އިސްރާއީލަށް ޖާސޫސްކުރި ދެ މީހުން އީރާނުން ދަންޖައްސައި މަރާލައިފި

އިސްރާއީލަށް ޖާސޫސްކޮށްދިން ކަމުގެ ކުށް ސާބިތުވި ދެ މީހަކު އީރާނުން ހޯމަ ދުވަހު ދަންޖައްސައި މަރާލައިފި ކަމަށް އެ ގައުމުގެ ޝަރުއީ ދާއިރާއިން ހާމަކޮށްފި އެވެ. މިއީ ޖާސޫސްކުރުމުގެ ތުހުމަތުގައި އެ ގައުމުން ފަހަކަށް އައިސް މީހުން މަރަމުންދާ ސިލްސިލާގެ ތެރެއިން އެންމެ ފަހުން ތަންފީޒުކުރި ދެ މަރުގެ އަދަބެވެ.

މިދިޔަ ފެބްރުއަރީ މަހު އިސްރާއީލާއި އެމެރިކާއާ ދެކޮޅަށް ހަނގުރާމަ ފެށުނު ފަހުން، ތެހެރާނުން ވަނީ މަރުގެ އަދަބު ދޭ މިންވަރު އިތުރުކޮށްފަ އެވެ. މީގެ ތެރެއިން ގިނަ މީހުންގެ މައްޗަށް އުފުލާފައިވަނީ އިސްރާއީލުގެ ޖާސޫސީ އިދާރާއަށް މަސައްކަތް ކޮށްދިނުމުގެ ތުހުމަތެވެ.

އީރާނުގެ ޝަރުއީ ދާއިރާގެ މީޑިއާ އައުޓްލެޓް ކަމަށްވާ "މީޒާން" އިން ރިޕޯޓްކޮށްފައިވާ ގޮތުގައި، އުމީދު ބެހްޒާދު އަދި ޕޫރިއާ ސަފްވަތު މިއަދު ހެނދުނު ދަންޖައްސާފައިވަނީ، އީރާނުގެ އަސްކަރީ އަދި ސަލާމަތީ ގޮތުން ނާޒުކު ސަރަހައްދުތަކުގެ މައުލޫމާތު އިސްރާއީލުގެ ޚާރިޖީ ޖާސޫސީ އިދާރާ ކަމަށްވާ މޮސާޑްގެ އެޖެންޓުންނަށް ފޯރުކޮށްދިން ކަމުގެ ކުށުގަ އެވެ.

މި ދެ މީހުން ހައްޔަރުކުރީ ކޮން އިރަކު ކަމެއް ނުވަތަ ޝަރީއަތް ހިންގީ ކޮން ދުވަހަކު ކަމެއް މީޒާން އިން ހާމަކޮށްފައެއް ނުވެ އެވެ. ނަމަވެސް އެ މީހުންގެ މައްޗަށް ކުށް ސާބިތުވީ "ޒަޔަނިސްޓް ރެޖީމާ" ގުޅިގެން ޖާސޫސްކުރުމުގެ ކުށުގައި ކަމަށް ބުނެފައިވެ އެވެ.

"ހަނގުރާމައިގެ ދުވަސްވަރު އަސްކަރީ އަދި ސަލާމަތީ މަރުކަޒުތަކުގެ މައުލޫމާތު ފޯރުކޮށްދީގެން، ޖާސޫސީ އިދާރާތަކުގެ މަގްސަދުތައް ހާސިލްކުރުމަށް އެ ދެ މީހުން ވަނީ އެހީތެރިވެދީފައި،" މީޒާން އިން އިތުރަށް ބުނެފައިވެ އެވެ.

ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން ދިން ވަރުގަދަ ހަމަލާތަކެއްގައި އީރާނުގެ އެންމެ މަތީ ވެރިޔާ އަވަހާރަވުމާ ގުޅިގެން ފެށުނު ހަނގުރާމައަށްފަހު، އީރާނުގައި މަރުގެ އަދަބު ދޭ މިންވަރު ވަނީ ވަރަށް ބޮޑަށް އިތުރުވެފަ އެވެ.

އެމްނެސްޓީ އިންޓަނޭޝަނަލް ހިމެނޭހެން އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި، ޗައިނާ ފިޔަވައި ދުނިޔޭގައި އެންމެ ގިނައިން މަރުގެ އަދަބު ތަންފީޒުކުރާ ގައުމަކީ އީރާނެވެ.

ނޯވޭގައި ހުންނަ "އީރާން ހިއުމަން ރައިޓްސް" އާއި ޕެރިހުގައި ހުންނަ "ޓުގެދަރ އެގެއިންސްޓް ދަ ޑެތު ޕެނަލްޓީ" (އީ.ސީ.ޕީ.އެމް) އިން ހާމަކޮށްފައިވާ ގޮތުގައި، މިދިޔަ އަހަރު އެކަނިވެސް އީރާނުގެ ކަމާބެހޭ ފަރާތްތަކުން ވަނީ މަދުވެގެން 1,639 މީހުންނަށް މަރުގެ އަދަބު ދީފަ އެވެ. މިއީ 1989 ވަނަ އަހަރުގެ ފަހުން އެ ގައުމުގައި ރެކޯޑް މިންވަރަކަށް މަރުގެ އަދަބު ތަންފީޒުކުރި އަހަރެކެވެ.

ފާއިތުވި ފިނިމޫސުމުގައި ސަރުކާރާ ދެކޮޅަށް ކުރި މުޒާހަރާތަކުގައި ބައިވެރިވި ކަމުގެ ކުށް ސާބިތުވި ދެ މީހަކު ދަންޖައްސައި މަރާލިކަން އީރާނުން އިއުލާނުކުރުމާ ގުޅިގެން، މަރުގެ އަދަބު ދިނުން އިތުރުވަމުންދާ ދިއުން ކުށްވެރިކުރާ ކަމަށް އަންގާރަ ދުވަހު އެމްނެސްޓީން ވަނީ ބުނެފަ އެވެ.