މިދިޔަ އަހަރު ލަންޑަންގައި މަރުވެފައި އޮއްވާ ފެނުނު ސައުދީގެ ޒުވާން އަމީރު މަރުވީ، ޑްރަގްސް އާއި އަލްކޮހޯލް ބޭނުންކޮށްގެންކަން ހާމަވެއްޖެ

ލަންޑަންގެ މުއްސަނދި ސަރަހައްދެއްގައި ހުންނަ ލަގްޒަރީ ހޮޓަލެއްގެ ތެރޭގައި ސައުދީ އަރަބިއްޔާގެ ޒުވާން އަމީރަކު މަރުވެފައި އޮއްވާ ފެނުނީ، ގިނަ އަދަދެއްގެ މަސްތުވާތަކެއްޗާއި ބާރުގަދަ ބޭސްތަކެއް އެއްފަހަރާ ބޭނުން ކުރުމުގެ ސަބަބުން ހާޓް އެޓޭކެއް ޖެހިގެން ކަމަށް އިނގިރޭސިވިލާތުގެ ކޯޓަކުން ބޭއްވި އިންކުއެސްޓަކުން ކަނޑައަޅައިފި އެވެ.

އުމުރުން 29 އަހަރުގެ އަމީރު އަބްދުﷲ ބިން ފަހަދު ބިން އަބްދުﷲ ބިން އަބްދުލް އަޒީޒް ބިން ޖަލާވީ އަލް ސައުދު މަރުވެފައި އޮއްވާ ފެނުނީ، މިދިޔަ އަހަރުގެ ނޮވެމްބަރު މަހުގެ 25 ވަނަ ދުވަހު، ލަންޑަނުގެ ކެންސިންގްޓަންގައި ހުންނަ މެރިއޮޓް ހޮޓަލުގެ ކޮޓަރިއެއްގެ ފާޚާނާ ތެރެއިންނެވެ. އޭނާ ފެނުނީ އެ ކޮޓަރި ސާފު ކުރަން ވަތް މުވައްޒަފަކަށެވެ.

އެ ސަރަހައްދަށް ޕެރަމެޑިކުން ގޮސް އަމީރު ސަލާމަތްކުރުމަށް މަސައްކަތް ކުރި ނަމަވެސް، އޭނާ މަރުވެފައިވާ ކަމަށް އެ ތަނުގައި ވަނީ ކަނޑައަޅާފައެވެ.

ލަންޑަންގެ ކޯޓުގައި ބޭއްވި އިންކުއެސްޓްގައި ހާމަވި ގޮތުގައި، އަމީރު މަރުވިއިރު އޭނާގެ ހަށިގަނޑުގައި ގިނަ އަދަދެއްގެ ބާރުގަދަ މާއްދާތަކެއް ހުއްޓެވެ. އެގޮތުން އިނގިރޭސިވިލާތުގައި ދުއްވާ އެއްޗެހި ދުއްވުން މަނާ މިންގަނޑަށް ވުރެ ތިން ގުނަ އިތުރަށް އޭނާގެ ލޭގައި އަލްކޮހޯލް ހުރި ކަމަށް ތަހުލީލުތަކުން ދައްކަ އެވެ. މީގެ އިތުރުން ޕާޓީ ޑްރަގެއް ކަމަށްވާ ޖީއެޗްބީ އާއި، ހާސް ކަމަށް ބޭނުންކުރާ ބާރުގަދަ ބޭހެއް ކަމަށްވާ ޒެނެކްސްގެ އަސަރު ވެސް އޭނާގެ ހަށިގަނޑުން ފެނިފައިވެ އެވެ.

މި ހާދިސާ ހިނގުމުގެ ތިން މަސް ކުރިން، އަމީރު ވަނީ މަސްތުވާތަކެއްޗާއި، ބޭހަށް ދެވި ހިފާފައިވާ މިންވަރު ކުޑަ ކުރުމަށް ލަންޑަންގެ މަޝްހޫރު ޕްރަޔަރީ ކްލިނިކުގައި ފަރުވާ ހޯއްދަވާފައި އެވެ. އެ ކްލިނިކުގައި ހަފުތާއަކު 47،000 އެމެރިކާ ޑޮލަރު ފަރުވާ އަށް ހޭދަވާ ކަމަށް މައުލޫމާތު ލިބެ އެވެ.

އެތަނުގެ ކޮންސަލްޓަންޓް ސައިކޭޓްރިސްޓް ޑރ. ވިކްޓޯރިއާ ޗަމޯރޯ ވިދާޅުވި ގޮތުގައި، އަމީރު އެތަނުގައި ފަރުވާ ހޯއްދެވީ އަލްކޮހޯލް އާއި ބެންޒޯޑިއަޒެޕިން ފަދަ ބޭސްތަކުން ސަލާމަތް ވުމަށެވެ. ފަރުވާ ނިންމަވާފައި ދިޔައިރު އޭނާގެ ފަރާތުން އަމިއްލަ އަށް މަރުވުމުގެ އެއްވެސް ނިޝާނެއް ފެނިފައި ނުވާ ކަމަށް ވެސް ޑޮކްޓަރު ފާހަގަކުރެއްވި އެވެ.

ޕްރަޔަރީ ކްލިނިކަށް ފަހު، އަމީރު ވަނީ މާސީސައިޑްގައި ހުންނަ ރެއިންފޯޑް ހޯލް ކްލިނިކުގައި ވެސް އިތުރު ފަރުވާ ހޯއްދަވާފައި އެވެ. އެތަނުން އޭނާ ދޫކޮށްލީ އޮކްޓޯބަރު މަހުގެ 14 ވަނަ ދުވަހު އެވެ. އަމީރު އެންމެ ފަހުން ސީސީޓީވީ ފޫޓޭޖުން ފެނިފައި ވަނީ ހޮޓަލުން ބޭރަށް ސިނގިރޭޓެއް ބޯން ނުކުމެ އުޅެނިކޮށެވެ. އިނގިރޭސީ ކަމާ ބެހޭ ފަރާތްތަކުން ގަބޫލުކުރާ ގޮތުގައި މިއީ އަމިއްލަ އަށް މަރުވުމަށް ކުރި ކަމެއް ނޫނެވެ. ނަމަވެސް މިއީ ބޭނުން ކުރެވުނު މާއްދާތަކެއްގެ ސަބަބުން ދިމާވި ހިތާމަވެރި ހާދިސާއެއް ކަމަށް ބުނެފައިވެ އެވެ.