"ކޮކްރޯޗް" މުޒާހަރާތަކުގައި އިންޑިއާގެ ބޮޑުވަޒީރަށް ހުތުރުބަހުން މުޚާތަބުކުރި ދަރިވަރުންނަށް މާފުކޮށްފިކަމަށް މޯދީ ވިދާޅުވެއްޖެ

އިންޑިއާގެ މޯދީއާ ދެކޮޅަށް ކުރި "ކޮކްރޯޗް" މުޒާހަރާތަކުގައި އެމަނިކުފާނަށް ހުތުރުބަހުން މުޚާތަބުކުރި ދަރިވަރުންނަށް މާފުކޮށްފިކަމަށް ބޮޑުވަޒީރު ނަރެންދުރަ މޯދީ ވިދާޅުވެއްޖެ އެވެ.

އިންޑިއާގެ ވެރިރަށް ނިއުދިއްލީން ރިޕޯޓްކޮށްފައިވާ ގޮތުގައި، މިދިޔަ މަހު ކުރިއަށްދިޔަ މުޒާހަރާތަކުގައި ބޮޑުވަޒީރު ނަރެންދުރަ މޯދީއަށް ހުތުރުބަހުން މުޚާތަބުކުރި ދަރިވަރުންނަށް މާފުކޮށްފިކަމަށް އެމަނިކުފާނު ވަނީ ވިދާޅުވެފަ އެވެ. މޯދީ އެ ދަރިވަރުން ސިފަކުރެއްވީ "މަގުއޮޅިފައިވާ ކުދިން" ތަކެއްގެ ގޮތުގަ އެވެ. އަދި އެކުދިންނަށް އަދަބުދީ ދައުވާކުރުމުގެ ބަދަލުގައި، އެކުދިންނަށް "ސީދާ މަގު" ދައްކައިދޭންޖެހޭ ކަމަށްވެސް ބޮޑުވަޒީރު ވިދާޅުވި އެވެ.

މޯދީގެ ތިންވަނަ ދައުރުގައި ކުރިމަތިވި އެންމެ ބޮޑު ސިޔާސީ ކާރިސާއަކީ ޒުވާނުން އިސްވެ ތިބެ ކުރިއަށްގެންދިޔަ "ކޮކްރޯޗް" މުޒާހަރާތަކަށް ލިބުނު ބޮޑު ތަރުހީބެވެ. މި ހަރަކާތް ފެށުނީ މެއި މަހު ބޭއްވި މުހިންމު އިމްތިހާނެއްގެ ކަރުދާސްތައް ލީކުވުމާ ގުޅިގެން އެ އިމްތިހާނު ބާތިލުކޮށް، ދެ މިލިއަނަށްވުރެ ގިނަ ދަރިވަރުން ޖެހިގެން އައި މަހު އަލުން އިމްތިހާނު ހަދަން ޖެހުމާ ގުޅިގެންނެވެ.

މުޒާހަރާގެ ބައިވެރިން އަމިއްލައަށް "ކޮކްރޯޗް ޖަންތާ ޕާޓީ" ގެ ނަމުން ނަންދީފައިވަނީ، ވަޒީފާނެތް ޒުވާނުންނާއި އެކްޓިވިސްޓުންނަކީ "ކޮކްރޯޗް" ނުވަތަ ކުރަފިތަކެއްގެ ގޮތުގައި ސުޕްރީމް ކޯޓުގެ އުއްތަމަ ފަނޑިޔާރު ސިފަކުރެއްވުމާ ގުޅިގެންނެވެ. ފުރަތަމަ ސޯޝަލް މީޑިއާގައި މީމްތައް މެދުވެރިކޮށް ތައުލީމީ ދާއިރާ އިސްލާހަށް ގޮވާލާ ކެމްޕޭނެއްގެ ގޮތުގައި ފެށުނު މި ހަރަކާތް، ފަހުން ވަނީ ވެރިރަށް ނިއުދިއްލީގައި އެތައް ހާސް ބަޔަކު ބައިވެރިވި ބޮޑު ހަރަކާތަކަށް ބަދަލުވެފަ އެވެ. އަދި އިންޑިއާގެ އެކި ސިޓީތަކުގައިވެސް މިފަދަ މުޒާހަރާތައް ކުރުމަށް މި ހަރަކާތުން ހިތްވަރު ލިބިގެންދިޔަ އެވެ.

މި މުޒާހަރާތައް ނިމުމަކަށް އައީ، ތައުލީމީ ވަޒީރު އިސްތިއުފާ ދެއްވުމާއި، މުޒާހަރާގެ އެއްވެސް ބައިވެރިއަކަށް ޖިނާއީ ދައުވާއެއް ނުކުރުމަށް ވައުދުވުން ހިމެނޭހެން، މުޒާހަރާގެ ބައިވެރިންގެ ހުރިހާ ޑިމާންޑްތަކަކަށް މޯދީގެ ސަރުކާރުން އެއްބަސްވުމުންނެވެ.

