ވިއެޓްނާމްގައި ސްޕީޑްބޯޓެއް ބަންޑުން ޖަހާލައި 15 އިންޑިއާ ފަތުރުވެރިއަކު މަރުވެއްޖެ
ވިއެޓްނާމްގެ ފޫ ކުއޮކް ކައިރިން 32 ފަތުރުވެރިންނާއެކު ދަތުރުކުރި ސްޕީޑްބޯޓެއް ބަންޑުން ޖަހާލައި އިންޑިއާގެ 15 މީހަކު މަރުވެއްޖެއެވެ. މި ހާދިސާގައި ސަލާމަތްވި މީހުންނަށް ހޮސްޕިޓަލުގައި ފަރުވާދެމުންދާއިރު، އިންޑިއާ އެމްބަސީން ދަނީ ކަމާބެހޭ އިދާރާތަކާ ގުޅިގެން މިކަން ހިނގަން މެދުވެރިވި ސަބަބު ތަހުގީގު ކުރަމުންނެވެ. ބޯޓުގެ އެތެރޭގައި ގިނަ ބަޔަކު ތާށިވުމުގެ ސަބަބުން މީހުން ސަލާމަތްކުރުމަށް ބޮޑެތި ގޮންޖެހުންތަކެއް ކުރިމަތިވި ކަމަށް ރިޕޯޓްތައް ބުނެއެވެ.
ވިއެޓްނާމްގެ ފޫ ކުއޮކް ކައިރިން 32 ފަތުރުވެރިންނާއި ހަތަރު ފަޅުވެރިންނާއެކު ދަތުރުކުރި ބޯޓެއް ބަންޑުން ޖަހާލުމުން މީހުން ސަލާމަތް ކުރުމުގެ މަސައްކަތް ކުރިއަށް ދަނީ | ގެޓީ އިމޭޖަސް
ވިއެޓްނާމްގެ ދެކުނުގައި އޮންނަ ފޫ ކުއޮކް ރަށުގެ ކައިރިން ފަތުރުވެރިން ގޮވައިގެން ދަތުރުކުރި ސްޕީޑްބޯޓެއް ބަންޑުން ޖަހާލި ހާދިސާގައި އިންޑިއާގެ 15 ފަތުރުވެރިއަކު މަރުވެއްޖެ އެވެ.
ކަމާބެހޭ އިދާރާތަކުން ހޮނިހިރު ދުވަހު ކަށަވަރުކޮށްދީފައިވާ ގޮތުގައި، މި ހާދިސާ ހިނގިއިރު އެ ބޯޓުގައި އިންޑިއާގެ 32 ފަތުރުވެރިންނާއި ހަތަރު ފަޅުވެރިން ތިއްބެވެ. މި ހާދިސާގައި ޖުމްލަ 21 މީހަކު ސަލާމަތްކޮށްފައިވާއިރު، އަނިޔާވި މީހުންނަށް މިހާރު ދަނީ ހޮސްޕިޓަލުގައި ފަރުވާ ދެމުންނެވެ. މި ބޯޓު ބަންޑުން ޖަހާލަން މެދުވެރިވި ސަބަބެއް އަދި މިހާތަނަށް ދެނެގަނެވިފައެއް ނުވެއެވެ.
އެ ގައުމުގެ މީޑިއާތަކުން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ ހޮނިހިރު ދުވަހުގެ މެންދުރުފަހު، ފަތުރުވެރިންގެ މެދުގައި މަގުބޫލު ހޮން މޭ ރޫޓް އެންގޯއީ ރަށުން ފުރައިގެން އަން ތޯއީ އިންޓަނޭޝަނަލް ޕޯޓަށް ދަތުރުކުރަނިކޮށެވެ. ބޯޓު ބަންޑުން ޖަހާލާފައިވަނީ އެ ރަށާ ގާތްގަނޑަކަށް 400 މީޓަރު (މޭލެއްގެ ހަތަރުބައިކުޅަ އެއްބައި) ދުރުންނެވެ.
