އިރާގުގެ ނޫޖަބާ ޖަމާއަތުން އެމެރިކާއާއި ސައުދީއަށް އިންޒާރު، "ބޮޑު އަގަކުން ބަދަލު ހިފާނަން"

އިރާގުގެ ނޫޖަބާ މޫވްމަންޓުން އެމެރިކާއާއި ސައުދީ އަރަބިއްޔާއަށް އިންޒާރުދީ، އެ ގައުމުތަކުގެ މަސްލަހަތުތަކަށް "ބޮޑު އަގަކުން ބަދަލު ހިފާނެ" ކަމަށް ބުނެފި އެވެ. މި އިންޒާރު ދީފައިވަނީ އިރާގުގެ އެކި ސަރަހައްދުތަކަށް އަމާޒުކޮށް ރޭގަނޑުގެ ވަގުތެއްގައި ދިން ވައިގެ ހަމަލާތަކުގައި މަދުވެގެން 20 މީހުން މަރުވެ، އެތައް ބަޔަކު ޒަޚަމްވުމާ ގުޅިގެންނެވެ.

ބުދަ ދުވަހު ނެރުނު ބަޔާނެއްގައި، އިރާގުގެ ހަރަކާތު ހިޒްބުﷲ އަލް-ނޫޖަބާއިން ވަނީ ބަޣުދާދު، ބަސްރާ، ކަރުބަލާ، ކިރްކޫކް އަދި ނިނުވެހް ހިމެނޭހެން އެކި ޕްރޮވިންސްތަކަށް އެމެރިކާއާއި ސައުދީން ދިން ހަމަލާތައް ހަރުކަށި އިބާރާތުން ކުށްވެރިކޮށްފަ އެވެ.

ޢިރާޤުގެ ދިޔާލާ ޕްރޮވިންސްގެ އަލް-މިޤްދާދިއްޔާ ޑިސްޓްރިކްޓްގެ އުތުރު ސަރަޙައްދަށް 2026 ޖުލައި 29 ވަނަ ދުވަހު ދިން ހަމަލާއެއްގައި ގެއްލުން ލިބުނު ސަރަހައްދެއްގައި ސަލާމަތީ ބާރުތަކާއި ކުއްލި ހާލަތްތަކުގައި ހަރަކާތްތެރިވާ ފަރާތްތަކުން މަސައްކަތް ކުރަމުންދަނީ. | އޭއެފްޕީ

އެ ހަރަކާތުން ވަނީ އިރާގުގެ ބިމުން އެމެރިކާގެ ހުރިހާ އަސްކަރީ މަރުކަޒުތަކާއި ހެޑްކުއާޓަރުތައް ވަގުތުން ބޭރުކުރުމަށް ގޮވާލާފަ އެވެ. އަދި އެމެރިކާގެ އަސްކަރީ ހާޒިރީއަކީ ގައުމުގެ ސަލާމަތާއި ހަމަޖެހުމަށް އޮތް "ދާއިމީ އަދި ނުރައްކާތެރި ބިރެއް" ކަމަށް އެ ޖަމާއަތުން ސިފަކޮށްފައިވެ އެވެ.

މީގެ އިތުރުން، ސައުދީ އަރަބިއްޔާއަކީ އިރާގާ ދެކޮޅަށް ހިންގާ ޓެރަރިޒަމްގެ މައިގަނޑު ސްޕޮންސަރެއް ކަމަށް ބުނެ، އެ ގައުމާއެކު އޮންނަ ހުރިހާ ގުޅުންތަކެއް ވަގުތުން މެދުކަނޑާލުމަށް ބަޣުދާދު ސަރުކާރަށް ނޫޖަބާ މޫވްމަންޓުން ވަނީ ގޮވާލާފަ އެވެ.

މި ހަމަލާތަކާ ގުޅިގެން އިރާގު ސަރުކާރުން ގެންގުޅޭ ސިޔާސަތަށް ފާޑުކިޔަމުން އެ ޖަމާއަތުން ބުނީ، ހަމައެކަނި "ރުޅިވެރިކަމުގެ ބަޔާންތަކާއި ކުށްވެރިކުރުމުގެ" ބަދަލުގައި އަމަލީ ފިޔަވަޅު އަޅަންޖެހޭ ކަމަށެވެ. އަދި މިފަދަ ބަޔާންތަކުގެ ސަބަބުން އިތުރު ހަމަލާތައް ދިނުމަށް ބާރު ލިބޭ ކަމަށްވެސް ބުނެފައިވެ އެވެ.

އިރާގުގެ ވައިގެ ސަރަހައްދު ރައްކާތެރިކުރުމަށްޓަކައި އެންމެ ޒަމާނީ އެއާ ޑިފެންސް ސިސްޓަމްތައް ވަގުތުން ގާއިމުކުރުމަށާއި، ގައުމުގެ އިސްތިގުލާލު ހިމާޔަތްކުރުމުގައި އިހުމާލުވި ފަރާތްތައް ޖަވާބުދާރީ ކުރުވުމަށްވެސް އެ ޖަމާއަތުން ވަނީ ގޮވާލާފަ އެވެ.

އެމެރިކާއާއި ސައުދީ އަރަބިއްޔާއިން އިރާގުގެ އިސްތިގުލާލަށް އަރައިގަތުމަށް ފުރުސަތު ނުދޭނެ ކަމަށާއި، އެ ގައުމުތަކުގެ މަސްލަހަތުތަކާއި ސަލާމަތަށް ބޮޑު ގެއްލުމެއް ދީގެން ނޫނީ މިކަން ދޫކޮށްނުލާނެ ކަމަށް އެ މޫވްމަންޓުން ވަނީ ބުނެފަ އެވެ.

އިރާގުގެ ރައީސް ނިޒާރު އާމިދީ ވެސް ވަނީ މި ހަމަލާތައް ކުށްވެރިކުރައްވާފަ އެވެ. އެމަނިކުފާނު ވިދާޅުވީ މިއީ ބަލައިގަނެވޭނެ ކަމެއް ނޫން ކަމަށާއި، ބައިނަލްއަގުވާމީ ގާނޫނުތަކާއި އދ. ގެ ޗާޓަރާ ޚިލާފަށް އިރާގުގެ ރަސްމީ ސަލާމަތީ މުއައްސަސާތަކަށް އަމާޒުކޮށް ދީފައިވާ މި ހަމަލާއަކީ އިރާގުގެ އިސްތިގުލާލަށް އަރައިގަތުން ކަމަށެވެ.

އިރާގުގެ ބިމަކީ އަވަށްޓެރި ގައުމުތަކަށް ހަމަލާދޭން ބޭނުންކުރާ ތަނަކަށް ނުވަތަ ސަރަހައްދީ އަދި ބައިނަލްއަގުވާމީ މައްސަލަތައް ނިންމާ މައިދާނަކަށް ހަދައިގެން ނުވާނެ ކަމަށް އާމިދީ ވިދާޅުވި އެވެ. އަދި ހުރިހާ ފަރާތްތަކުން ވެސް އިރާގުގެ އިސްތިގުލާލަށް އިހުތިރާމްކުރުމަށާއި، ގައުމުގެ ސަލާމަތާއި ހަމަޖެހުމަށް ބުރޫއަރާފަދަ އަމަލުތަކުން ދުރުހެލިވުމަށް އެމަނިކުފާނު އިލްތިމާސްކުރެއްވި އެވެ.