ޖުލައި 23 އަށް ދައުލަތަށް 24.1 ބިލިއަން ރުފިޔާގެ އާމްދަނީ ލިބިއްޖެ

މި އަހަރުގެ ޖުލައި މަހުގެ 23 ވަނަ ދުވަހުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 24.1 ބިލިއަން ރުފިޔާ ލިބިފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ ހިސާބުތަކުން ދައްކައިފި އެވެ. މި މުއްދަތުގެ ތެރޭގައި ދައުލަތުގެ ޖުމްލަ ޚަރަދު 25.5 ބިލިއަން ރުފިޔާއަށް އަރާފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު އިތުރު އަދަދެކެވެ. މިދިޔަ އަހަރުގެ މި މުއްދަތުގައި ދައުލަތަށް ލިބިފައިވަނީ 21.7 ބިލިއަން ރުފިޔާގެ އާމްދަނީއެއް ކަމަށްވާއިރު، ޚަރަދު ހުރީ 21.2 ބިލިއަން ރުފިޔާގަ އެވެ.

ދައުލަތަށް ލިބުނު އާމްދަނީގެ ތަފްސީލަށް ބަލާއިރު، އެންމެ ބޮޑު ބައެއް ހިއްސާކުރަނީ ޓެކްސް އާމްދަނީ އެވެ. އެގޮތުން ޓެކްސްގެ ގޮތުގައި 18.3 ބިލިއަން ރުފިޔާ ލިބިފައިވާއިރު، މީގެ ތެރެއިން ޖީއެސްޓީގެ ގޮތުގައި 9.9 ބިލިއަން ރުފިޔާ ވަނީ ލިބިފަ އެވެ. ޚާއްޞަކޮށް ޓޫރިޒަމް ޖީއެސްޓީގެ ގޮތުގައި 6.9 ބިލިއަން ރުފިޔާ ލިބިފައިވާކަން ފާހަގަކުރެވެ އެވެ. ޓެކްސް ނޫން އާމްދަނީގެ ގޮތުގައި 5.3 ބިލިއަން ރުފިޔާ ލިބިފައިވާއިރު، ހިލޭ އެހީގެ ގޮތުގައި 454.2 މިލިއަން ރުފިޔާ ވަނީ ލިބިފަ އެވެ. މި ހަފުތާގައި އާމްދަނީއަށް އެންމެ ބޮޑު ކުރިއެރުމެއް ލިބިފައިވަނީ ޓޫރިޒަމް ޖީއެސްޓީންނެވެ.

ޚަރަދުތަކުގެ ތަފްސީލަށް ބަލާއިރު، ހިނގަމުންދާ ޚަރަދު ނުވަތަ ރިކަރަންޓް އެކްސްޕެންޑިޗާގެ ގޮތުގައި 22.3 ބިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރެއިން މުވައްޒަފުންގެ މުސާރަ އާއި އިނާޔަތްތަކަށް 8.5 ބިލިއަން ރުފިޔާ ހޭދަކޮށްފައިވާއިރު، އިދާރީ އަދި ހިންގުމުގެ ޚަރަދުތަކަށް 13.7 ބިލިއަން ރުފިޔާ ވަނީ ހޭދަވެފަ އެވެ. މި ހަފުތާގައި ބަޖެޓުން އެންމެ ބޮޑު އިތުރުވުމެއް އައިސްފައިވަނީ މުސާރަ އާއި ޕެންޝަނަށް ކުރި ހޭދައިންނެވެ. ކެޕިޓަލް ޚަރަދުގެ ގޮތުގައި 3.2 ބިލިއަން ރުފިޔާ ހޭދަކޮށްފައިވާއިރު، މީގެ ތެރެއިން ބިމާއި އިމާރާތް ކުރުމަށް 1 ބިލިއަން ރުފިޔާ އަދި އިންފްރާސްޓްރަކްޗާ މަޝްރޫއުތަކަށް 1.8 ބިލިއަން ރުފިޔާ ވަނީ ހޭދަކޮށްފަ އެވެ.

