ތައިލެންޑުން އިންޑިއާއަށް ދަތުރުކުރި އެއާ އިންޑިއާ ފްލައިޓެއް ކޮޅިގަނޑެއްގައި ޖެހި ދަތުރުކުރި އެތައް ބަޔަކަށް އަނިޔާވެއްޖެ

ތައިލެންޑުން ފުރައިގެން އިންޑިއާއަށް ދަތުރުކުރި އެއާ އިންޑިއާގެ ފްލައިޓެއް ކޮޅިގަނޑެއްގައި ޖެހި ކުއްލިއަކަށް ބޯޓު ތިރިވުމުގެ ސަބަބުން، ބައެއް މީހުންނަށް އަނިޔާވެއްޖެ ކަމަށް ރިޕޯޓްކޮށްފި އެވެ.

ތައިލެންޑުގެ ފުކެޓުން ފުރައިގެން އިންޑިއާގެ ދިއްލީއަށް ދަތުރުކުރި މި ބޯޓަށް މި ހާދިސާ ދިމާވީ ބޯޓު ތިރިކުރަން ފެށި ވަގުތުގަ އެވެ. ނަމަވެސް، ހެނދުނު 11:00 ޖެހިއިރު ބޯޓު ވަނީ ރައްކާތެރިކަމާއެކު ދިއްލީއަށް ޖައްސާފަ އެވެ.

މި ހާދިސާގައި އަނިޔާވީ ކިތައް މީހުންނަށް ކަމެއް އެއާ އިންޑިއާއިން ހާމަކޮށްފައި ނުވި ނަމަވެސް، އިންޑިއާގެ މީޑިއާތަކުން ރިޕޯޓްކުރާ ގޮތުގައި ފްލައިޓުގެ ދެ ފަޅުވެރިންނާއި 10 ފަސިންޖަރުންނަށް ވަނީ އަނިޔާވެފަ އެވެ. އަދި އަނިޔާވި ހުރިހާ އެންމެންވެސް ވަނީ އެއާޕޯޓުގައި ހުންނަ ސިއްހީ މަރުކަޒަކަށް ގެންގޮސްފަ އެވެ.

އެއާލައިންގެ ތަރުޖަމާނަކު ވިދާޅުވީ، އޯގަސްޓް މަހުގެ 4 ވަނަ ދުވަހު ޕުކެޓުން ދިއްލީއަށް ދަތުރުކުރި އޭއައި2379 (AI2379) ފްލައިޓަށް، ބޯޓު އުދުހެމުން ދިޔަ ވަގުތު ކުޑަ ވަގުތުކޮޅަކަށް ޓާބިއުލެންސްއާ ކުރިމަތިވެ، ބޯޓު އުދުހެމުންދިޔަ އުސްމިނަށް ކުއްލި ބަދަލެއް އައިސްފައިވާ ކަމަށެވެ.

އެ ތަރުޖަމާނު އިތުރަށް ވިދާޅުވީ، ބޯޓު ރައްކާތެރިކަމާއެކު ދިއްލީއަށް ޖައްސާފައިވާ ކަމަށާއި، ހުރިހާ ފަސިންޖަރުންނާއި ފަޅުވެރިން ބޯޓުން ފައިބާފައިވާ ކަމަށެވެ. އެއާޕޯޓުން ލިބިފައިވާ ފޮޓޯތަކުން ފެންނަ ގޮތުގައި، ޓާމިނަލްގެ ގޭޓު ކައިރީގައި އެމްބިއުލަންސްތައް މަޑުކޮށްގެން ތިއްބެވެ. އަދި ބައެއް މީހުން ފުރޮޅުލީ ގޮނޑީގައި ބޯޓުން ބާލަމުންދިޔައިރު، ބައެއް މީހުންގެ ބޮލުގައި ބެންޑޭޖް އަޅާފައި ހުއްޓެވެ.

