"ފިނޑި ހަނގުރާމައިގެ ޖަރީމާ އެއް" އެމެރިކާ އިން ކެންސަރު ހޮސްޕިޓަލު ކައިރިއަށް ދިން ހަމަލާ އީރާނުން ވަރަށް ބޮޑަށް ކުށްވެރިކޮށްފި

އީރާނުގެ ހުޅަނގު ދެކުނުގައި ހުންނަ ކެންސަރު ބައްޔަށް ފަރުވާދޭ ހޮސްޕިޓަލެއްގެ ކައިރިއަށް އެމެރިކާއިން ދިން ވަރުގަދަ ވައިގެ ހަމަލާތަކާ ގުޅިގެން އެ ހޮސްޕިޓަލް ހުސްކުރަން ޖެހުމުން، އެމެރިކާއިން ހިންގީ "ލާނުސާނީ އަމަލެއް" ކަމަށް ބުނެ އީރާނުން އެމެރިކާގެ އަމަލު ކުށްވެރިކޮށްފި އެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ އެކްސްގައި ކުރެއްވި ޕޯސްޓެއްގައި ވިދާޅުވީ، އިސްރާއީލުން ސިއްހީ މަރުކަޒުތަކަށް ދޭ ލާއިންސާނީ ހަމަލާތަކާ އެއްފަދަ މި ހަމަލާގެ ސަބަބުން، ހޮސްޕިޓަލުގައި އެޑްމިޓްކޮށްފައި ތިބި ކުޑަކުދިންނަށް ނަފްސާނީ ގޮތުންނާއި ޖިސްމާނީ ގޮތުން ބޮޑެތި ތަކުލީފުތަކެއް އުފުލަން ޖެހުނު ކަމަށެވެ.

އޭނާ ފާހަގަކުރެއްވި ގޮތުގައި ކީމޯތެރަޕީ ހަދަމުންދިޔަ 211 ބަލިމީހަކު ވަނީ އެ ސަރަހައްދުން ރައްކާތެރި ހިސާބުތަކަށް ބަދަލުކޮށްފަ އެވެ. ނަމަވެސް މިކަމާ ގުޅިގެން އެމެރިކާއިން އަދި ވަކި އެއްޗެއް ބުނެފައެއް ނުވެ އެވެ. އީރާނުގެ ދެކުނަށް އެމެރިކާއިން ދިން ނުރައްކާތެރި ހަމަލާތަކާ ގުޅިގެން ބަޣާއީ ސްޕެޝަލައިޒްޑް ހޮސްޕިޓަލުން 200 އަށްވުރެ ގިނަ ބަލިމީހުން ވަނީ ހުސްކޮށްފަ އެވެ.

އަހްވާޒް ސިޓީއަށް އެމެރިކާއިން ދިން ހަމަލާތަކުގެ ސަބަބުން ހޮސްޕިޓަލުގެ ޚިދުމަތް މެދުކަނޑާލަން ޖެހިފައިވާ ކަމަށް އެ ހޮސްޕިޓަލުގެ ޑައިރެކްޓަރު ރިޒާ ބާޒާރާ ހަވާލާދީ ފާރްސް ނިއުސް އެޖެންސީން ރިޕޯޓުކޮށްފައިވެ އެވެ. މި ހަމަލާތަކުގައި އެއްވެސް މީހަކު މަރުވި ކަމުގެ ރިޕޯޓެއް ލިބިފައެއް ނުވެ އެވެ.

ހޮސްޕިޓަލުގެ މެނޭޖަރު ޑޮކްޓަރު މަޖީދު ބޫއަޒަރު އަލްޖަޒީރާއަށް މައުލޫމާތު ދެއްވަމުން ވިދާޅުވީ، އެމެރިކާގެ ހަމަލާތަކާ ގުޅިގެން 211 ބަލިމީހަކު "މަޖުބޫރުވެގެން އެހެން ތަނަކަށް ބަދަލުކުރަން ޖެހުނު" ކަމަށެވެ.

