އެމެރިކާގެ ދިމުޤްރާޠީ ނިޒާމުގެ ކޯޅުން: އިޚްތިޔާރެއް ނެތް މަޖުބޫރީ ވޯޓު

340 މިލިއަނަށްވުރެ ގިނަ އާބާދީއެއް އޮތް އެމެރިކާގައި، ކޮންމެ ހަތަރު އަހަރަކުން އެއް އަހަރު ރައްޔިތުންނަށް އޮންނަނީ އެންމެ ދެ އިޚްތިޔާރެކެވެ. ރަތް ކުލަ ނުވަތަ ނޫ ކުލަ އެވެ. ރިޕަބްލިކަން ނުވަތަ ޑިމޮކްރެޓިކް ޕާޓީ އެވެ. ނަމަވެސް، ދިމުޤްރާޠީ ނިޒާމަކީ "އިޚްތިޔާރު" ކަމަށް ވާއިރު، މި ނިޒާމުގެ ތެރެއިން ޙަޤީޤީ އިޚްތިޔާރެއް ނުލިބޭކަމުގެ ޝަކުވާ އެމެރިކާގެ އެތެރޭގައި ދަނީ ގަދަވަމުންނެވެ.

ތާރީޚީ އިންޒާރާއި، މިއަދުގެ ޙަޤީޤަތް

އެމެރިކާގެ ފުރަތަމަ ރައީސް ޖޯޖް ވޮޝިންގްޓަން ވަނީ، ސިޔާސީ ޕާޓީތަކުގެ ސަބަބުން ޤައުމު ބައިބައިވެ، ބަދަލުހިފުމުގެ ރޫހު އުފެދި، ޤައުމީ މަސްލަހަތަށްވުރެ ޕާޓީގެ މަސްލަހަތު އިސްކުރެވިގެންދާނެކަމުގެ އިންޒާރު ކުރީއްސުރެ ދެއްވާފަ އެވެ. ނަމަވެސް 250 އަހަރު ފަހުން މިއަދު ފެންނަނީ، ޕާޓީތައް ހަމައެކަނި ދެމިއޮތީ ނޫންކަމާއި، އެ ޕާޓީތަކަކީ މުޅި ނިޒާމުކަމުގައި ވެފައިވާ މަންޒަރެވެ.

އިންތިޚާބީ ނިޒާމުގެ މައްސަލަ: "ވިނަރ ޓޭކްސް އޯލް"

އަލްޖަޒީރާގެ ރިޕޯޓުގައި ސިފަކޮށްފައިވާ ގޮތުގައި އެމެރިކާގެ އިންތިޚާބުތަކަކީ ހަމައެކަނި ރަން މެޑަލް ދޭ އޮލިމްޕިކްސްއެއް ފަދަ ނިޒާމެކެވެ. ރިހި ނުވަތަ ލޯ މެޑައްޔެއް ނޯވެ އެވެ. އެގޮތުން މި "ވިނަރ ޓޭކްސް އޯލް" ނުވަތަ މޮޅުވާ މީހަކަށް ހުރިހާ ބާރެއް ލިބޭ އުޞޫލުގެ ސަބަބުން، އާންމުންނަށް ވޯޓުލާން މަޖުބޫރުވަނީ ތިމާ ޤަބޫލުކުރާ ސިޔާސަތަކަށް ތާއީދުކުރުމުގެ ބަދަލުގަ އެވެ. އަދި އޭގެ ބަދަލުގައި ގިނަ މީހުން ވޯޓުލަނީ ތިމާ އެންމެ ބިރުގަންނަ ނުވަތަ ނަފްރަތުކުރާ ޕާޓީ އިންތިޚާބުވިޔަ ނުދިނުމަށެވެ. މިއީ "ޑެމޭޖް ކޮންޓްރޯލް" ނުވަތަ ގެއްލުން ކުޑަކުރުމުގެ ގޮތުން ލާ ވޯޓެކެވެ.

