"ބަންގްލަދޭޝް ފަސްޓް" ސިޔާސަތާއި ރާއްޖެ އާއި ބަންގްލަދޭޝްއާ ދެމެދު ކަނޑުމަގުން ވިޔަފާރި ދަތުރުތައް ބޭއްވުމާ ބެހޭ މަޝްވަރާކޮށްފި

ބަންގްލަދޭޝް އާއި ދިވެހިރާއްޖެއާ ދެމެދު ކަނޑުމަގުން ވިޔަފާރީގެ ދަތުރުތައް ބާއްވަން މަޝްވަރާ ކޮށްފި އެވެ.

މީގެ އިތުރުން ބަންގްލަދޭޝްގެ މަސައްކަތްތެރިންނާއި، ފަތުރުވެރިކަމާއި، ތައުލީމާއި، ސިއްހީ ދާއިރާގެ އިތުރުން ބްލޫ އިކޮނޮމީ ނުވަތަ ނޫ އިގްތިސާދާ ގުޅޭގޮތުން ދެ ގައުމުގެ ފޮރިން މިނިސްޓަރުން ވަނީ މަޝްވަރާ ކުރައްވާފަ އެވެ.

ބަންގްލަދޭޝްގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، މި މަޝްވަރާތައް ކުރިއަށްދިޔައީ އާދީއްތަ ދުވަހުގެ ހަވީރު މާލޭގައި ބަންގްލަދޭޝްގެ ފޮރިން މިނިސްޓަރު ޑރ. ޚަލީލުއްރަހްމާން، ރާއްޖޭގެ ފޮރިން މިނިސްޓަރު އިރުތިޝާމް އާދަމްއާ ބައްދަލުކުރައްވައި ކުރެއްވި މަޝްވަރާތަކުގެ ތެރެއިން ކަމަށެވެ.

މި ބައްދަލުވުމުގައި ދެ ގައުމުގެ މެދުގައި މަތީ ފަންތީގެ ދަތުރުތައް ބޭއްވުމާ ގުޅޭގޮތުންނާއި، ދެ ގައުމުގެ ވިޔަފާރި އާއި ގުޅުންތައް ފުޅާކުރުމަށްޓަކައި ސީދާ ކަނޑުމަގުން ދަތުރުފަތުރު ކުރެވޭނެ ނިޒާމެއް ގާއިމުކުރުމާ ގުޅޭގޮތުން ދެ ބޭފުޅުން ޚިޔާލު ބަދަލުކުރެއްވި އެވެ. ބަންގްލަދޭޝްގެ ފޮރިން މިނިސްޓްރީން ހާމަކުރި ގޮތުގައި، ޑރ. ޚަލީލުއްރަހްމާން ވަނީ އެ ގައުމުގެ ސަރުކާރުން ގެންގުޅޭ "ބަންގްލަދޭޝް ފަސްޓް" ޚާރިޖީ ސިޔާސަތު ތަކުރާރުކުރައްވައި، އެކުވެރި ދެ ގައުމުގެ ރައްޔިތުންގެ މެދުގައި އޮންނަ ގުޅުން އިތުރަށް ބަދަހިކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ.

މި ބައްދަލުވުމުގައި ބަންގްލަދޭޝްއިން ރާއްޖެއަށް ކަނޑައަޅާފައި ހުންނަވާ ހައިކޮމިޝަނަރު ޑރ. މުހައްމަދު ނަޒްމުލް އިސްލާމް ވެސް ބައިވެރިވެވަޑައިގެންނެވި އެވެ. ކަނޑުމަގުން ދަތުރުފަތުރުގެ ނިޒާމެއް ގާއިމުކުރުމަށް ހުށަހަޅާފައިވަނީ ދެ ގައުމުގެ މެދުގައި ކަނޑުމަގުގެ ގުޅުން ވަރުގަދަކޮށް، ދޭދޭ ވިޔަފާރި ފުޅާކުރުމަށް ކުރަމުންދާ މަސައްކަތުގެ ދަށުންނެވެ. މިގޮތުން ސީދާ ދަތުރުފަތުރުގެ ނިޒާމެއް ގާއިމުކުރެވުމުން، ދެ ގައުމުގެ މެދުގައި މުދާ އުފުލުމަށް ފަސޭހަވެ، އިގްތިސާދީ ގޮތުން ފުޅާ ދާއިރާއެއްގައި އެއްބާރުލުން ދިނުމަށް މަގުފަހިވެގެންދާނެ ކަމަށް ބަޔާނުގައިވެ އެވެ.