މީސްމީޑިއާގައި ދައުރުވަމުންދާ ފޮޓޯތަކުން ފެންނަ ގޮތުގައި، މީހުން ސަލާމަތްކުރާ ފަރާތްތަކުން ވަނީ މޫދުން މީހުން ނަގައިގެން އެމީހުންނަށް ފުރަތަމަ އެހީ ދިނުމަށް މަސައްކަތް ކޮށްފައެވެ. "ވީއެން އެކްސްޕްރެސް" ނޫހަށް މައުލޫމާތު ދިން މީހުން ބުނި ގޮތުގައި، ވިއެޓްނާމްގެ ބޯޑަރ ގާޑުންނާއި، ނޭވީ އަދި ކޯސްޓްގާޑަށް އެ ސަރަހައްދަށް ދެވުމުގެ ކުރިން، ކައިރީގައި ހުރި އެހެން އުޅަނދުފަހަރުން ވަނީ އެ ސަރަހައްދަށް ގޮސް މީހުން ސަލާމަތްކުރުމުގެ މަސައްކަތް ފަށާފަ އެވެ.
"ވީއެން އެކްސްޕްރެސް" އިން ރިޕޯޓްކޮށްފައިވާ ގޮތުގައި، ގިނަ އަދަދެއްގެ މީހުން ބޯޓުގެ އެތެރޭގައި ތާށިވެފައި ތިބުމުގެ ސަބަބުން މީހުން ސަލާމަތްކުރުމުގެ މަސައްކަތަށް ބޮޑެތި ހުރަސްތަކެއް ކުރިމަތިވި އެވެ.
ހަނޯއީގައި ހުންނަ އިންޑިއާ އެމްބަސީން ނެރުނު ބަޔާނެއްގައި ބުނެފައިވަނީ، ވިއެޓްނާމްގެ ކަމާބެހޭ އިދާރާތަކުން މީހުން ސަލާމަތްކުރުމުގެ މަސައްކަތް އަދިވެސް ކުރިއަށްގެންދާ ކަމަށެވެ. އަދި މި ހާދިސާގައި އަނިޔާވި މީހުންގެ އާއިލާތަކަށް އެހީތެރިކަން ފޯރުކޮށްދިނުމަށްޓަކައި ވިއެޓްނާމްގެ ވެރިރަށް ހަނޯއީ އާއި ހޯޗީ މިން ސިޓީގައި ކޮންޓްރޯލް ރޫމްތަކެއް ގާއިމުކޮށްފައިވާ ކަމަށްވެސް އެމްބަސީން ބުނެފައިވެ އެވެ.
އެމްބަސީން އިތުރަށް ބުނެފައިވަނީ، މި ހާދިސާ ހިނގަން މެދުވެރިވި ސީދާ ސަބަބު ދެނެގަތުމުގެ މަސައްކަތް މިހާރު ކުރަމުންދާ ކަމަށެވެ.
މިދިޔަ އަހަރުގެ ޖުލައި މަހުވެސް، ގަދަ ވަޔާއި ވިއްސާރައިގެ ތެރޭގައި ހާ ލޯންގް ބޭ ސަރަހައްދުގައި "ވޮންޑަރ ސީ" ނަމަކަށް ކިޔާ ފަތުރުވެރިން އުފުލާ ބޯޓެއް ބަންޑުން ޖަހާލައި 39 މީހުން މަރުވެފައިވެއެވެ. އެއީ ވިއެޓްނާމްގެ ތާރީޚުގައި ހިނގި ކަނޑުމަތީގެ އެންމެ ނުރައްކާތެރި އެއް ހާދިސާއެވެ.
ގަލްފް އޮފް ތައިލެންޑްގައި އޮންނަ ފޫ ކުއޮކް އަކީ ވިއެޓްނާމްގެ އެންމެ މަގުބޫލު އެއް މަންޒިލެވެ. އަދި މި ހާދިސާ ހިނގި ހޮން މޭ ރޫޓް ރަށަކީ ފޫ ކުއޮކްގެ ދެކުނުން 10 ކިލޯމީޓަރު ދުރުގައި އޮންނަ ރަށެކެވެ. މި ދެ ސަރަހައްދަކީވެސް އެތަނުގެ ހުދު ދޮންވެލި ގޮނޑުދޮށްތަކާއި ސާފު ފެންގަނޑުގެ ސަބަބުން ކޮންމެ އަހަރަކު އެތައް މިލިއަން ފަތުރުވެރިންނެއް ޒިޔާރަތްކުރާ ތަންތަނެވެ.
