޝާހީ އާއިލާ އަށް ނިސްބަތްވެވަޑައިގަންނަވާ ސަލްމާން ވަނީ ފީފާގެ ހުށަހެޅުމަކީ ބަލައި ގަނެވޭނެ ކަމެއް ނޫން ކަމަށް ވިދާޅުވެފައި އެވެ. ބައެއް ފަރާތްތަކުން ބުނެފައިވާ ގޮތުގައި އިންފަންޓީނޯއާ ދެކޮޅަށް ސަލްމާން ނުކުންނެވުމަކީ ވެސް އެކަށީގެންވާ ކަމެކެވެ.

ހަމައެއާ އެކު، ޔުއެފާގެ ރައީސް އަލެކްސެންޑަރ ޗެފެރިން އަކީ ވެސް މި މަގާމަށް ނުކުމެދާނެ ކަމަށް ބެލެވޭ ބޭފުޅެކެވެ. ޗެފެރިން ވިދާޅުވީ ވޯލްޑް ކަޕް އަކީ ވިއްކާލެވޭނެ އެއްޗެއް ނޫން ކަމަށާއި، އިންފަންޓީނޯގެ ސިޔާސަތުގެ ސަބަބުން ފީފާ އަށް އޮތް އިތުބާރު އަލުން ބިނާކުރަން ޖެހިފައިވާ ކަމަށެވެ. މި މައްސަލައިގެ ސަބަބުން އިންފަންޓީނޯ އާއި ޗެފެރިންއާ ދެމެދު އޮތް ގުޅުން ވެސް ވަނީ ވަރަށް ބޮޑަށް ގޯސްވެފައި އެވެ. 

މި ރޭހުގައި ދެން ހިމެނޭ ބޭފުޅަކީ އެފްރިކާގެ ފުޓުބޯޅަ އިދާރާ (ކާފް) ގެ ރައީސް ޕެޓްރިސް މޮޓްސެޕޭ އެވެ. ދެކުނު އެފްރިކާގެ ބިލިއަނަރު މޮޓްސެޕޭގެ ދަށުން އެފްރިކާގެ ފުޓުބޯޅަ އަށް ބޮޑެތި ބަދަލުތަކެއް އައިސްފައިވީ ނަމަވެސް، އެންމެ ފަހުން ބޭއްވި އެފްރިކާ ކަޕް އޮފް ނޭޝަންސްގެ ފައިނަލުގައި ހިނގި ހަމަނުޖެހުންތަކުގެ ސަބަބުން އޭނާ އަށް ވަނީ ފާޑުކިޔުންތައް އަމާޒުވެފައި އެވެ.

އިންފަންޓީނޯއާ ދެކޮޅަށް މި ބޭފުޅުންގެ ތެރެއިން ކެންޑިޑޭޓަކު ނުކުންނާނެ ކަމަށް ބެލެވެނީ، ފީފާގެ 211 މެންބަރު ޤައުމުގެ ތެރެއިން ގިނަ ޤައުމުތަކެއްގެ ތާއީދު މިހާރު އިންފަންޓީނޯ އަށް ގެއްލެމުންދާތީ އެވެ.