އީރާާންގެ ވަރުގަދަ އިންޒާރެއް ޔޫކްރެއިން އަށް

ކެސްޕިއަން ކަނޑުގައި އީރާންގެ ވިޔަފާރި ބޯޓަކަށް ޔޫކްރެއިންގެ ސިފައިން ހަމަލާ ދީ، އެ ބޯޓުގައި މަސައްކަތް ކުރާ މީހުން މަރުވުމާ ގުޅިގެން، އީރާން އިން ޔޫކްރެއިން އަށް ވަރުގަދަ އިންޒާރެއް ދީފި އެވެ. 

ހޮނިހިރު ދުވަހު ހިނގި މި ހާދިސާއާ ގުޅޭ ގޮތުން އީރާންގެ ޤާނޫނު ހަދާ މަޖިލީހުގެ ޤައުމީ ސަލަމާތީ ކޮމިޝަންގެ ރައީސް އިބްރާހީމް އަޒީޒީ ވަނީ އެކްސްގައި ޕޯސްޓެއް ކުރައްވައިފަ އެވެ. އެ ޕޯސްޓުގައި އަޒީޒީ ވިދާޅުވީ، ޔޫކްރެއިން އިން ދިން ހަމަލާގެ ބަދަލު އީރާން އިން ހިފާނެ ކަމަށާއި، އީރާން އަށް އަމާޒުކޮށް ދޭ ކޮންމެ ހަމަލާއަކަށް ވެސް އަގު ދައްކަން ޖެހޭނެ ކަމަށެވެ.

މީގެ އިތުރުން އަޒީޒީ ވިދާޅުވެފައި ވަނީ، މިއީ ބަލައި ގަނެވޭނެ ކަމެއް ނޫން ކަމަށާއި، އީރާން އިން މި މައްސަލަ ދޫކޮށް ނުލާނެ ކަމަށެވެ. އަދި އީރާންގެ ވިޔަފާރި ބޯޓަށް ދިން އެ ހަމަލާ އަކީ، ބައިނަލްއަޤުވާމީ ޤާނޫނާ ޚިލާފަށް ދިން ހަމަލާއެއް ކަމަށް ވެސް އަޒީޒީ ވަނީ ފާހަގަ ކުރައްވައިފަ އެވެ. 

ކެސްޕިއަން ކަނޑުގައި އީރާންގެ ބޯޓަކަށް ދިން މި ހަމަލާގެ ސަބަބުން، އެ ބޯޓުގައި މަސައްކަތް ކުރި މުވައްޒަފަކު ވަނީ މަރުވެފައި އެވެ. އަދި އެހެން މުވައްޒަފަކަށް އިތުރު އަނިޔާތަކެއް ވެސް ލިބިފައިވެ އެވެ. އީރާން އިން އެންމެ ފުރަތަމަ ވެސް ބުނެފައި ވަނީ، މިއީ ޔޫކްރެއިންގެ ސިފައިން ދީފައިވާ ހަމަލާއެއް ކަމަށެވެ. 

މި ހަމަލާއާ ގުޅިގެން ޔޫކްރެއިން އިން މިހާތަނަށް ރަސްމީ އެއްވެސް އެއްޗެއް ބުނެފައި ނުވެ އެވެ. ކެސްޕިއަން ކަނޑުގައި ހިނގި މި ހާދިސާގެ ސަަބަބުން ބައިނަލްއަޤުވާމީ މުޖުތަމައުން އަންނަނީ ކަންބޮޑުވުން ވެސް ފާޅުކުރަމުންނެވެ. އަޒީޒީގެ އިތުރުން، އީރާންގެ އެހެން އިސްވެރިން ވެސް އަންނަނީ މި ހަމަލާއާ ގުޅިގެން ޔޫކްރެއިން އަށް އިންޒާރު ދެމުންނެވެ.