މޮރޮކޯގެ އެންމެ ބޮޑު ހައިވޭ އަށް ޓްރަމްޕްގެ ނަމުން ނަން ދީފި

މޮރޮކޯގެ ރަސްގެފާނު މުޙައްމަދު ހަވަނަ ފޮނުއްވި ސިޓީފުޅަކާއެކު، އެ ގައުމުގެ މައި ހައިވޭއަކަށް އެމެރިކާގެ ރައީސް ޑޮނަލްޑް ޓްރަމްޕްގެ ނަމުން ނަންދީފައިވާކަން ކަށަވަރުވެއްޖެ އެވެ.

މިދިޔަ ހަފުތާގައި ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވަނީ މި ޝަރަފު އެރުވިކަމަށްޓަކައި ރަސްގެފާނަށް ޝުކުރު އަދާކުރައްވާފަ އެވެ. ނަމަވެސް އެ ވަގުތާ ހަމައަށް މޮރޮކޯގެ ކަމާބެހޭ އިދާރާތަކުން މިކަމާ ގުޅޭ ރަސްމީ އެިއުލާނެއް ކޮށްފައެއް ނުވެ އެވެ.

އެހެންނަމަވެސް، މޮރޮކޯގެ ދައުލަތުގެ މީޑިއާއިން މިހާރު ވަނީ ރަސްގެފާނު ރައީސް ޓްރަމްޕަށް ފޮނުއްވި ސިޓީފުޅެއް ޝާއިއުކޮށްފަ އެވެ. އެ ސިޓީފުޅުގައި ރަސްގެފާނު ވިދާޅުވެފައިވަނީ، ހައިވޭގެ ނަން ބަދަލުކުރެއްވީ ރައީސް ޓްރަމްޕަށް ކުރައްވާ މަތިވެރި އިހުތިރާމް އަމިއްލަފުޅަށް ހާމަކޮށްދެއްވުމުގެ ގޮތުން ކަމަށެވެ.

ކުރިން "ތިޒްނިތް-ދާޚްލާ" ހައިވޭގެ ނަމުން ނަންދެވިފައިވާ މި މަގަކީ، މޮރޮކޯއިން އަތްގަދަކޮށް، އެ ގައުމުގެ މިލްކުވެރިކަން އޮތް ކަމަށް ދައުވާކުރާ ހުޅަނގު ސަހާރާގެ ތެރެއަށް ވަދެގެންދާ މަގެކެވެ. ނަމަވެސް އެ ސަރަހައްދުގެ ބައެއް ކޮންޓްރޯލް ކުރަނީ، އެތަނުގެ އަސްލު ވަޒަންވެރިން ކަމަށްވާ ސަހްރާވީންގެ މިނިވަންކަމަށް މަސައްކަތްކުރާ ހަތިޔާރު އެޅި ޖަމާއަތެއް ކަމަށްވާ "ޕޮލިސާރިއޯ ފްރަންޓް" އިންނެވެ.

2020 ވަނަ އަހަރު ޓްރަމްޕްގެ ފުރަތަމަ ދައުރުގައި، އިސްރާއީލާއެކު ގުޅުން ގާއިމުކުރުމަށް މޮރޮކޯއިން އެއްބަސްވި އެއްބަސްވުމުގެ އިނާމެއްގެ ގޮތުގައި، އެމެރިކާއިން ވަނީ މައްސަލަ ޖެހިފައިވާ އެ ސަރަހައްދުގެ މިލްކުވެރިކަން މޮރޮކޯއަށް އޮތްކަމަށް ބަލައިގަނެފަ އެވެ.

ޖުލައި މަހުގެ 2 ވަނަ ދުވަހުގެ ތާރީޚުގައި ފޮނުއްވި ނަމަވެސް މިދިޔަ ހަފުތާ ބަންދުގައި އާންމުކުރި ސިޓީފުޅުގައި، ރަސްގެފާނު މުޙައްމަދު ވަނީ "މޮރޮކޯގެ ސަހާރާގެ މައްޗަށް އެ ގައުމުގެ ސިޔާދަތީ ބާރު އޮތްކަމަށް އެމެރިކާގެ ރައީސްގެ ތާރީޚީ ބަލައިގަތުން" ފާހަގަކުރައްވާފަ އެވެ. އަދި އެ ނިންމުމަކީ ޖީލުން ޖީލަށް މޮރޮކޯގެ ރައްޔިތުންގެ ހަނދާނުގައި އަބަދަށް ދެމި ހުންނާނެ ކަމެއް ކަމަށްވެސް ރަސްގެފާނު ވިދާޅުވި އެވެ.