ފްލައިޓްތައް ޓްރެކްކުރާ "ފްލައިޓްރޭޑާ24" (Flightradar24) އިން ދައްކާ ގޮތުގައި، އިންޑިއާގެ ވެރިރަށް ދިއްލީއަށް ބޯޓު ޖެއްސުމުގެ ކުޑަވަގުތުކޮޅެއް ކުރިން ބޯޓު ވަނީ ކުއްލިއަކަށް ތިރިވެފައެވެ.

އެއާލައިނުން ބުނި ގޮތުގައި އެއްވެސް މީހަކަށް ސީރިއަސް އަނިޔާއެއް ލިބިފައެއް ނުވެ އެވެ. އަދި ކުދި އަނިޔާ ލިބުނު މަދު ފަސިންޖަރުންތަކަކާއި ފަޅުވެރިން، ރައްކާތެރިކަމުގެ ފިޔަވަޅެއްގެ ގޮތުން އެއާޕޯޓުގެ މެޑިކަލް ފެސިލިޓީއަށް ގެންގޮސް، އެއާ އިންޑިއާގެ ޓީމާއި ސިއްހީ މާހިރުންގެ ބެލުމުގެ ދަށުން ފަރުވާ ދީފައިވާ ކަމަށްވެސް އެއާލައިނުން ބުންޏެވެ.

ފަސިންޖަރުންގެ ސަލާމަތާއި ރައްކާތެރިކަމަކީ އެންމެ އިސްކަންދޭ ކަންތައް ކަމަށް ފާހަގަކޮށް، އެއާ އިންޑިއާއިން ބުނީ މި ހާދިސާގައި އަސަރުކުރި ފަރާތްތަކަށް ބޭނުންވާ ހުރިހާ އެހީތެރިކަމެއް ފޯރުކޮށްދެމުންދާ ކަމަށާއި، ހިނގާފައިވާ ކަންކަން ތަހުގީގު ކުރުމުގައި ކަމާބެހޭ ފަރާތްތަކަށް ފުރިހަމަ އެއްބާރުލުން ދެމުންދާ ކަމަށެވެ.

މި ހާދިސާ ހިނގި ވަގުތު ބޯޓުގައި ހުރި ފަސިންޖަރަކު އިންޑިއާގެ ނިއުސް އެޖެންސީ "އޭއެންއައި" (ANI) އަށް މައުލޫމާތު ދެމުން ބުނީ، ބޯޓު ނައްޓާލިތާ ގާތްގަނޑަކަށް ގަޑިއިރެއްހާއިރު ވެފައި ވަނިކޮށް، ހެނދުނުގެ ވަގުތު ކަމުން ގިނަ ބަޔަކު ތިބީ ނިދާފައި ކަމަށެވެ. ނަމަވެސް ކުއްލިއަކަށް ބޯޓު އެއްފަރާތަކަށް އަރިވެ، ދެތިން މިނެޓެއް ވަންދެން އެގޮތަށް ބޯޓު ތަޅުވަމުން ދިޔަ ކަމަށް އޭނާ ކިޔައިދިނެވެ.

އެ ފަސިންޖަރު ބުނި ގޮތުގައި، ތުއްތު ކުއްޖަކާއެކު ގިނަ ބަޔަކަށް ވަނީ އަނިޔާވެފަ އެވެ.

ވައިގެ ދަތުރުފަތުރުގައި ޓާބިއުލެންސްގެ ހާދިސާތަކަކީ އާންމުކޮށް ދިމާވާ ކަމެކެވެ. އިންޓަނޭޝަނަލް ސިވިލް އެވިއޭޝަން އޯގަނައިޒޭޝަންގެ ތަފާސްހިސާބުތަކުން ދައްކާ ގޮތުގައި، 2023 ވަނަ އަހަރު ވައިގެ ދަތުރުފަތުރުގައި ފަސިންޖަރުންނަށް ލިބުނު ބޮޑެތި އަނިޔާތަކުގެ 40 އިންސައްތައަކީ ޓާބިއުލެންސްގެ ސަބަބުން ދިމާވި ހާދިސާތަކެވެ.