އީރާނުން އެމެރިކާއާ މަޝްވަރާކުރުމުގެ ވިސްނުމެއް ނެތް، ފޯކަސް ހުރީ ދިފާއަށް

އީރާނުން މަޝްވަރާކުރުމުގެ އެއްވެސް ވިސްނުމެއް ނެތް ކަމަށާއި، މިހާރު އެ ގައުމުން އެންމެ ބޮޑު އިސްކަމެއް ދެނީ ދިފާއީ ކަންކަމަށް ކަމަށް އީރާނުގެ ޚާރިޖީ ވުޒާރާގެ ތަރުޖަމާނު ވިދާޅުވެއްޖެ އެވެ. އީރާނުގެ ޚާރިޖީ ވުޒާރާގެ ތަރުޖަމާނު ވިދާޅުވީ، މިދިޔަ މަހު ދެ ގައުމުގެ ދެމެދުގައި ސޮއިކުރި ފަހުމުނާމާ (އެމް.އޯ.ޔޫ) އާ އެމެރިކާއިން ޚިލާފުވަމުންދާހާ ހިނދަކު، އެމެރިކާއާއެކު އަލުން މަޝްވަރާތަކަށް ދިއުމުގެ އެއްވެސް ރޭވުމެއް އީރާނުގެ ނެތް ކަމަށެވެ.

އިސްމާއީލް ބަޣާއީ ބުދަ ދުވަހު ވިދާޅުވީ، އީރާނުގެ ސަރަހައްދުތަކަށް އެމެރިކާއިން ދެމުންދާ ހަމަލާތަކުން ދިފާއުވުމަށާއި، އެ ހަމަލާތަކަށް ރައްދު ދިނުމަށް މިވަގުތު އީރާނުން ބޮޑު ސަމާލުކަމެއް ދެމުންދާ ކަމަށެވެ.

އެމެރިކާއިން އީރާނަށް ދެމުންދާ ހަމަލާތަކުގެ ސަބަބުން ތެހެރާން އަލުން މަޝްވަރާގެ މޭޒަށް އަންނަން މަޖުބޫރުވާނެ ކަމަށް ބުނެ އެމެރިކާއިން ކުރަމުންދާ ދައުވާތަކަށް ރައްދު ދެއްވަމުން ބަގާއީ ވިދާޅުވީ، މިވަގުތު މަޝްވަރާ ކުރުމުގެ އެއްވެސް ޕްލޭނެއް ނެތް ކަމަށާއި، މުޅި ގައުމުގެ ފޯކަސް ހުރީ ދިފާއީ ކަންކަމަށް ކަމަށެވެ.

ތަރުޖަމާނު ވިދާޅުވީ، ޖޫން މަހުގެ 17 ވަނަ ދުވަހު އެމެރިކާއާއެކު ސޮއިކުރި ފަހުމުނާމާގެ ދަށުން ވޮޝިންގްޓަނުން ވެފައިވާ އިލްތިޒާމްތަކާ ތަކުރާރުކޮށް ޚިލާފުވަމުންދާތީ، އެ އެއްބަސްވުމުގެ އުސޫލުތަކަށް އަމަލުކުރުމަށް އީރާނަށް ދެން މަޖުބޫރު ނޫން ކަމަށެވެ.

އޭނާ ވިދާޅުވީ، ފަހުމުނާމާއަކީ ދެފަރާތުން ވެފައިވާ އިލްތިޒާމްތަކެއް ކަމަށާއި، އަނެއް ފަރާތުން އެއްބަސްވުމާ ޚިލާފުވެއްޖެ ނަމަ އީރާނުން ވެސް އެ އިލްތިޒާމްތައް ފުރިހަމަކުރުމުން ދުރުހެލިވާނެ ކަމަށެވެ. އަދި މިއީ އީރާނުން ގެންގުޅޭ އުސޫލެއް ކަމަށާއި، ކުރިއަށް އޮތް ތަނުގައި ވެސް އަމަލުކުރާނީ އެގޮތަށް ކަމަށް އޭނާ ވިދާޅުވި އެވެ.

ބަޣާއީ އިތުރަށް ވިދާޅުވީ، އެމެރިކާއިން ވަނީ އެ ފަހުމުނާމާގެ އެންމެ ފުރަތަމަ މާއްދާއިން ފެށިގެން ވެސް ބަދުނިޔަތުގައި އަމަލުކޮށް، ވެފައިވާ ވައުދުތަކާ ޚިލާފުވެފައި ކަމަށެވެ. އަދި އެމެރިކާގެ ބިރުދެއްކުންތަކާއި ނުފޫޒު ފޯރުވުމާ ދެކޮޅަށް ތެދުވުމަށް އީރާނުގެ އެތެރޭގެ ހުރިހާ ފަރާތްތަކެއްގެ ތާއީދު އެ ސިޔާސަތަށް އެބައޮތް ކަމަށް އެ ޑިޕްލޮމެޓް ވިދާޅުވި އެވެ.

އޭނާ ވިދާޅުވީ، އީރާނަށް ހަމަލާދޭ ކޮންމެ ފަރާތަކަށް އެ ގައުމުގެ ހަތިޔާރު އެޅި ސިފައިން ފުރިހަމަ ބާރާއެކު ރައްދު ދޭނެ ކަމަށެވެ. އަދި ހަމަލާއެއް ދީފި ނަމަ، އޭގެ ބަދަލުގައި ހަމަލާ ރައްދުކުރާނެ ކަމަށް ވެސް އޭނާ ވިދާޅުވި އެވެ.

މި ވާހަކަތައް އައިސްފައިވަނީ އީރާނުގެ ދެކުނުގެ އައްސޭރިފަށުގެ ސަރަހައްދުތަކަށް އެމެރިކާއިން މެދުނުކެނޑި ހަމަލާދެމުންދާ ދަނޑިވަޅެއްގަ އެވެ. އެމެރިކާއިން ބުނަމުންދަނީ މި ހަމަލާތަކަކީ ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އަމާޒުކޮށް އީރާނުން ހަމަލާދިނުމުގެ ގާބިލުކަން ކުޑަކުރުމަށް ދޭ ހަމަލާތަކެއް ކަމަށެވެ.

ނަމަވެސް، އީރާނުން ވަނީ އެމެރިކާގެ މި ތުހުމަތުތައް ދޮގުކޮށްފަ އެވެ. އީރާނުން ބުނާ ގޮތުގައި، ދުނިޔޭގެ ހަކަތަ ފޯރުކޮށްދިނުމުގައި މުހިންމު ދައުރެއް އަދާކުރާ ޕާޝިއަން ގަލްފްގެ ހުރްމުޒް ކަނޑުއޮޅިން ދަތުރުފަތުރު ކުރުމުގެ ކަންކަން ބެލެހެއްޓުމުގެ މަސްއޫލިއްޔަތު، ތެހެރާނާއި ވޮޝިންގްޓަނާ ދެމެދު އެއްބަސްވި 14 ނުކުތާގެ ފަހުމުނާމާގެ 5 ވަނަ މާއްދާގެ ދަށުން ހަވާލުކޮށްފައިވަނީ އީރާނާ އެވެ.