ހޮސްޕިޓަލުގެ މުވައްޒަފަކު އަލްޖަޒީރާއަށް ކިޔައިދިން ގޮތުގައި، އެތަނުގައި އެޑްމިޓްކޮށްފައި ތިބީ ކެންސަރު ބަލިމީހުން ހިމެނޭހެން ހާއްސަ ފަރުވާ ބޭނުންވާ ބަލިމީހުންނެވެ. ނަމަވެސް ހޮސްޕިޓަލް ހުރި ސަރަހައްދަށް ވަރަށް ވަރުގަދައަށް ބޮން އަޅާފައިވާ ކަމަށާއި، ބައެއް ބަލިމީހުން ތިބީ އޮކްސިޖަނާއި ވެންޓިލޭޓަރުގެ އެހީގައި ކަމަށް އޭނާ ބުންޏެވެ.

އޭނާ އިތުރަށް ބުނީ، ބައެއް މީހުން ކުޑަކުދިން އަތްމައްޗަށް އުފުލައިގެން ތިބިއިރު، އަނެއް ބަޔަކު ތިބީ އައިވީ ގުޅާފައި ނުވަތަ ފުރޮޅުލީ ގޮނޑީގައި ކަމަށާއި، އެންމެންވެސް ރައްކާތެރިކަން ހޯދުމަށް ހޮސްޕިޓަލުން ބޭރަށް ނުކުތް ކަމަށެވެ.

އަހްވާޒްގެ ރައްޔިތުންނާ ހަވާލާދީ ލޯކަލް މީޑިއާތަކުން ރިޕޯޓުކޮށްފައިވާ ގޮތުގައި، ބުދަ ދުވަހުގެ ރޭ އެމެރިކާއިން އީރާނުގެ ހުޅަނގު ދެކުނުގެ އެކި ސަރަހައްދުތަކަށް ދިން ހަމަލާތަކުގެ ތެރޭގައި، ހޮސްޕިޓަލް ހުރި ސަރަހައްދާ ކައިރިން ބާރުގަދަ ގޮވުންތަކެއްގެ އަޑު ވަނީ އިވިފަ އެވެ.

ފާރްސް ނިއުސް އެޖެންސީން ބުނި ގޮތުގައި ޝަހީދު ބަޣާއީ ހޮސްޕިޓަލް ހުރި ސަރަހައްދަށް ގިނަ އަދަދެއްގެ މިސައިލް ނުވަތަ ރޮކެޓް ވަނީ އަރާފަ އެވެ. ހަމަލާތަކުގެ ސަބަބުން ބިރުގަނެފައި ތިބި ބަލިމީހުން އެހެން ސިއްހީ މަރުކަޒަކަށް ބަދަލުކުރުމުގެ މަސައްކަތް، މެޑިކަލް ސްޓާފުންނާއި ބަލިމީހުންގެ އާއިލާތަކުން ގުޅިގެން ވަނީ ކޮށްފަ އެވެ.

އަހްވާޒް ޔުނިވާސިޓީ އޮފް މެޑިކަލް ސައިންސަސްއިން ބުނީ، ހޮސްޕިޓަލް ހުރި ސަރަހައްދާ ކައިރިއަށް ދިން ހަމަލާތަކާ ގުޅިގެން، ހޮސްޕިޓަލުގެ ޚިދުމަތް ވަގުތީ ގޮތުން މެދުކަނޑާލާފައިވާ ކަމަށެވެ.

"ދުޝްމަނުން ސިޓީއަށް ދިން ހަމަލާތަކާއި، ހޮސްޕިޓަލާ ކައިރި ސަރަހައްދުތަކުގައި ގޮވުންތައް ގޮވުމާ ގުޅިގެން، ބަލިމީހުންނާއި މުވައްޒަފުންގެ ސަލާމަތާއި ރައްކާތެރިކަމަށްޓަކައި ހޮސްޕިޓަލުގެ ޚިދުމަތް ވަނީ ވަގުތީ ގޮތުން މެދުކަނޑާލެވިފައި،" ޔުނިވާސިޓީން ނެރުނު ބަޔާނުގައިވެ އެވެ.