ނަމަވެސް، މޯދީގެ ޔަގީންކަމާއެކުވެސް، އެމަނިކުފާނުގެ ބާރަތިޔާ ޖަނަތާ ޕާޓީ (ބީޖޭޕީ) އިން ވެރިކަންކުރާ ސްޓޭޓްތަކުގެ ކަމާބެހޭ ފަރާތްތަކުން ވަނީ ސަލާމަތީ ބާރުތަކާ ކުރިމަތިލައި، ބޮޑުވަޒީރާ ބެހޭގޮތުން ހުތުރު ގޮވުންތައް ގޮވި އެތައް ސަތޭކަ ބަޔަކާ ދެކޮޅަށް މައްސަލަ ހުށަހަޅާފަ އެވެ.

މޯދީގެ ހަރުކަށި ހިންދޫ ނޭޝަނަލިސްޓް ސިޔާސަތަށް ތާއީދުކުރާ ފަރާތްތަކުން ވަނީ މުޒާހަރާގައި ބައިވެރިވި އަންހެން ކުދިންގެ ޒާތީ މައުލޫމާތު ސޯޝަލް މީޑިއާގައި އާންމުކޮށް، އެކުދިން ރޭޕްކޮށް މަރާލާނެ ކަމުގެ އިންޒާރު ދީފަ އެވެ. އަދި އެކުދިންނާ ދެކޮޅަށް ޖިނާއީ ފިޔަވަޅު އެޅުމަށްވެސް އެފަރާތްތަކުން ދަނީ ގޮވާލަމުންނެވެ.

"މިއީ މަގުއޮޅިފައިވާ ކުދިންތަކެއް. އެކުދިންނަށް ރަނގަޅު މަގު ދައްކައިދިނުމަކީ އަޅުގަނޑުމެންގެ ވާޖިބެއް. އެކުދިންނަށް އަދަބުދީ، ކޯޓުތަކަށް ދަމައި، ނުވަތަ މުޖުތަމައުގައި އެކުދިންނަށް ދުއްތުރާ ކުރުމަކުން ހާލަތެއް ބަދަލެއް ނުވާނެ،" ހުކުރު ދުވަހުގެ ރޭ ސޯޝަލް މީޑިއާގައި އާންމުކުރި ވީޑިއޯއެއްގައި މޯދީ ވިދާޅުވި އެވެ. މީގެ އިތުރުން، މުޒާހަރާގައި އެމަނިކުފާނަށާއި އަވަހާރަވެފައިވާ އެމަނިކުފާނުގެ މަންމާފުޅަށް އަމާޒުކޮށް "ފަކުރުގަންނަ ފަދަ ހުތުރު ބަސްތައް" ބޭނުންކޮށްފައިވާ ކަމަށްވެސް މޯދީ ވިދާޅުވި އެވެ.

"އަޅުގަނޑުމެންގެ އަންހެން ދަރިން މިފަދަ ބަސްމަގު ބޭނުންކުރުމަކީ އަޅުގަނޑުމެންގެ ސަގާފަތަށް ލިބުނު ވަރަށް ބޮޑު ސިހުމެއް،" މިހެން ވިދާޅުވުމަށްފަހު މޯދީ ވިދާޅުވީ، "އަޅުގަނޑު ބޭނުންވަނީ އެކުދިންނަށް މާފުކުރަން،" ކަމަށެވެ.

ވޭތުވެދިޔަ މަހު ކުރިއަށްދިޔަ މުޒާހަރާތަކުގައި ގައުމުގެ އެކި ސަރަހައްދުތަކުގައި މުޒާހަރާގެ ބައިވެރިންނާއި ސަރުކާރުގެ ސަލާމަތީ ބާރުތަކާ ދެމެދު ކުރިމަތިލުންތަކެއް ހިނގާފައިވެ އެވެ. އޭގެ ތެރޭގައި ނިއުދިއްލީގައި ޕާލަމެންޓަށް ދިއުމަށް މަސައްކަތްކުރި މީހުންނާ ދެކޮޅަށް ކަރުނަގޭހާއި، ޕެލެޓް ބަޑިއާއި، ކުލަބު ބޭނުންކޮށްގެން ބާރުގެ ބޭނުންކޮށްފައިވެ އެވެ.

