ސައުދީ އަރަމްކޯގެ ފައިދާ 25 އިންސައްތަ އިތުރުވެއްޖެ
މިއީ އިޤްތިޞާދީ މާހިރުން ލަފާ ކުރި މިންވަރަށް ވުރެ ބޮޑު ކުރިއެރުމެއް. އެލްއެސްއީޖީގެ ކޮންސެންސަން އަންދާޒާ ތަކުން ކުރިން ލަފާ ކޮށްފައި އޮތީ އަރަމްކޯ އަށް ފުރަތަމަ ކުއާޓަރުގައި ލިބޭނީ 30.95 ބިލިއަން އެމެރިކާ ޑޮލަރުގެ ފައިދާއެއް ކަމަށް.
ސައުދީ އަރަބިއްޔާގެ ތެޔޮ ކުންފުނި، އަރަމްކޯގެ ލޯގޯ. | ރޮއިޓާސް
ދުނިޔޭގެ އެންމެ ބޮޑު ތެޔޮ ކުންފުނި، ސައުދީ އަރަމްކޯ އަށް މިއަހަރުގެ ފުރަތަމަ ކުއާޓަރުގައި ލިބުނު ސާފު ފައިދާ 25 އިންސައްތަ އިތުރުވެއްޖެ ކަމަށް އެ ކުންފުނިން ހާމަ ކޮށްފި އެވެ.
އާދީއްތަ ދުވަހު އެ ކުންފުނިން އާންމު ކުރި ތަފާސް ހިސާބު ތަކުން ދައްކާ ގޮތުގައި، މާޗު މަހުގެ 31 ވަނަ ދުވަހުގެ ނިޔަލަށް ނިމުނު ފުރަތަމަ ތިން މަސް ދުވަހު އެ ކުންފުންޏަށް ސާފު ފައިދާގެ ގޮތުގައި 32.5 ބިލިއަން އެމެރިކާ ޑޮލަރު ވަނީ ލިބިފަ އެވެ.
މިއީ އިޤްތިޞާދީ މާހިރުން ލަފާ ކުރި މިންވަރަށް ވުރެ ބޮޑު ކުރިއެރުމެކެވެ. އެލްއެސްއީޖީގެ ކޮންސެންސަން އަންދާޒާ ތަކުން ކުރިން ލަފާ ކޮށްފައި އޮތީ އަރަމްކޯ އަށް ފުރަތަމަ ކުއާޓަރުގައި ލިބޭނީ 30.95 ބިލިއަން އެމެރިކާ ޑޮލަރުގެ ފައިދާއެއް ކަމަށެވެ. ނަމަވެސް، ދުނިޔޭގެ ބާޒާރުގައި ތެލުގެ އަގު އުފުލުމާއި، ސާފު ނުކުރާ ތެލާއި ކެމިކަލް އުފެއްދުންތައް ވިއްކި މިންވަރު އިތުރުވުމާ ގުޅިގެން، ކުންފުނީގެ ޖުމުލަ އާމްދަނީ ވަނީ މިދިޔަ އަހަރުގެ މި މުއްދަތާ އަޅާ ބަލާއިރު، ހަތް އިންސައްތަ އިތުރުވެ، 115.49 ބިލިއަން އެމެރިކާ ޑޮލަރަށް އަރައިފަ އެވެ.
އަރަމްކޯގެ ފައިދާ އަށް މިފަދަ ބޮޑު ކުރިއެރުމެއް ލިބިފައި ވަނީ، އެމެރިކާ އާއި އީރާންއާ ދެމެދު އުފެދިފައިވާ ހަނގުރާމައިގެ ނުތަނަވަސްކަމުގެ ސަބަބުން ހޮރްމޫޒް ކަނޑު އޮޅިން މުދާ އުފުލުމަށް ބޮޑެތި ހުރަސް ތަކެއް ކުރިމަތިވެފައިވާ ދަނޑިވަޅެއްގަ އެވެ. އީރާން އިން އެ ސަރަހައްްދުގެ ކަނޑުގެ މަގުތައް ބަންދުކުރުމާ ގުޅިގެން ހަކަތައިގެ ސަޕްލައި އަށް ބުރޫ އަރައި، ދުނިޔޭގެ ބާޒާރުގައި ތެލިގެ އަގު ވަނީ ވަރަށް ބޮޑަށް އުފުލިފަ އެވެ.
މި ހަމަލާއާ ގުޅިގެން ކުރިމަތި ވެދާނެ ގެއްލުން ތަކުން ސަލާމަތް ވުމަށްޓަކައި، ސައުދީ އަރަމްކޯ އިން ވަނީ އެ ކުންފުނީގެ "އީސްޓް-ވެސްޓް" ސާފު ނުކުރާ ތެޔޮ ހޮޅިލައިންގެ ބޭނުން ފުރިހަމަ ޤާބިލުކަމާ އެކު ހިފަން ފަށައިފަ އެވެ. މިގޮތުން، ސައުދީގެ އިރުމަތީ އައްސޭރިން ރަތް ކަނޑުގެ އައްސޭރީގައި އޮންނަ ޔަންބޫ ބަނދަރަށް ތެޔޮ ފޮނުވާ މިންވަރު އިތުރުކޮށް، ސަޕްލައި މެދު ނުކެނޑި ކުރިއަށް ގެންދިޔުމަށް އެ ކުންފުނިން ވަނީ ޚަރުދަނާ ފިޔަވަޅު ތަކެއް އަޅައިފަ އެވެ.
ދުނިޔޭގެ އެންމެ ބޮޑު ތެޔޮ އެކްސްޕޯޓަރުގެ ގޮތުގައި އޮތް ސައުދީ އަރަމްކޯ އިން ހޯދި މި ކާމިޔާބީ އަކީ، ސަރަހައްދީ ސިޔާސީ ނުތަނަވަސްކަމުގެ ތެރޭގައި ވެސް އެ ކުންފުނީގެ އޮޕަރޭޝަންތައް ހުއްޓުމެއް ނެތި ކުރިއަށް ގެންދިޔުމުގެ ޤާބިލުކަން ހުރިކަން ހާމަކޮށްދޭ ކަމެއް ކަމަށް މާހިރުން ފާހަގަ ކޮށްފައިވެ އެވެ.
މަސްދަރު: އަލް އަރަބިއްޔާ
