ބަންގްލަދޭޝްގެ ކުރީގެ ބޮޑުވަޒީރު ހަސީނާ އިންޑިއާއިން އެނބުރި ގައުމަށް ވަޑައިގެންފި ނަމަ ޖަލަށްލާނެ ކަމަށް އެ ގައުމުގެ ވަޒީރަކު ވިދާޅުވެއްޖެ

ބަންގްލަދޭޝްގެ މަގާމުން ދުރުކޮށްފައިވާ ކުރީގެ ބޮޑުވަޒީރު ޝައިޚް ހަސީނާ އިންޑިއާއިން އެނބުރި ގައުމަށް ވަޑައިގަތުމުން ޖަލަށްލާނެ ކަމަށް އެ ގައުމުގެ ވަޒީރަކު ވިދާޅުވެއްޖެ އެވެ.

ސަރުކާރާ ދެކޮޅަށް ކުރި ވަރުގަދަ އަދި ލޭއޮހޮރުވުން ބޮޑު މުޒާހަރާތަކާ ގުޅިގެން ބަންގްލަދޭޝް ދޫކޮށް ފިއްލަވައިގެން ވަޑައިގަތްތާ ދެ އަހަރަށްވުރެ ގިނަ ދުވަސް ފަހުން، އަންނަ ޑިސެމްބަރު މަހު ވެރިރަށް ޑާކާއަށް އެނބުރި ވަޑައިގަތުމަށް ހަސީނާ އާއި މިހާރު މަނާކޮށްފައިވާ އަވާމީ ލީގު ޕާޓީގެ މެންބަރުން ރާވަމުންދާ ކަމަށް އޭނާ މި ހަފުތާގައި ވަނީ ވިދާޅުވެފަ އެވެ.

ބަންގްލަދޭޝްގައި އެންމެ ދިގު މުއްދަތަކަށް ބޮޑުވަޒީރުކަން ކުރެއްވި ހަސީނާ 2024 ވަނަ އަހަރުގެ އޯގަސްޓް މަހު ގައުމުން ފިއްލަވައިގެން ވަޑައިގަތުމަށްފަހު ދިރިއުޅުއްވަމުން ގެންދަވަނީ އިންޑިއާގެ ނިއު ދިއްލީގަ އެވެ. އޭނާގެ ދަރިފުޅު މީގެ ކުރިން "ދަ އިންޑިޕެންޑެންޓް" ނޫހަށް މައުލޫމާތު ދެމުން ބުނެފައިވަނީ، އިންޑިއާގެ ބާރުވެރި ފަރާތްތަކާ ގާތް ގުޅުމެއް ބާއްވަމުންދާ ހަސީނާއާ މެދު އެ ގައުމުން އަމަލުކުރަނީ "ދައުލަތެއްގެ ވެރިއަކާ" މެދު އަމަލުކުރާ ފަދަ އިހުތިރާމަކާއެކު ކަމަށެވެ. އުމުރުން 78 އަހަރުގެ ހަސީނާގެ މައްޗަށް މަރުގެ ހުކުމެއް އިއްވާފައިވާއިރު، އދ. އިން ހާމަކޮށްފައިވާ ގޮތުގައި މަދުވެގެން 1،400 މީހުން މަރުވި މުޒާހަރާތަކަށްފަހު އޭނާގެ ޕާޓީ ވަނީ ބަންގްލަދޭޝްގައި މަނާކޮށްފަ އެވެ.

ބަންގްލަދޭޝްގެ ފޮރިން އެފެއާޒް ސްޓޭޓް މިނިސްޓަރު ޝަމާ އުބައިދު އިސްލާމް ނޫސްވެރިންނަށް މައުލޫމާތު ދެއްވަމުން ވިދާޅުވީ، ޝައިޚް ހަސީނާއަކީ ކުށް ސާބިތުވެފައިވާ މުޖުރިމެއް ކަމަށާއި، އޭނާ އަމިއްލައަށް ހަވާލުވެއްޖެ ނަމަ ބަންގްލަދޭޝްގެ ގާނޫނުތަކާ އެއްގޮތަށް އޭނާއާ މެދު ފިޔަވަޅު އަޅާނެ ކަމަށެވެ. އަދި އޭނާ ޖަލަށް ދާންޖެހޭނެ ކަމަށާއި، ގާނޫނީ އުސޫލުތަކުގެ ތެރެއިން އިތުރު މަރުހަލާތައް ކުރިއަށްދާނެ ކަމަށްވެސް ވަޒީރު ވިދާޅުވި އެވެ.

ދަރިވަރުން އިސްވެ ތިބެ ކުރި މުޒާހަރާތައް ހުއްޓުވުމަށް ލޭއޮހޮރުވުން ބޮޑު އަމަލުތަކެއް ހިންގުމަށް އަމުރުކުރި މައްސަލައިގައި، އެ ގައުމުގެ ހަނގުރާމައިގެ ކުށްތަކާ ބެހޭ ޓްރައިބިއުނަލުން ނޮވެމްބަރު މަހު ވަނީ ހަސީނާގެ ޣައިރު ހާޒިރުގައި އޭނާ މަރަން ހުކުމްކޮށްފަ އެވެ. ނަމަވެސް އަރުވާލެވިގެން ހުންނެވި ހަސީނާ ވަނީ އެ ތުހުމަތުތަކަށް އިންކާރު ކުރައްވާފަ އެވެ.

