އީރާނުގެ ޑެޕިއުޓީ އެމްބަސެޑަރު ހާޒިރުކޮށް އިންޑިއާއިން ވަރުގަދަ އިހުތިޖާޖެއް ކޮށްފި

ހުރްމުޒް ކަނޑުއޮޅިން ދަތުރުކުރި އިންޑިއާގެ ފަޅުވެރިއަކު މަރާލި މައްސަލައިގައި، އިންޑިއާގައި ހުންނަވާ އީރާނުގެ ޑެޕިއުޓީ އެމްބަސެޑަރު ހާޒިރުކޮށް އިންޑިއާގެ ފޮރިން މިނިސްޓްރީން އަންގާރަ ދުވަހު ވަރުގަދަ އިހުތިޖާޖެއް  .

އިންޑިއާގެ ފޮރިން މިނިސްޓްރީން ބުނި ގޮތުގައި، ހަމަލާދިން ވަގުތު އެ ސަރަހައްދުން ދަތުރުކުރި "އެމްޓީ އަލް ބަހްޔާ" އަދި "އެމްޓީ މޮމްބާސާ" ނަމަކަށް ކިޔާ ދެ އުޅަނދުގައި ޖުމްލަ 46 ފަޅުވެރިން ތިއްބެވެ. މީގެ ތެރޭގައި އިންޑިއާގެ 30 ރައްޔިތުން ހިމެނޭ ކަމަށް އެ މިނިސްޓްރީން މައުލޫމާތުދެ އެވެ.

މި ހަމަލާތަކުގައި އިންޑިއާގެ އިތުރު 10 ފަޅުވެރިއަކު ޒަޚަމްވެފައިވާއިރު، އޭގެ ތެރެއިން ދެ މީހެއްގެ ހާލު ސީރިއަސް ކަމަށް އެ މިނިސްޓްރީން ނެރުނު ބަޔާނުގައި ބުނެފައިވެ އެވެ.

މި ހަމަލާތަކާ ގުޅިގެން އިންޑިއާއިން އިންތިހާއަށް ކަންބޮޑުވުން ފާޅުކޮށްފައިވާއިރު، އެ ސަރަހައްދުގެ މަދަނީ އުޅަނދުފަހަރަށާއި އާންމު އިންފްރާސްޓްރަކްޗާއަށް އަމާޒުކޮށް ދޭ ހަމަލާތައް ވަގުތުން ހުއްޓާލަންޖެހޭ ކަމަށް އިންޑިއާ ސަރުކާރުން ބުނެފައިވެ އެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ މި މަހުގެ ތެރޭގައި ހުރްމުޒް ކަނޑުއޮޅިން ދަތުރުކުރާ އީރާނުގެ އުޅަނދުފަހަރު ހުއްޓުވުމަށް އަލުން ފިޔަވަޅު އަޅުއްވައި، އެ ސަރަހައްދު ބެލެހެއްޓުމުގެ ފީއެއްގެ ގޮތުގައި 20 އިންސައްތަ ނެގުމަށް ހުށަހަޅުއްވާފަ އެވެ.

ފެބްރުއަރީ 28 ވަނަ ދުވަހު މި ހަމަނުޖެހުންތައް ފެށުމުގެ ކުރިން، ދުނިޔޭގެ ތެލާއި ގޭހުގެ ސަޕްލައިގެ ފަސްބައިކުޅަ އެއްބައި އުފުލާ މި ކަނޑުއޮޅީގެ މުސްތަގުބަލު ކަނޑައެޅުމުގައި އެމެރިކާގެ އެއްވެސް ދައުރެއް ނޯންނާނެ ކަމަށް އީރާނުގެ ވެރިރަށް ތެހެރާނުން ބުނެ އެވެ.

މީގެ އިތުރުން، މިދިޔަ އާދީއްތަ ދުވަހު އެ ކަނޑުއޮޅިން ދަތުރުކުރި "ޖީއެފްއެސް ގެލެކްސީ" ނަމަކަށް ކިޔާ ކޮންޓެއިނަރު އުފުލާ ބޯޓަށް ދިން ހަމަލާއަކަށްފަހު، އިންޑިއާގެ އިތުރު ރައްޔިތަކު ގެއްލިފައިވާ ކަމަށް ރިޕޯޓުކޮށްފައިވެ އެވެ.

އީރާނުން ބުނެފައިވަނީ އެ އުޅަނދަށް ހަމަލާދިނީ، އިންޒާރު ދިނުމުންވެސް ހުއްދަ ނެތް މަގަކުން ދަތުރުކުރަން އުޅުމުން ކަމަށެވެ.