އޮމާން ކައިރިން ދަތުރުކުރި މުދާއުފުލާ ދެ އުޅަނދަކަށް ޓާގެޓްކޮށް ހަމަލާތަކެއް ދީފި

އޮމާންގެ ޚަސަބްގެ އިރުއުތުރުން 21 ނޯޓިކަލް މައިލް ބޭރުން ކަނޑުމަތީގެ ހާދިސާއެއް ހިނގައިގެން އުޅޭކަމުގެ ރިޕޯޓެއް ލިބިފައިވާ ކަމަށް ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ހޮނިހިރު ދުވަހު ބުނެފިއެވެ. އެ އިދާރާއިން ބުނި ގޮތުގައި، އެ ސަރަހައްދުން ދަތުރުކުރި ޓޭންކަރެއްގެ ކެޕްޓަނަށް ވަނީ އެ އުޅަނދާ ވަރަށް ކައިރިން ބޮޑު ގޮވުމެއްގެ އަޑު އިވި، ފެންގަނޑު މައްޗަށް ބުރައިގެން ދިޔަ މަންޒަރު ފެނިފައެވެ.

މި ހާދިސާގައި އެއްވެސް އުޅަނދަކަށް ގެއްލުމެއް ލިބިފައިވާ ކަމުގެ ރިޕޯޓެއް ލިބިފައިނުވާ ކަމަށް ޔޫކޭއެމްޓީއޯ އިން މައުލޫމާތުދެއެވެ.

ޔޫކޭއެމްޓީއޯ އިން ބުނި ގޮތުގައި، މި ހާދިސާ ހިނގާފައިވަނީ އޮމާންގެ އައްސޭރިފަށުން ދަތުރުކުރި އެހެން ޓޭންކަރަކަށް "ގޮތްނޭނގޭ އެއްޗަކުން" ހަމަލާދީފައިވާ ދަނޑިވަޅެއްގަ އެވެ.

އެ އުޅަނދުން ރިޕޯޓްކޮށްފައިވާ ގޮތުގައި، މި ހަމަލާގެ ސަބަބުން އުޅަނދުގެ އިންޖީނު ރޫމަށް ވަނީ ބޮޑެތި ގެއްލުންތަކެއް ލިބިފަ އެވެ.

އޮމާންގެ ލީމާ އައްސޭރިފަށުން 12.5 މައިލް ބޭރުގައި ހިނގި މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށް އެ އެޖެންސީން ބުނެ އެވެ.

ފެބްރުއަރީ މަހުގެ 28 ވަނަ ދުވަހު ހަނގުރާމަ ފެށުނު ފަހުން، ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ ކޮންޓްރޯލް އީރާނުން ވަނީ ވަރުގަދަކޮށްފަ އެވެ. އެގޮތުން އެ ސަރަހައްދުން ދަތުރުކުރާ އުޅަނދުފަހަރުން ހުއްދަ ހޯދުމަށާއި، ޓްރާންސިޓް ފީ ދެއްކުމަށް އީރާނުން ދަނީ މަޖުބޫރު ކުރަމުންނެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ވަނީ ހުރްމުޒް ކަނޑުއޮޅިން ދަތުރުކުރަން އުޅުނު ބައެއް އުޅަނދުފަހަރަށް ހަމަލާދީ ހުއްޓުވާފަ އެވެ. އަދި އެ ކަނޑުއޮޅީގެ "ފުރިހަމަ ކޮންޓްރޯލް" އޮތީ އީރާނަށް ކަމަށް އެ ގައުމުން ފަހަކަށް އައިސް ދަނީ ބުނަމުންނެވެ.

ކަނޑުމަތީގެ ވިޔަފާރި މޮނިޓަރ ކުރާ ކެޕްލާ ކުންފުނިން ހުކުރު ދުވަހު ބުނި ގޮތުގައި، ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ އަދަދު ވަނީ ވަރަށް ބޮޑަށް ދަށްވެފަ އެވެ.

"އެމެރިކާ އާއި އީރާނުގެ ސިޔާސީ މަސްރަހު އަދިވެސް އޮތީ ނުތަނަވަސްކޮށް ކަމަށްވާތީ، ކުރިއަށް އޮތް ދުވަސްތަކުގައި ސަރަހައްދީ ކަނޑުގެ ދަތުރުފަތުރުގެ ރޫޓުތަކަށް އަތުވެދާނެ ބަދަލުތަކަށް އުޅަނދުފަހަރު ދުއްވާ ފަރާތްތަކުން ދަނީ ވަރަށް ގާތުން ފާރަވެރިވަމުން،" އެކްސްގައި ކުރި ޕޯސްޓެއްގައި އެ ކުންފުނިން ބުނެފައިވެ އެވެ.