އޮމާން ކަނޑުގައި މުދާ އުފުލާ ބޯޓަކަށް ހަމަލާ ދީފި
4 އޯގަސްޓު 2026 | އަންގާރަ 06:49މި ހާދިސާއާ ގުޅިގެން ކަމާ ބެހޭ އިދާރާތަކުން މިހާރު ތަހުގީގު ފަށާފައިވާ ކަމަށް ޔޫކޭއެމްޓީއޯ އިން ބުނޭ. މި ހަމަލާގައި ބޯޓަށް ލިބުނު ގެއްލުމުގެ ތަފުސީލެއް، ނުވަތަ ބޯޓުގައި ތިބި ފަޅުވެރިންނަށް އަނިޔާއެއް ލިބިފައިވާ ކަމެއް އެ އިދާރާ އިން މިހާތަނަށް ހާމަކޮށްފައި ނުވޭ
މީގެ ކުރިން އޮމާން ކަނޑު ހިމެނޭ ސަރަހަައްދުން ދަތުރު ކުރަމުން ދިޔަ ދެ ބޯޓެއް (ފައިލް ފޮޓޯ). | ރޮއިޓާސް
އޮމާންގެ އައްސޭރިފަށުން ދަތުރު ކުރަމުން ދިޔަ މުދާ އުފުލާ ބޯޓަކަށް ނޭނގޭ އެއްޗަކުން ހަމަލާ ދީފައިވާ ކަމަށް އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ހާމަކޮށްފި އެވެ.
ޔޫކޭއެމްޓީއޯ އިން މައުލޫމާތު ދީފައިވާ ގޮތުގައި މި ހާދިސާ ހިނގާފައި ވަނީ އޮމާންގެ ޚަސަބްގެ އިރުއުތުރުން 20 ނޯޓިކަލް މޭލު (ގާތްގަނޑަކަށް 37 ކިލޯ މީޓަރު) ބޭރުންނެވެ. މި ހަމަލާ ދީފައި ވަނީ ކޮން އެއްޗަކުންކަން އަދި ކަށަވަރުވެފައި ނުވި ނަމަވެސް، ބޯޓަށް ވަނީ ނޭނގޭ އެއްޗެއް އަރާފައި އެވެ.
މި ހާދިސާއާ ގުޅިގެން ކަމާ ބެހޭ އިދާރާތަކުން މިހާރު ތަހުގީގު ފަށާފައިވާ ކަމަށް ޔޫކޭއެމްޓީއޯ އިން ބުނެ އެވެ. މި ހަމަލާގައި ބޯޓަށް ލިބުނު ގެއްލުމުގެ ތަފުސީލެއް، ނުވަތަ ބޯޓުގައި ތިބި ފަޅުވެރިންނަށް އަނިޔާއެއް ލިބިފައިވާ ކަމެއް އެ އިދާރާ އިން މިހާތަނަށް ހާމަކޮށްފައި ނުވެ އެވެ.
މި ހާދިސާއާ ގުޅިގެން އެ ސަރަހައްދުން ދަތުރުކުރާ އުޅަނދު ފަހަރުން ސަމާލުވުމަށް ޔޫކޭއެމްޓީއޯ އިން ވަނީ އިލްތިމާސް ކޮށްފައި އެވެ. އަދި އެ ސަރަހައްދުން ދަތުރު ކުރާއިރު، ޝައްކު ކުރެވޭ ފަދަ އެއްވެސް ކަމެއް ފާހަގަ ކުރެވިއްޖެނަމަ، ލަސްނުކޮށް އެކަން ރިޕޯޓު ކުރުމަށް ވެސް އުޅަނދު ފަހަރަށް ވަނީ އަންގާފައި އެވެ.
މި ފަހަކަށް އައިސް މެދުއިރުމަތީގެ ކަނޑުގެ ސަރަހައްދުތަކުގައި މުދާ އުފުލާ ބޯޓު ފަހަރަށް އަމާޒުކޮށް ދޭ ހަމަލާތައް ވަނީ އިތުރުވެފައި އެވެ. މިފަދަ ހަމަލާތަކުގެ ސަބަބުން ބައިނަލްއަޤްވާމީ ކަނޑު ދަތުރުފަތުރާއި، ވިޔަފާރި އަށް ބޮޑެތި ގޮންޖެހުންތަކެއް ކުރިމަތިވަމުންދާކަން ފާހަގަ ކުރެވެ އެވެ.
މަސްދަރު: އަލް ޖަޒީރާ
