އިރާނުގެ އުތުރުގެ ސަރަހައްދުތަކަށް އެމެރިކާ ސިފައިން ވަރުގަދަ ހަމަލާތަކެއް ދީފި

އިރާނުގެ އުތުރުގެ ސަރަހައްދުތަކަށް އަމާޒުކޮށް އެމެރިކާ ސިފައިން ވަރުގަދަ ހަމަލާތަކެއް ދީފި ކަމަށާއި، މިއީ ފަހަކަށް އައިސް ދެ ގައުމުގެ ދެމެދުގައި އުފެދިފައިވާ ނުތަނަވަސްކަމުގެ ތެރެއިން އެ ސަރަހައްދަށް ހަމަލާދިން ފުރަތަމަ ފަހަރު ކަމަށް އެމެރިކާގެ އަސްކަރިއްޔާއިން ބުނެފި އެވެ.

އިރާނުގެ ވެރިރަށް ތެހެރާންގެ އެއާ ޑިފެންސް ސިސްޓަމްތައް ހަރަކާތްތެރިވާން ފަށާފައިވާއިރު، ބަންދަރު އައްބާސް، ގޭޝްމް އައިލެންޑް، ސިރިކް، ޗަބަހާރު، ކޮނަރަކް، ރާސްކް، ހުންދާބް، ހުރަމްއާބާދު އަދި ސެމްނާން ފަދަ ސަރަހައްދުތަކަށް ހަމަލާތައް އަމާޒުވެފައިވާ ކަމަށް އެ ގައުމުގެ މީޑިއާތަކުން ވަނީ ރިޕޯޓްކޮށްފަ އެވެ.

އެމެރިކާގެ ހަމަލާތަކުގެ ބަދަލުހިފުމުގެ ގޮތުން ބަހްރައިން، ކުވެއިތު އަދި އުރުދުންގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތަކެއް ދީފައިވާ ކަމަށް އިރާނުން ވަނީ ބުނެފަ އެވެ. މި ހަމަލާތަކާ ގުޅިގެން އުރުދުންގެ ސަރުކާރުން ބުނީ އިރާނުން ފޮނުވާލި އަށް މިސައިލެއް ވައްޓާލާފައިވާ ކަމަށެވެ.

އަނެއްކޮޅުން އިރާގުގެ ކުރުދީ ސަރަހައްދެއް ކަމަށްވާ އަރްބީލް ސިޓީއަށް ދިން ޑްރޯން ހަމަލާތައް އެ ގައުމުގެ ބޮޑުވަޒީރު އަލީ އަލް ޒައިދީ ވަނީ ހަރުކަށި އިބާރާތުން ކުށްވެރިކުރައްވާފަ އެވެ.