އީރާނުގެ ހެލްތު މިނިސްޓްރީން ހާމަކުރި ގޮތުގައި، އެމެރިކާއިން އީރާނަށް ދެމުންދާ ހަމަލާތަކުގައި ބުދަ ދުވަހުގެ މެންދުރުގެ ނިޔަލަށް ޒަޚަމްވި މީހުންގެ އަދަދު 300 އަށްވުރެ މައްޗަށް އަރާފައިވާއިރު، 35 މީހަކު ވަނީ މަރުވެފަ އެވެ.

"ބުދަ ދުވަހުގެ މެންދުރު 12:00 އާ ހަމައަށް ލިބުނު މައުލޫމާތަށް ބަލާއިރު، ހަމަލާތަކުގައި ޒަޚަމްވި މީހުންގެ އަދަދު ވަނީ 300 އަށްވުރެ އިތުރުވެފައި. އަދި ހިތާމައާއެކު ފާހަގަކުރަން، އަޅުގަނޑުމެންގެ ގައުމުގެ 35 ރައްޔިތަކު ވަނީ ޝަހީދުވެފައި. މަރުވި މީހުންގެ ތެރޭގައި ދެ އަންހެނުންނާއި 18 އަހަރުން ދަށުގެ ފުރާވަރުގެ ކުއްޖަކު ހިމެނޭ. އެންމެ ބޮޑު ގެއްލުމެއް ލިބިފައިވަނީ ހުރްމުޒްގާން، ސިސްތާން އެންޑް ބަލޫޗިސްތާން، އަދި ހޫޒިސްތާން ޕްރޮވިންސަށް. ޒަޚަމްވި މީހުންގެ ތެރެއިން 72 މީހަކަށް އަދިވެސް ދަނީ ހޮސްޕިޓަލުގައި ފަރުވާ ދެމުން،" މިނިސްޓްރީން ބުންޏެވެ.

ހޮސްޕިޓަލް ކައިރިއަށް މި ހަމަލާ ދީފައިވަނީ، ފާއިތުވި ހަފުތާގައި އެމެރިކާއިން އީރާނަށް ދިން ސިލްސިލާ ހަމަލާތަކާ ގުޅިގެން ހުރްމުޒް ކަނޑުއޮޅީގެ މަސްރަހު ވަރަށް ބޮޑަށް ހޫނުވެފައިވާ ދަނޑިވަޅެއްގަ އެވެ. ތެހެރާނުން ބުނާ ގޮތުގައި މި ހަމަލާތަކަކީ މިދިޔަ މަހު ދެ ގައުމުގެ ދެމެދުގައި ހަނގުރާމަ ހުއްޓާލުމަށް އެއްބަސްވި އެއްބަސްވުމާ ޚިލާފަށް ދިން ހަމަލާތަކެކެވެ. މި ހަމަލާތަކުގެ ރައްދުގައި އީރާނުން ވަނީ ޕާޝިއަން ގަލްފްގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފައެވެ.

އީރާނުން މިހާރު ވަނީ "ވަކި ގޮތެއް އަންގަންދެން" އެ ސަރަހައްދުގެ މުހިންމު ކަނޑުގެ މަގު ބަންދުކޮށްފައިވާ ކަމަށް އިއުލާންކޮށްފަ އެވެ. އަދި އެމެރިކާއިން އެ ސަރަހައްދުގެ ކަންކަމާ ބެހުން ހުއްޓާލަންދެން އެ މަގު ބަންދުކޮށްފައި އޮންނާނެ ކަމަށްވެސް އީރާނުން ބުނެ އެވެ.

ފާއިތުވި ދުވަސްތަކުގައި އެމެރިކާގެ އަސްކަރިއްޔާއިން ވަނީ އާންމުން ދިރިއުޅޭ ބައެއް ތަންތަނަށް އަމާޒުކޮށް ހަމަލާދީފަ އެވެ. 

މީގެ އިތުރުން، ފެބްރުއަރީ 28 ވަނަ ދުވަހު އެމެރިކާއިން ވަނީ މިނާބްގައި ހުންނަ ޝަޖަރޭ ތައްޔިބާ ޕްރައިމަރީ ސްކޫލަށް ތިން ފަހަރެއްގެ މަތިން ހަމަލާދީ، 168 މީހުން މަރާލާފަ އެވެ. މަރުވި މީހުންގެ ތެރޭގައި ގިނައީ ކުޑަކުދިންނެވެ.