ފޯމިއުލާ ވަން: މެލޭޝިއާ ޖީޕީގެ އެއްވަނަ ހޯދީ ވާސްޓެޕަން

ފޯމިއުލާ ވަންގެ މެލޭޝިއާ ގްރޭންޑް ޕްރީ ނެދަލޭންޑްސްގެ މެކްސް ވާސްޓެޕަން ކާމިޔާބު ކޮށްފިއެވެ.

މެލޭޝިއާގެ "ސޭޕަންގް އިންޓަނޭޝަނަލް ސާކިޓް" ގައި ކުރިޔަށް ދިޔަ މި ރޭސް ރެޑްބުލް ރޭސިންއަށް ނިސްބަތްވާ ވާސްޓެޕަން ކާމިޔާބު ކޮށްފައިވަނީ މާސިޑީސްގެ ލުއިސް ހެމިލްޓަންއާ ހަމަ އޭނާގެ ޓީމުގެ ޑެނިއެލް ރިކާޑޯ ފަހަތަށް ޖައްސާލުމަށް ފަހުއެވެ.

56 ލެޕްގެ މި ރޭސް ވާސްޓެޕަން ނިންމާފައިވަނީ އެއް ގަޑިއިރާ ތިރީސް މިނެޓުންނެވެ. އޭނާގެ ފަހަތުން ދެވަނައަށް ނިންމި މާސިޑީސް ރޭސިންގެ ލުއިސް ހެމިލްޓަންއަށް ރޭސް ނިންމުނީ ވާސްޓެޕަންއަށް ވުރެ 12 ސިކުންތު ފަހުންނެވެ. އަދި ތިންވަނައަށް ރޭސް ނިންމި ރެޑްބުލް ރޭސްންގެ ޑެނިއެލް ރިކާޑޯއަށް ރޭސް ނިންމާލެވިފައިވަނީ ވާސްޓެޕަންއަށް ވުރެ 22 ސިކުންތު ލަހުންނެވެ.

ފޯމިއުލާ ވަން ވޯލްޑް ޗެމްޕިއަންޝިޕުގައި ހެމިލްޓަންއާ އެންމެ ބޮޑަށް ވާދަކުރަމުން އަންނަ ފެރާރީގެ ސެބެސްޓިއަން ވެޓެލް އެންމެ ފަހަތުގައި އޮވެގެން ރޭސް ފެށިއިރު އޭނާއަށް ރޭސް ނިންމާލެވުނީ ހަތަރު ވަނައިގައެވެ.

ރޭސް ނިންމާލުމަށް ފަހު ނޫސްވެރިންނާ ވާހަކަ ދައްކަމުން ވާސްޓެޕަން ބުނެފައިވަނީ އޭނާގެ 20 ވަނަ އުފަންދުވަހުގެ ހަދިޔާއަކަށް ރޭހުން އެއްވަނަ ލިބުމަކީ ވަރަށް އުފާވާ ކަމެއް ކަމަށާއި ބާކީ ހުރި ރޭސްތަކުގައި ރަނގަޅު ނަތީޖާއެއް ނެރެ އަންނަ ސީޒަނުގައި ޗެމްޕިއަންޝިޕަށް ވާދަކުރަން ބޭނުންވާ ކަމަށެވެ. އަދި ރޭސް ފެށިއިރު ރޭސް ކާމިޔާބު ކުރެވިދާނެ ކަމުގެ އެއްވެސް އުއްމީދެއް ވެސް ނެތް ކަމަށް ވާސްޓެޕަން ބުނެފައިވެއެވެ.

ފޯމިއުލާ ވަން ވޯލްޑް ޗެމްޕިއަންޝިޕްގެ އެއްވަނައިގައި ހެމިލްޓަން އޮތީ 281 ޕޮއިންޓާއެކެއެވެ. ފެރާރީގެ ޑްރައިވަރު ވެޓެލް އޮތީ 247 ޕޮއިންޓާއެކު ދެވަނައިގައެވެ. އަދި 222 ޕޮއިންޓާއެކު ތިންވަނައިގައި އޮތީ މާސިޑީސްގެ ވަލްޓޭރީ ބޯޓާސްއެވެ.

ޓީމުތަކުގެ ރޭންކިންގެ އެއްވަނައިގައި 503 ޕޮއިންޓާއެކު މާސިޑީސް އޮތްއިރު 385 ޕޮއިންޓާއެކު ދެވަނައިގައި އޮތީ ފެރާރީއެވެ. ފޯމިއުލާ ވަންގެ ސީޒަނުގައި ބާކީ ފަސް ރޭސް އޮތްއިރު ދެން ރޭހެއް ދެން އޮންނާނީ އޮކްޓޯބަރު މަހުގެ އަށްވަނަ ދުވަހު ޖަޕާނުގެ "ސުޒުކާ ސާކިޓް" ގައެވެ.