ޔޫކްރޭނުން ދިން ޑްރޯން ހަމަލާއެއްގައި ރަޝިޔާގެ މާރުކޭޓެއްގައި 5 މީހުން މަރުވެއްޖެ
ރަޝިއާގެ ބާރުގެ ދަށުގައިވާ މި ސަރަހައްދުގެ މާރުކޭޓަކަށާއި މީހުން ދިރިއުޅޭ ގެތަކަށް އަމާޒުކޮށް ދިން މި ހަމަލާތަކަކީ ގަސްދުގައި އާންމު ރައްޔިތުންނަށް ދިން ހަމަލާތަކެއް ކަމަށް އެ ސަރަހައްދުގެ ގަވަރުނަރު ވަނީ ތުހުމަތު ކުރައްވާފައި. މީގެ އިތުރުން ރަޝިއާގެ ބެލްގޮރޮޑް ރީޖަނަށް ދިން މިސައިލް ހަމަލާއެއްގައި ވެސް މީހަކު މަރުވެފައިވާ ކަމަށް ރިޕޯޓުތައް ބުނޭ.
ރަޝިއާގެ ކޮންޓްރޯލްގެ ދަށުގައި އޮންނަ ޒަޕޮރޯޒިޔާ ރީޖަންގެ ޓޮކްމަކްގައި ހުރި މާރުކޭޓަކަށް، 2026 ވަނަ އަހަރުގެ ޖުލައި މަހުގެ 3 ވަނަ ދުވަހު ޔޫކްރޭނުން ދިން ޑްރޯން ހަމަލާއަކަށްފަހު އެ ސަރަހައްދަށް ލިބިފައިވާ ގެއްލުންތައް. | އާރުޓީ
ޒަޕޮރޯޒިޔާ ރީޖަންގެ ޓޮކްމަކްގައި ހުންނަ މާރުކޭޓަކަށް ހުކުރު ދުވަހު ޔޫކްރޭނުން ދިން ޑްރޯން ހަމަލާއެއްގައި މަދުވެގެން ފަސް މީހުން މަރުވެ، އިތުރު 18 މީހަކަށް އަނިޔާވެފައިވާ ކަމަށް އެ ސަރަހައްދުގެ ގަވަރުނަރު އެވްގެނީ ބަލިޓްސްކީ ވިދާޅުވެއްޖެ އެވެ.
ރަޝިއާގެ އޮފިޝަލް ފާހަގަކުރެއްވި ގޮތުގައި، ކަމާބެހޭ އިދާރާތަކުން އަދިވެސް ކުއްލި ހާލަތުގައި އެ ސަރަހައްދުގައި ހަރަކާތްތެރިވަމުންދާތީ، މަރުވި މީހުންނާއި އަނިޔާވި މީހުންގެ އަދަދު މިއަށްވުރެ އިތުރުވުމަކީ އެކަށީގެންވާ ކަމެކެވެ.
ގަވަރުނަރުގެ ފުރަތަމަ ރިޕޯޓުގައި ވިދާޅުވެފައިވަނީ، ޔޫކްރޭނުގެ ހަމަލާތައް ކުރިއަށްދިޔަ ވަގުތު، އަނިޔާވި މީހުންނަށް ފަރުވާ ދިނުމަށްޓަކައި އަވަސްކަމާއެކު އެ ސަރަހައްދުގެ ހޮސްޕިޓަލަށް ގެންގޮސްފައިވާ ކަމަށެވެ.
އޭނާ ވިދާޅުވި ގޮތުގައި ޔޫކްރޭން ސިފައިން މި ހަމަލާ އަމާޒުކޮށްފައިވަނީ ގަސްދުގައި ކާބޯތަކެތި ގަންނަން ގޮސް ތިބި އާންމު ރައްޔިތުންނަށެވެ. އަދި މިއީ އާންމުން ދިރިއުޅޭ ތަންތަނަށް އަމާޒުކޮށް ޔޫކްރޭނުން ދެމުންދާ ސިލްސިލާ ހަމަލާތަކުގެ ބައެއް ކަމަށްވެސް އޭނާ ވިދާޅުވި އެވެ.
މީގެ ކުރިން ބަލިޓްސްކީ ވިދާޅުވެފައިވާ ގޮތުގައި، ރޭގަނޑުގެ ވަގުތުތަކުގައި ޔޫކްރޭނުން އެ ސަރަހައްދަށް ދިން އެކި ހަމަލާތަކުގައި ތިން މީހަކު މަރުވެ، އެތައް ބަޔަކަށް ވަނީ އަނިޔާވެފަ އެވެ. މަރުވި މީހުންގެ ތެރޭގައި ޑްރޯން ހަމަލާއެއް އަމާޒުވި ލޮރީއެއްގެ ޑްރައިވަރު ހިމެނޭ ކަމަށް އޮފިޝަލް ވިދާޅުވިއެވެ. އަނެއް ދެ މީހުންނަކީ ހަމަލާގައި ސުންނާފަތިވި އަވަށެއްގެ ގެއެއްގެ ތެރެއިން ފެނުނު ދުވަސްވީ ދެމަފިރިންނެވެ.
ޒަޕޮރޯޒިޔާ ރީޖަންއަކީ ކުރިން ޔޫކްރޭނުގެ ބައެއްގެ ގޮތުގައި އޮތް ނަމަވެސް، 2022 ވަނަ އަހަރުގެ ފަހުކޮޅު ބޭއްވި ފެންނަ ނުފެންނަ ވޯޓަކަށްފަހު ރަޝިއާގެ ބައެއްގެ ގޮތުގައި ހަމަޖެހިފައިވާ ސަރަހައްދެކެވެ. ނަމަވެސް ޔޫކްރޭން ސަރުކާރުން އެ ވޯޓަކީ ސައްހަ އެއްޗެއް ނޫން ކަމަށް ބުނެ، ހަނގުރާމައިގެ ޒަރީއާއިން އެ ސަރަހައްދު އަނބުރާ ހޯދުމަށް ދަނީ މަސައްކަތް ކުރަމުންނެވެ. އެ ސަރަހައްދުގެ ބައެއް ބައިތައް އަދިވެސް އޮތީ ޔޫކްރޭން ސިފައިންގެ ކޮންޓްރޯލްގެ ދަށުގަ އެވެ.
ހުކުރު ދުވަހުގެ ކުރީކޮޅު، ރަޝިއާގެ ބެލްގޮރޮޑް ރީޖަންގެ އެކްޓިން ގަވަރުނަރު އެލެގްޒެންޑަރ ޝުވަޔޭވް ރިޕޯޓް ކުރެއްވި ގޮތުގައި، ރޭގަނޑު ދިން މިސައިލް ހަމަލާއެއްގައި އަންހެނަކު މަރުވެ، އިތުރު މީހަކަށް ވަނީ އަނިޔާވެފަ އެވެ.
މަސްދަރު: ރަޝިޔާ ޓީވީ