"ވެރިރަށުގެ ދަރިވަރުންނަށް ދިން އަނިޔާވެރި ހަމަލާތަކާ ބެހޭގޮތުން މޯދީ ހުންނެވީ ހަނު. އެކަމަކު އިންސްޓަގްރާމަށް އަރައި އަމިއްލަ ނަފްސަކީ އަނިޔާ ލިބޭ މީހެއްގެ ގޮތުގައި ދައްކަން އެބަ މަސައްކަތް ކުރައްވާ،" ދިއްލީ ޔުނިވާސިޓީގެ 21 އަހަރުގެ ދަރިވަރެއް ކަމަށްވާ ރާދިކާ ކުމާރު އަލްޖަޒީރާއަށް ބުންޏެވެ. "މި ސަރުކާރަށް ތާއީދުކުރާ މީހުން މިދިޔަ ހުރިހާ އަހަރެއްގައި އަންހެނުންނަށް އޮންލައިންކޮށް ފުރައްސާރަކޮށް، ބިރުދައްކައިގެން ހަނު ތިބުމަށް މަޖުބޫރުކުރި. މިހާރު އަޅުގަނޑުމެންގެ ބޮޑުވަޒީރު މި އުޅުއްވަނީ އަޅުގަނޑުމެންގެ އަޚުލާގު އިސްލާހުކުރަން."

މުޒާހަރާ ކުރި ފަރާތްތަކާ ދެކޮޅަށް ފުލުހުން ހުށަހަޅާފައިވާ މައްސަލަތައް އަނބުރާ ގެންދިއުމަށް ސަރުކާރުން ވެފައިވާ އިގުރާރާ ޚިލާފަށް، އެކި ސްޓޭޓްތަކުން "އެތައް ސަތޭކަ" ދަރިވަރުންނެއް ހައްޔަރުކޮށްފައިވާ ކަމަށް އެ ހަރަކާތުން ހޯމަ ދުވަހު ބުނެފައިވެ އެވެ.

ދަރިވަރުންނާ ދެކޮޅަށް ހިންގި ހަރަކާތްތަކާ ގުޅިގެން، ދިއްލީގެ އަމަންއަމާންކަން ބަލަހައްޓާ އަދި މޯދީގެ އަރިސް ބޭފުޅެއް ކަމަށްވާ ހޯމް މިނިސްޓަރު އަމިއްލަ ޝާހު މަގާމުން ވަކިކުރުމަށް އިދިކޮޅު ފަރާތްތަކުން ދަނީ ސަރުކާރަށް ބާރުއަޅަމުންނެވެ.

މި މުޒާހަރާތަކާ ގުޅިގެން މޯދީގެ ސަރުކާރުން ވަނީ އާންމު އިމްތިހާނުތަކާ ބެހޭ ގާނޫނަށް އިސްލާހު ގެނައުމަށް ޕާލަމެންޓަށް ބިލެއް ހުށަހަޅާފަ އެވެ. މި ބިލުގައި އިމްތިހާނު ކަރުދާސް ލީކުކުރުމުގައި ބައިވެރިވާ ފަރާތްތަކަށް ދޭ ޖަލު އަދަބު ބޮޑުކޮށް، ޖޫރިމަނާގެ އަދަދު އިތުރުކުރުމަށް ވަނީ ހުށަހަޅާފަ އެވެ.

އިންޑިއާގެ ދެކުނުގެ ސިޓީއެއް ކަމަށްވާ ހައިދަރުއާބާދުގައި، މެޓާ އިންޑިއާގެ ވެރިޔާ އަރުން ސްރިނިވާސްއާ ދެކޮޅަށްވެސް ފުލުހުން ވަނީ މައްސަލައެއް ރަޖިސްޓްރީކޮށްފައެވެ. އެއީ މޯދީއަށް "ހުތުރުވާ ގޮތަށް" ތައްޔާރުކޮށްފައިވާ ގިނަ ވީޑިއޯތަކެއް ފޭސްބުކްގައި އާންމުކޮށްފައިވާތީ ކަމަށް ފުލުހުންގެ އިސް އޮފިސަރަކު ހުކުރު ދުވަހު ވިދާޅުވި އެވެ.

"އަޅުގަނޑުމެން މިދަނީ ކަމާބެހޭ އިދާރާތަކާ ގުޅިގެން މި މައްސަލަ ހައްލުކުރުމަށް މަސައްކަތް ކުރަމުން،" މެޓާގެ ތަރުޖަމާނަކު ވިދާޅުވި އެވެ.

ފެބްރުއަރީ މަހުން ފެށިގެން އަމަލުކުރަން ފެށި އާ ގަވާއިދުތަކުގެ ދަށުން، ކޯޓަކުން ނުވަތަ ސަރުކާރުން ފާހަގަކުރާ ގާނޫނާ ޚިލާފު ކޮންޓެންޓްތައް، ކުރިން ދީފައިވާ 36 ގަޑިއިރުގެ ބަދަލުގައި، މިހާރު 3 ގަޑިއިރުގެ ތެރޭގައި ސޯޝަލް މީޑިއާ ޕްލެޓްފޯމްތަކުން އުނިކުރަން ޖެހެ އެވެ.