ހަސީނާ އަނބުރާ ގައުމަށް ފޮނުވައިދިނުމަށް ބަންގްލަދޭޝްއިން އިންޑިއާގައި އެދިފައިވާއިރު، ނިއު ދިއްލީން އޭޕްރީލް މަހު ބުނެފައިވަނީ އެ ހުށަހެޅުން ދިރާސާކުރަމުންދާ ކަމަށާއި، ބަންގްލަދޭޝްގެ އާ ސަރުކާރާއެކު ބިނާކުރަނިވި ގުޅުމެއް ބާއްވައި ދޭދޭ ގުޅުންތައް އިތުރަށް ވަރުގަދަކުރަން ބޭނުންވާ ކަމަށެވެ. ހަސީނާ ހަވާލުކުރުމުގެ މައްސަލައިގައި މީގެ ކުރިން އިންޑިއާއިން ފަސްޖެހުމުގެ ސަބަބުން ޑާކާ އާއި ނިއު ދިއްލީގެ ގުޅުމަށް ބުރޫއަރައި، ބަންގްލަދޭޝްގައި ޗައިނާގެ ނުފޫޒު ފެތުރުމަށް ފުރުސަތު ލިބިގެންދިޔަ އެވެ.

މިދިޔަ ހަފުތާގައި ރޮއިޓާސްއަށް ދެއްވި ބަސްދީގަތުމެއްގައި ހަސީނާ ވިދާޅުވީ، އިންޑިއާ، އިނގިރޭސިވިލާތް އަދި މެދުއިރުމަތީގެ ގައުމުތަކުގައި އަރުވާލެވިގެން ތިއްބެވި އަވާމީ ލީގުގެ އިސް ބޭފުޅުންނާއެކު މިއަހަރު ނިމުމުގެ ކުރިން ބަންގްލަދޭޝްއަށް އެނބުރި ވަޑައިގަންނަވަން ބޭނުންފުޅުވާ ކަމަށެވެ. ހަސީނާ ވިދާޅުވި ގޮތުގައި އެ ޕާޓީގެ ގާތްގަނޑަކަށް ހުރިހާ ލީޑަރުންނާއި ހަރަކާތްތެރިންގެ މައްޗަށް ވަނީ ދައުވާ އުފުލާފަ އެވެ. އަދި އޭނާ އެނބުރި ގައުމަށް ވަޑައިގަންނަވާ ދުވަހަކުން އެ އެންމެން އެކުގައި ކޯޓަށް ހާޒިރުވެ ހަވާލުވުމަށް ވަނީ ގޮވާލައްވާފަ އެވެ.

"އަހަރެން އެނބުރި ދިއުމުން ހައްޔަރުކޮށްފާނެ، ނުވަތަ މަރާވެސްލާފާނެ، އެހެންނަމަވެސް އަހަރެން ދާންޖެހޭ،" ހަސީނާ ވިދާޅުވި އެވެ. އަދި ޑާކާގެ ކަމާބެހޭ ފަރާތްތަކުން އޭނާ އަނބުރާ ގެންދަން ބޭނުންވެގެން ތަކުރާރުކޮށް އިންޑިއާއަށް ސިޓީ ފޮނުވަމުންދާ ކަމަށާއި، އެހެންކަމުން އަމިއްލައަށް ގައުމަށް ވަޑައިގަންނަވާނެ ކަމަށްވެސް އޭނާ ވިދާޅުވި އެވެ. މީގެ އިތުރުން، އަވާމީ ލީގު އަލުން އިންތިޒާމު ކުރުމުގެ މަސައްކަތުގެ ދަށުން ބަންގްލަދޭޝްގެ ޕާލަމެންޓްގެ 300 ދާއިރާގެ ތެރެއިން 125 ދާއިރާއެއްގެ މެންބަރުންނާއެކު އޮންލައިންކޮށް ބައްދަލުވުންތައް ބާއްވާފައިވާ ކަމަށްވެސް ހަސީނާ ވިދާޅުވި އެވެ. ފެބްރުއަރީ މަހު ބޭއްވި އާންމު އިންތިޚާބުގެ ކުރިން ހަސީނާ ޕާޓީގެ ހަރަކާތްތައް ވަރުގަދަކުރަމުންދާތީ ބަންގްލަދޭޝްއިން ވަނީ ތަކުރާރުކޮށް އިންޑިއާއަށް ޝަކުވާ ހުށަހަޅާފަ އެވެ.

ދެ އަހަރެއްހާ ދުވަހުގެ ސިޔާސީ އަދި އިގްތިސާދީ ހަލަބޮލިކަމަށްފަހު ފެބްރުއަރީ މަހު ބޭއްވި ފުރަތަމަ އިންތިޚާބުގައި ބަންގްލަދޭޝް ނޭޝަނަލިސްޓް ޕާޓީން ހޯދި ބޮޑު ކާމިޔާބީއާއެކު، މިހާރު ބަންގްލަދޭޝްގެ ބޮޑުވަޒީރުކަން ކުރައްވަމުން ގެންދަވަނީ ތާރިގް ރަހްމާނެވެ.