"ދެ ގައުމުގެ ގުޅުމަކީ އަބަދުވެސް ގާތް އެކުވެރިކަމާއި ވަފާތެރިކަމުގެ މައްޗަށް ބިނާވެފައިވާ ގުޅުމެއް ނަމަވެސް، މަނިކުފާނުގެ ރިޔާސީ ދެ ދައުރުގައި މި ގުޅުން ވަރުގަދަވެ، ނަތީޖާ ފެނުނު މިންވަރަށް މީގެ ކުރިން ދުވަހަކުވެސް ފެނިފައެއް ނުވޭ،" ރަސްގެފާނުގެ ސިޓީފުޅުގައި އިތުރަށް ވިދާޅުވެފައިވެ އެވެ.

ރަސްގެފާނު ސިފަކުރެއްވި ގޮތުގައި 1،055 ކިލޯމީޓަރު (655 މޭލު) ގެ މި ހައިވޭއަކީ މޮރޮކޯގެ އުތުރާއި ދެކުނު ގުޅުވައިދޭ "ސްޓްރެޓީޖިކް މައިނާރެކެވެ". މޮރޮކޯއިން ހުޅަނގު ސަހާރާއަށް ނިސްބަތްކޮށް ކިޔަނީ އެ ގައުމުގެ "ދެކުނު ޕްރޮވިންސްތައް" މިހެންނެވެ.

ކުރިން ސްޕެއިންގެ އިސްތިއުމާރުގެ ދަށުގައި އޮތް ހުޅަނގު ސަހާރާއަކީ އދ. އިން "އަމިއްލަ ވެރިކަމެއް ނެތް ސަރަހައްދެއް" ގެ ގޮތުގައި ކަނޑައަޅާފައިވާ ތަނެކެވެ. މިއީ އެފްރިކާގައި އެންމެ ގިނަ ދުވަސްވީ އެއް ހަމަނުޖެހުން ކަމަށްވާއިރު، މި ސަރަހައްދުގެ މިލްކުވެރިކަމާ މެދު ފާއިތުވި ފަސް ދަހަރުގެ ތެރޭގައި ވަނީ ބޮޑެތި ހަނގުރާމަތަކެއް ކޮށްފައެވެ.

އދ. އިން މެދުނުކެނޑި މަސައްކަތް ކުރަމުންދަނީ ފެންނަ ނުފެންނަ ވޯޓެއް ނެގުން ހިމެނޭ ގޮތަށް މި މައްސަލައަށް ހައްލެއް ހޯދުމަށެވެ. ނަމަވެސް އެ ސަރަހައްދުގެ އަސްލު ވަޒަންވެރިންނަށް އެމީހުންގެ މުސްތަގުބަލާ މެދު ގޮތް ނިންމުމަށް ވޯޓުލުމުގެ ފުރުސަތެއް މިހާތަނަށް ލިބިފައެއް ނުވެ އެވެ.

އެފްރިކަން ޔޫނިއަނުން ހުޅަނގު ސަހާރާގެ މިނިވަންކަން ބަލައިގަނެ އެވެ.

ޔޫރަޕްގެ ގައުމުތަކުން މިހާތަނަށް މި މައްސަލައިގައި ވަކި ފަރާތަކަށް ޖެހުމުން ދުރުހެލިވެފައި އޮތް ނަމަވެސް، އިނގިރޭސިވިލާތާއި ސްޕެއިން ހިމެނޭ ގޮތަށް ބައެއް ގައުމުތަކުން މިހާރު ވަނީ މޮރޮކޯގެ ހުށަހެޅުމަށް ތާއީދުކޮށްފަ އެވެ. އެއީ ހުޅަނގު ސަހާރާއަށް އަމިއްލަ އިޚްތިޔާރުގެ ބައެއް ބާރުތައް ދިނުމަށްފަހު، ފުރިހަމަ މިނިވަންކަން ނުދިނުމުގެ ސިޔާސަތެވެ.

ހައިވޭގެ ނަން ބަދަލުކުރުމާ ގުޅޭގޮތުން ޓްރަމްޕްގެ "ޓްރުތް ސޯޝަލް" ގައި ކުރެއްވި ޕޯސްޓުގައި އެ މަގާ ބެހޭ ވީޑިއޯއެއްވެސް ހިމަނާފައިވެ އެވެ. އެ ވީޑިއޯގައި ބުނާ ގޮތުން އެ މަގު ހެދުމަށް ގާތްގަނޑަކަށް 1 ބިލިއަން އެމެރިކާ ޑޮލަރު (740 މިލިއަން ޕައުންޑް) ހޭދަވެފައިވެ އެވެ.

"އުންމީދަކީ ވަރަށް އަވަހަށް، ކޮންމެވެސް ދުވަހަކުން މި ބޮޑު ހައިވޭގެ އެއްކޮޅުން އަނެއްކޮޅަށް ދަތުރުކޮށްލުން،" ރައީސް ޓްރަމްޕް ލިޔުއްވާފައިވެ އެވެ.