ޕާޓީތަކުގެ ތަފާތުތަކާއި ޒުވާނުންގެ މާޔޫސްކަން

ޓެކްސް، މޫސުމީ ބަދަލުތައް، އިމިގްރޭޝަން، ޚާރިޖީ ސިޔާސަތު، އަދި ސަރުކާރުގެ ދައުރާ ގުޅޭގޮތުން ދެ ޕާޓީގެ މެދުގައި ޚިޔާލު ތަފާތުވުންތަކެއް ހުރި ނަމަވެސް، އާންމު ރައްޔިތުން، ޚާއްޞަކޮށް ޒުވާން ޖީލު ދެކޭގޮތުގައި މި ނިޒާމުން އެމީހުންގެ އަޑެއް ނާހަ އެވެ. ޒުވާނުން ސިފަކުރާ ގޮތުގައި، މިހާރު ވޯޓުލުމަކީ ދެ ގޯހުގެ ތެރެއިން "ކުޑަ ގޯސް" އިޚްތިޔާރު ކުރުމެވެ. އަލްޖަޒީރާއަށް މަޢުލޫމާތު ދިން ބައެއް ޒުވާނުން ބުނެފައިވަނީ، ދެ ޕާޓީންކުރެ އެއްވެސް ޕާޓީއެއްގެ ސިޔާސަތާ އެއްބަސްނުވެވޭތީ، ވޯޓުލުމާ ދުރުހެލިވާން މަޖުބޫރުވާ ކަމަށެވެ.

ތަފާސްހިސާބުތަކުން ފެންނަ ނުރައްކާތެރި ސިގްނަލް

2024 ވަނަ އަހަރުގެ ތަފާސްހިސާބުތަކުން އެމެރިކާގެ ސިޔާސީ މަސްރަހަށް އަންނަމުންދާ ބޮޑު ބަދަލު ވަރަށް ސާފުކޮށް ފެނެ އެވެ. ވޯޓުލުމުގެ ޙައްޤު ލިބިގެންވާ 243.8 މިލިއަން މީހުންގެ ތެރެއިން 90 މިލިއަނާ ގާތްކުރާ އަދަދެއްގެ މީހުން ވޯޓުގައި ބައިވެރިވެފައެއް ނުވެ އެވެ. މިއީ ނިޒާމާމެދު އޮތް އިތުބާރު ކުޑަވެފައިވާކަމުގެ ސާފު ހެއްކެކެވެ. ރެކޯޑު އަދަދަކަށް އެމެރިކާ ރައްޔިތުންގެ 45 އިންސައްތަ މިހާރު ތަމްސީލުވަނީ ވަކި ޕާޓީއަކަށް ނިސްބަތްނުވާ "އިންޑިޕެންޑެންޓް" ފަރާތްތަކުގެ ގޮތުގަ އެވެ. އަދި މި އިންޑިޕެންޑެންޓް ކެޓަގަރީގެ އެންމެ ބޮޑު އިންސައްތައެއް ޙިއްޞާކުރަނީ "ޖެން-ޒީ" ނުވަތަ މިހާރުގެ އެންމެ ޒުވާން ޖީލެވެ.

ނިޒާމީ ގޮންޖެހުމާއި ކުރިމަގު

މިއަދު އެމެރިކާގެ ގިނަ ރައްޔިތުން ބޭނުންވަނީ އައު ޕާޓީތަކާއި، އިންޑިޕެންޑެންޓް ކެންޑިޑޭޓުންނާއި، އަދި "ރޭންކްޑް ޗޮއިސް ވޯޓިންގ" ފަދަ އައު ނިޒާމުތަކެކެވެ. ބައެއް މީހުން މުޅި ސިސްޓަމް ބަދަލުކުރަން ބޭނުންވި ނަމަވެސް އޮތް އެންމެ ބޮޑު ގޮންޖެހުމަކީ މިއީ އެވެ: މި ނިޒާމުގެ ޤަވާއިދުތައް ހަދާފައިވަނީ ހަމަ ދެ ޕާޓީގެ ފައިދާއަށެވެ. އަދި ނިޒާމު ބަދަލުކުރެވެން އޮތީ ހަމަ އެ ދެ ޕާޓީމް ކޮންޓްރޯލްކުރާ ނިޒާމުގެ ތެރެއިން ކާމިޔާބު ހޯދައިގެންނެވެ.

އެހެންކަމުން، އެމެރިކާގައި އިންތިޚާބުތައް ބޭއްވި، ބާރުތައް ބަދަލުވަމުން ދިޔަނަމަވެސް، މުޅި ނިޒާމާމެދު އާންމުންގެ އިޢުތިބާރު ވަނީ ވަރަށް ބޮޑަށް ކުޑަވެފަ އެވެ. 250 އަހަރު ފަހުން އުފެދޭ އެންމެ ބޮޑު ސުވާލަކީ، މި ނިޒާމަކީ ހަމައެކަނި ވެރިކަންކުރާ ދެ ޕާޓީގެ ނިޒާމެއް ނޫންކަމާއި، މިއީ އާންމު ރައްޔިތުންގެ ނިޒާމެއްކަން ކުރިއަށް އޮތް ޖީލުތަކަށް ސިސްޓަމުން ސާބިތުކޮށްދެވިދާނެތޯ އެވެ؟