އީރާނަށް އޮތް ގޮތަކީ އެއްބަސްވުމަކަށް އައުން ނުވަތަ މުޅިން އަމާންދިނުން: ޓްރަމްޕް
3 އޯގަސްޓު 2026 | ހޯމަ 16:15އީރާނުގެ ވެރިންނަކީ މަކަރުވެރި ބައެއްގެ ގޮތުގައި ސިފަކުރައްވައި، އެ ގައުމުން މަޝްވަރާތަކަށް އިންކާރު ކުރަމުންދާތީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ވަރަށް ބޮޑަށް ފާޑުވިދާޅުވެއްޖެ. މީގެ އިތުރުން ހުރްމުޒް ކަނޑުއޮޅީގެ ފުރިހަމަ ކޮންޓްރޯލް އޮތީ އެމެރިކާގެ ބާރުގެ ދަށުގައި ކަމަށް ވިދާޅުވެ، އީރާނުން ދައްކާ ވާހަކަތަކަށް ޓްރަމްޕް ވަނީ ރައްދު ދެއްވާފައި.
21 ޖުލައި 2026 ގައި، ވައިޓް ހައުސްގެ އޯވަލް އޮފީހުގައި ލުބުނާނުގެ ރައީސް ޖޯސެފް އައުންއާ އެކު ބޭއްވެވި ދެ ގައުމުގެ ދެމެދުގައިވާ ރަސްމީ ބައްދަލުވުމުގެ ތެރެއިން، އެމެރިކާގެ ރައީސް ޑޮނަލްޑް ޓްރަމްޕް މީޑިއާތަކުގެ ސުވާލުތަކަށް ޖަވާބު ދެއްވަނީ | ގެޓީ އިމޭޖަސް
އީރާނަށް އޮތް ހަމައެކަނި އިޚްތިޔާރަކީ އެއްބަސްވުމަކަށް އައުން ނުވަތަ މުޅިން އަމާންދިނުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އީރާނުން އެއްވެސް މަޝްވަރާއަކަށް އެއްބަސްނުވާތީ ޓްރަމްޕް ވަނީ އެ ގައުމަށް ވަރަށް ބޮޑަށް ފާޑުވިދާޅުވެފަ އެވެ. ޓްރަމްޕް ވިދާޅުވީ އީރާނުން ބުނާ ގޮތުގައި އެ ގައުމުން މިހާރު މުއާމަލާތް ކުރަމުންދަނީ ހަމައެކަނި އޮމާނާއެކު ކަމަށެވެ.
ޓްރަމްޕް ވިދާޅުވީ އީރާނުގެ ވެރިންނަނަކީ ގަބޫލު ކުރަންދަތި މިންވަރަކަށް މަކަރުވެރި ބައެއް ކަމަށެވެ.
"އީރާނުގެ ލީޑަޝިޕަކީ ގަބޫލުކުރަން ދަތި މިންވަރަކަށް މަކަރުވެރި ބައެއް! އެމީހުން ބައްދަލުވުމަކަށް އެދޭ، ބައެއް މީހުން ބުނާ ގޮތުން ނަމަ އެކަމަށް އާދޭސްކުރޭ. އަދި މަޝްވަރާތައް ފެށި، ކުރިއަށް އޮތް ތަނުގައި އިތުރު ބައްދަލުވުންތަކެއް ބޭއްވުމަށް ތާވަލުކުރެވިފައި ވަނިކޮށް، އެމީހުން ފާޅުގައި ފަޚުރުވެރިކަމާއެކު ބުނަނީ އެއްވެސް މަޝްވަރާއެއް ނުކުރާ ކަމަށާއި، އެއްވެސް ކަމަކާ މެދު ވާހަކަ ނުދެކެވޭ ކަމަށް. އަދި އެމީހުން މުއާމަލާތް ކުރަނީ ހަމައެކަނި އޮމާނާއެކު ކަމަށް،" ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ 'ޓްރޫތު ސޯޝަލް' ގައި ކުރެއްވި ޕޯސްޓެއްގައި ވިދާޅުވި އެވެ.
ޓްރަމްޕް އިތުރަށް ވިދާޅުވީ، ހުރްމުޒް ކަނޑުއޮޅި ބަލަހައްޓާނީ އެމީހުންގެ ބާރުގެ ދަށުން ކަމަށް ބުނެ އީރާނުން އާންމުކޮށް ބޭކާރު ވާހަކަތައް ދައްކަމުންދާ ކަމަށެވެ. ނަމަވެސް އެ ސަރަހައްދަކީ މިހާރުވެސް އެމެރިކާގެ ކަނޑުގެ ސިފައިންނާއި އެމެރިކާގެ "ބްލޮކޭޑް" ނުވަތަ ބައެއް މީހުން ކިޔާ ގޮތުން ނަމަ "އެމެރިކާގެ ދަގަނޑު ފާރުގެ" ފުރިހަމަ ކޮންޓްރޯލްގެ ދަށުގައި އޮތް ތަނެއް ކަމަށް ވެސް ޓްރަމްޕް ވިދާޅުވި އެވެ.
