ފަތުރުވެރިކަން އަދިވެސް ދަށް، މިދިޔަ އަހަރާ އަޅާ ބަލާއިރު މިއަހަރުގެ މިހާތަނަށް އައި ފަތުރުވެރިންގެ އަދަދު 4.6 އިންސައްތަ ދަށް!

ރާއްޖޭގެ ފަތުރުވެރިކަން ކުރިއާ އެއްވަރަށް ރަނގަޅުވެފައިވާ ކަމަށާއި ފަތުރުވެރިކަމުން ލިބޭ ނަފާ އިތުރުވަމުންދާ ކަމަށް މި ސަރުކާރުން ބުނި ނަމަވެސް، މިއަހަރުގެ މިހާތަނަށް ރާއްޖެ ޒިޔާރަތް ކުރި ފަތުރުވެރިންގެ އަދަދު މިދިޔަ އަހަރާ އަޅާބަލާއިރު އަދިވެސް ދަށް ކަމަށް ޓޫރިޒަމް މިިނިސްޓްރީގެ ތަފާސްހިސާބުތަކުން ދައްކައިފި އެވެ.

އެ މިނިސްޓްރީ އިން އާންމު ކޮށްފައިވާ ތަފާސްހިސާބަށް ބަލާއިރު މި އަހަރުގެ ޖުލައި މަހުގެ 22 ވަނަ ދުވަހުގެ ނިޔަލަށް ރާއްޖެއަށް 1.19 މިލިއަނަށް ވުރެ ގިނަ ފަތުރުވެރިން ޒިޔާރަތް ކޮށްފައިވެ އެވެ. ޓޫރިޒަމް މިނިސްޓްރީގެ ރިޕޯޓުގައިވާ ގޮތުން، މި މުއްދަތުގެ ތެރޭގައި ރާއްޖެއަށް ޖުމްލަ 1,198,343 (އެއް މިލިއަން އެއް ލައްކަ ނުވަދިހަ އަށް ހާސް ތިން ސަތޭކަ ސާޅިސް ތިން) ފަތުރުވެރިން އައިސްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 4.6 އިންސައްތައިގެ ދަށްވުމެކެވެ. 

ރާއްޖެއަށް އެންމެ ގިނައިން ފަތުރުވެރިން އަންނަ މާކެޓުތަކަށް ބަލާއިރު، ލިސްޓުގެ އެއްވަނައިގައި އޮތީ ޗައިނާ އެވެ. ޗައިނާއިން 201,739 ފަތުރުވެރިން އައިސްފައިވާއިރު، މިއީ މާކެޓް ހިއްސާގެ 17.2 އިންސައްތަ އެވެ. ދެވަނައި ގައި 14.6 އިންސައްތަ ހިއްސާއާއެކު ރަޝިޔާ އޮތްއިރު، ތިން ވަނައި ގައި އޮތީ 8.0 އިންސައްތަ ހިއްސާކުރާ އިނގިރޭސިވިލާތެވެ.

މީގެ އިތުރުން އިޓަލީ، ޖަރުމަނުވިލާތް، އިންޑިއާ، ފްރާންސް، އެމެރިކާ، އޮސްޓްރޭލިއާ އަދި ސުވިޒަލޭންޑަކީ ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކެވެ. މީގެ ތެރެއިން ޗައިނާ ފަތުރުވެރިންގެ 66.5 އިންސައްތަ ރިސޯޓުތަކުގައި މަޑުކުރާއިރު، ރަޝިޔާ ފަތުރުވެރިންގެ 80.9 އިންސައްތަ އިސްކަންދެނީ ލޯކަލް ޓުއަރިޒަމަށެވެ.

ފަތުރުވެރިން ރާއްޖެއަށް އެތެރެވާ ބަނދަރުތަކަށް ބަލާއިރު، 97.5 އިންސައްތަ ފަތުރުވެރިން ރާއްޖެ އައިސްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. އެއީ 1,168,608 (އެއް މިލިއަން އެއް ލައްކަ ފަސްދޮޅަސް އަށް ހާސް، ހަ ސަތޭކަ އަށް) ފަތުރުވެރިންނެވެ. މީގެ އިތުރުން ގަން އިންޓަނޭޝަނަލް އެއާޕޯޓާއި، މާފަރު އިންޓަނޭޝަނަލް އެއާޕޯޓާއި، ހަނިމާދޫ އިންޓަނޭޝަނަލް އެއާޕޯޓުގެ އިތުރުން ވިލާ އިންޓަނޭޝަނަލް އެއާޕޯޓާއި ދ. އެއާޕޯޓަށް ވެސް ފަތުރުވެރިން ވަނީ އައިސްފަ އެވެ. ކަނޑުމަގުން ރާއްޖެއަށް ޒިޔާރަތް ކޮށްފައި ވަނީ 15,577 ފަތުރުވެރިންނެވެ. 

ރާއްޖޭގެ ފަތުރުވެރިކަމުގެ ބެޑް ކެޕޭސިޓީއަށް ބަލާއިރު، މިހާރު އޮޕަރޭޝަނުގައި ޖުމްލަ 68,266 އެނދު އެބަހުއްޓެވެ. މީގެ ތެރެއިން 66 އިންސައްތަ ނުވަތަ 45,115 އެނދަކީ ރިސޯޓުތަކުގެ އެނދެވެ. ގެސްޓްހައުސްތަކުގައި 16,982 އެނދު ހުރިއިރު، މިއީ ޖުމްލަ ކެޕޭސިޓީގެ 25 އިންސައްތަ އެވެ. ސަފާރީ އުޅަނދުފަހަރުގައި 3,515 އެނދު އަދި ހޮޓާތަކުގައި 2,654 އެނދު އޮޕަރޭޝަނުގައި އެބަހުއްޓެވެ. 

ރާއްޖޭގެ އިގްތިސާދުގެ މައި ނާރަކީ ފަތުރުވެރިކަން ކަމުގައިވާއިރު، ފަތުރުވެރިން އަންނަ މިންވަރު ދަށްވުމަކީ ރިސޯޓުތަކާއި ގެސްޓްހައުސްތަކާއި އެއާލައިންތަކުގެ އިތުރުން ފަތުރުވެރިކަމާ ގުޅުންހުރި އެހެނިހެން ވިޔަފާރިތަކަށް ނޭދެވޭ އަސަރު ކުރާނެ ކަމެކެވެ. 

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދަށްވަމުން ދިއުމުގެ ސަބަބުން ރާއްޖޭގެ އިގްތިސާދަށާއި ފަތުރުވެރިކަމުގެ ސިނާއަތަށް ބޮޑެތި ގެއްލުންތަކެއްވަމުންދާތީ، އެކަމުގެ ކަންބޮޑުވުން ފާޅުކޮށް ސަރުކާރުގެ ކުއްލި އެހީތެރިކަމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އާއި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އިން ވަނީ އެދިފަ އެވެ.