ރަޝިޔާގެ ހަމަލާތަކުން ޔޫކްރޭނުގައި ހަތަރު މީހުން މަރު
ރަޝިޔާގެ މިސައިލް ހަމަލާތަކާ ގުޅިގެން ޔޫކްރެއިންގެ ވައިގެ ދިފާއީ ނިޒާމަށް ބާރުބޮޑުވެފައިވާއިރު، އެމެރިކާގެ "ޕޭޓްރިއަޓް" ނިޒާމު އެ ގައުމުގައި އުފެއްދުމުގެ ހުއްދަ މިހާރު ވަނީ ލިބިފައި. މި ހަމަލާތައް އަމާޒުވެފައިވަނީ ހަނގުރާމަ ހުއްޓާލުމާ ގުޅޭގޮތުން ޕެރިހުގައި ބާއްވާ މަޝްވަރާތައް ފެށުމުގެ އެއް ދުވަސް ކުރިން. މި ހަމަލާތަކުގައި ޑިނީޕްރޯޕެޓްރޯވްސްކް އާއި ހާސަން ސަރަހައްދުން މީހުން މަރުވެ، ބޮޑެތި ގެއްލުންތަކެއް ވަނީ ލިބިފައި.
ޔޫކްރެއިންގެ ވެރިރަށް ކީވްއަށް 2026، ޖުލައި 11 ގެ ފަތިހުގެ ވަގުތެއްގައި ރަޝިޔާއިން ދިން މިސައިލް ހަމަލާތަކާ ގުޅިގެން، އެ ސިޓީގެ ގުދަނެއްގައި ރޯވި އަލިފާންގަނޑު ނިއްވުމަށް ފަޔަރފައިޓަރުން ހަރަކާތްތެރިވަނީ. | އޭއެފްޕީ
ރަޝިޔާއިން ރޭގެ ވަގުތެއްގައި ޔޫކްރެއިނަށް އަމާޒުކޮށް ގިނަ އަދަދެއްގެ ޑްރޯން އަދި މިސައިލް ހަމަލާތަކެއް ދީފައިވާ ކަމަށާއި، މި ހަމަލާތަކުގައި މަދުވެގެން ހަތަރު މީހުން މަރުވެފައިވާ ކަމަށް ޔޫކްރެއިންގެ އޮފިޝަލުން އާދީއްތަ ދުވަހު ވިދާޅުވެއްޖެ އެވެ.
މި ހަމަލާތައް ދީފައިވަނީ، ހަތަރު އަހަރަށްވުރެ ގިނަ ދުވަސްވެފައިވާ މި ހަނގުރާމަ ހުއްޓާލުމަށް ރަޝިޔާއަށް ބާރު އެޅުމުގެ ގޮތުން ޔޫކްރެއިންގެ ބައިވެރިން ފަރަންސޭސިވިލާތުގެ ޕެރިހުގައި ބާއްވާ މަޝްވަރާތައް ފެށުމުގެ އެއް ދުވަސް ކުރިންނެވެ.
ފަހަކަށް އައިސް ރަޝިޔާއިން ތަކުރާރުކޮށް ދެމުންދާ ބެލިސްޓިކް މިސައިލް ހަމަލާތަކުގެ ސަބަބުން، ޔޫކްރެއިންގެ ވައިގެ ދިފާއީ ނިޒާމަށް ވަނީ ވަރަށް ބޮޑަށް ބާރުބޮޑުވެފަ އެވެ.
ރަޝިޔާގެ ބެލިސްޓިކް މިސައިލްތައް ވައްޓާލުމުގެ ގާބިލުކަން ލިބިފައިވާ، އެމެރިކާގައި ފަރުމާކޮށްފައިވާ "ޕޭޓްރިއަޓް" ވައިގެ ދިފާއީ ނިޒާމުތައް ޔޫކްރެއިންގައި އުފެއްދުމުގެ ހުއްދަ މި ހަފުތާގައި އެމެރިކާއިން ވަނީ ދީފައެވެ. ނަމަވެސް މި ނިޒާމުތައް އުފައްދައި ބޭނުންކުރަން ފެށުމަށް އަދި މަސްތަކެއް ނަގާނެ ކަމަށް ބެލެވެ އެވެ.
ޔޫކްރެއިންގެ މެދުތެރޭގައި އޮންނަ ޑިނީޕްރޯޕެޓްރޯވްސްކް ސަރަހައްދަށް ރޭ ދިން ހަމަލާތަކުގައި ތިން މީހުން މަރުވެފައިވާ ކަމަށް އެ ސަރަހައްދުގެ އޮފިޝަލުން ވިދާޅުވި އެވެ. މީގެ ތެރެއިން ދެ މީހުން މަރުވީ ކްރިވީ ރިގް ސިޓީގައި ހުންނަ ސިނާއީ މަސައްކަތްކުރާ ތަނަކަށް ދިން ހަމަލާއެއްގަ އެވެ.
މީގެ އިތުރުން، ޔޫކްރެއިންގެ ދެކުނުގައި އޮންނަ ހާސަން ސިޓީއަށް ދިން ޑްރޯން ހަމަލާއެއްގައި އުމުރުން 48 އަހަރުގެ މީހަކު މަރުވެފައިވާ ކަމަށް އެ ސިޓީގެ މޭޔަރު ޔަރޮސްލާވް ޝަންކޯ ރިޕޯޓު ކުރައްވާފައިވެ އެވެ.
މަސްދަރު: އޭއެފްޕީ
