މާލޭ ސަރަހައްދުގައި އުފެދޭ ކުނި ބޮޑުތިލަދުންމައްޗަށް އުކާލުމަކީ އެ ސަރަހައްދުގެ ރައްޔިތުންނަށް ކުރެވޭ މަލާމާތެއް: ޝާހިދު

މާލޭ ސަރަހައްދުގައި އުފެދޭ ކުނި ބޮޑުތިލަދުންމައްޗަށް އުކާލުމަކީ އެ ސަރަހައްދުގެ ރައްޔިތުންނަށް ކުރެވޭ މަލާމާތެއް ކަމަށް ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ޝާހިދު ވިދާޅުވީ، ބޮޑުތިލަދުންމައްޗަކީ ދިވެހިރާއްޖޭގެ އުތުރުބިތުގެ ދިވެހިންގެ ޝަހުސިއްޔަތު ރަމްޒުކޮށްދޭ ރައްޔިތަކު ދިރިއުޅޭ، ތަރައްގީއަށް ކެތްމަދުވެފައިއޮތް ސަރަހައްދެއް ކަމަށެވެ. ކަން މިހެން އޮތުމާއެކު މާލޭ ސަރަހައްދުގެ ކުނި ބޮޑުތިލަދުންމަތީގެ ޖަޒީރާވަންތަ ފަސްގަނޑަށް އަޅާލުމަކީ އެ ސަރަހައްދަށާއި އެ ސަރަހައްދުގެ ރައްޔިތުންނަށް ކުރެވޭ ވަރަށް ވެސް ބޮޑު ބޭއިންސާފެއް، އަނިޔާއެއް އަދި މަލާމާތެއް ކަމަށް ޝާހިދު ވިދާޅުވި އެވެ.

ޝާހިދު ވަނީ ސަރުކާރުގެ ދޯހަޅި ނިންމުން މިހާރުން މިހާރަށް ބަދަލުކޮށް، ރައްޔިތުންގެ ވިންދާ އެއްގޮތަށް މިސްރާބު ހަމަމަގަށް އެޅުމަށް ސަރުކާރަށް ގޮވާލައްވައިފަ އެވެ. މާލޭ ސަރަހައްދުގައި އުފެދޭ ކުނި ބޮޑުތިލަދުންމައްޗަށް އުކާލުމާ ދެކޮޅަށް ޝާހިދު ވާހަކަދައްކަވާފައިވާއިރު ފާހަގަކޮށްލަންޖެހޭ ކަމަކީ، ތިލަފުށިން އެނދި ކުނިތައް ހދ. ކުނބުރުދޫ އަށް ގެންދިއުމަށް ވެމްކޯ އިން ނިންމާފައިވާ ކަމެވެ. އަދި މިކަމުގެ ސަބަބުން ދިމާވެދާނެ ނުރައްކާތައް ފާހަގަކޮށް، ރައްޔިތުންގެ މަޖިލީހަށް ބުދަ ދުވަހު ހުށަހެޅި ކުއްލި މައްސަލަ ވެސް ބޭރުކޮށްލާފައިވާކަން ފާހަގަކޮށްލެވެ އެވެ. މި ކުއްލި މައްސަލަ މަޖިލީހަށް ހުށަހެޅުއްވީ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އެވެ.

މި މައްސަލަ މަޖިލީހަށް ބަލައިނުގަތުމަށް ނިންމާފައިވަނީ 27 މެންބަރުންގެ އަޣުލަބިއްޔަތުންނެވެ. މި ކުއްލި މައްސަލަ ބަލައިގަތުމަށް ވޯޓު ދެއްވީ 7 މެންބަރުންނެވެ.

މި މަހުގެ 19 ވަނަ ދުވަހު ތިލަފުށީގައި ހިނގި އަލިފާނުގެ ހާދިސާގައި އެނދި ކުނިތައް، ހދ. ކުނބުރުދޫގައި ތަރައްގީކުރަން ފަށާފައިވާ ވޭސްޓް ޓްރާންސްފަރ ސްޓޭޝަނަށް ގެންދިއުމަށް ވެމްކޯ އިން ވަނީ ނިންމައިފަ އެވެ. ކުނބުރުދޫގައި ތަރައްގީކުރަން ފަށާފައިވާ ވޭސްޓް ސްޓޭޝަނަކީ، ކުނި މެނޭޖުކުރުމުގެ އަމަލީ މަސައްކަތް ފެށުމަށް ތައްޔާރުވެފައިވާ ތަނެއް ނޫނެވެ. ވެމްކޯއިން ނިންމި ނިންމުމާ ގުޅިގެން ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.