ސަރުކާރުގެ އޮފީސްތަކުން ބަޖެޓު ބޭނުންކޮށްފައިވާ މިންވަރަށް ބަލާއިރު، އެންމެ ބޮޑު ހޭދައެއް ކޮށްފައިވަނީ މިނިސްޓްރީ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓުންނެވެ. އެ މިނިސްޓްރީން 2.8 ބިލިއަން ރުފިޔާ ހޭދަކޮށްފައިވެ އެވެ. މީގެ އިތުރުން މިނިސްޓްރީ އޮފް އިންފްރާސްޓްރަކްޗާ، ހައުސިންގ އެންޑް އަރބަން ޑިވެލޮޕްމަންޓުން 2.2 ބިލިއަން ރުފިޔާ، ނޭޝަނަލް ސޯޝަލް ޕްރޮޓެކްޝަން އެޖެންސީން 1.9 ބިލިއަން ރުފިޔާ، އަދި މިނިސްޓްރީ އޮފް ހެލްތުން 1.5 ބިލިއަން ރުފިޔާ ވަނީ ހޭދަކޮށްފަ އެވެ. ފުލުހުންގެ ޚިދުމަތަށް 1.4 ބިލިއަން ރުފިޔާ އަދި އެމްއެންޑީއެފަށް 1.2 ބިލިއަން ރުފިޔާ ވަނީ ބަޖެޓުން ބޭނުންކޮށްފަ އެވެ.

ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫއުތަކަށް ބަލާއިރު، ޖުމްލަ 3.2 ބިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރެއިން އެންމެ ބޮޑު ހޭދައެއް ކޮށްފައިވަނީ އިގްތިސާދީ ދާއިރާގެ މަޝްރޫއުތަކަށެވެ. އެގޮތުން ދަތުރުފަތުރުގެ އިންފްރާސްޓްރަކްޗާއަށް 1 ބިލިއަން ރުފިޔާ އަދި ފެނާއި ނަރުދަމާގެ މަޝްރޫއުތަކަށް 213.3 މިލިއަން ރުފިޔާ ހޭދަކޮށްފައިވެ އެވެ. ތައުލީމީ ދާއިރާގެ މަޝްރޫއުތަކަށް 291.6 މިލިއަން ރުފިޔާ އަދި ސިއްހީ ދާއިރާގެ މަޝްރޫއުތަކަށް 211.3 މިލިއަން ރުފިޔާ ވަނީ ހޭދަކޮށްފަ އެވެ.

ދައުލަތުގެ މާލީ ހާލަތަށް ބަލާއިރު، މި މުއްދަތުގެ ނިޔަލަށް ބަޖެޓުގެ ޖުމްލަ ބެލެންސް ހުރީ 1.4 ބިލިއަން ރުފިޔާގެ ޑެފިސިޓެއްގަ އެވެ. 

ސަރުކާރުން ދޫކޮށްފައިވާ ސެކިއުރިޓީޒްތަކަށް ބަލާއިރު، 13 ޖުލައި 2026 ގެ ނިޔަލަށް ޖުމްލަ 97.3 ބިލިއަން ރުފިޔާގެ ސެކިއުރިޓީޒް ބާޒާރުގައި އެބަހުއްޓެވެ. މީގެ ތެރެއިން އެންމެ ބޮޑު ބައެއް ހިއްސާކުރަނީ އެތެރޭގެ މާކެޓަށް ދޫކޮށްފައިވާ އިންސްޓްރޫމަންޓްތަކެވެ. އެގޮތުން ދިވެހި ރުފިޔާގެ ޓްރެޜަރީ ބިލްގެ ގޮތުގައި 44.9 ބިލިއަން ރުފިޔާ އަދި ދިވެހި ރުފިޔާގެ ޓްރެޜަރީ ބޮންޑުގެ ގޮތުގައި 28.6 ބިލިއަން ރުފިޔާ ހިމެނެ އެވެ. އިސްލާމިކް އިންސްޓްރޫމަންޓްތަކުގެ ގޮތުގައި 5.8 ބިލިއަން ރުފިޔާ ހުރިކަން ފާހަގަކުރެވެ އެވެ.