މިދިޔަ ހަފްތާގައި އަދަން ކަނޑުން ގެއްލުނު ބޯޓު އޮތީ ސޯމާލިއާ ކަނޑުފޭރޭ މީހުންގެ އަތްދަށުގައި

މިދިޔަ ހަފުތާގައި އަދަން ކަނޑުން ހައިޖެކް ކުރި މުދާ އުފުލާ ބޯޓެއް މިހާރު ސޯމާލިއާގެ ކަނޑުފޭރޭ މީހުންގެ ބާރުގެ ދަށުގައިވާ ކަމަށް، ސޯމާލިއާގެ މިނިވަން ދައުލަތެއްގެ ގޮތުގައި އޮންނަ ޕަންޓްލޭންޑް ސަރަހައްދުގެ ދެ ރައްޔިތަކު ބުރާސްފަތި ދުވަހު ރޮއިޓާސްއަށް ކަށަވަރުކޮށްދީފި އެވެ.

"އެމްޓީ އަސާނާ" ނަމަކަށް ކިޔާ މި ބޯޓަކީ ޓެންޒޭނިއާގެ ދިދަ ޖަހާފައިވާ، ތެލާއި ކެމިކަލް އުފުލާ ޓޭންކަރެކެވެ.

ރޮއިޓާސްއާ ވާހަކަދެއްކި މީހުންގެ ތެރެއިން އެކަކީ ކުރިން ކަނޑުފޭރުމުގެ އަމަލުތަކުގައި އުޅުނު މީހެކެވެ. އޭނާ ބުނި ގޮތުގައި "އެމްޓީ އަސާނާ" ބޯޓުގައި ޖުމްލަ 20 ފަޅުވެރިން އެބަތިއްބެވެ. އޭގެ ތެރޭގައި ޖަރުމަނުވިލާތުގެ އަށް މީހުންނާއި ފިލިޕީންސްގެ 10 މީހުން ހިމެނެއެވެ.

މިކަމާ ގުޅިގެން ޖަރުމަނުވިލާތުގެ ފޮރިން މިނިސްޓްރީން ބުނީ، ގައުމުން ބޭރުގައި އެ ގައުމުގެ ރައްޔިތުން ރަހީނުކުރާ މައްސަލަތަކުގައި އެ މިނިސްޓްރީން އާންމުކޮށް ވަކި އެއްޗެއް ހާމަނުކުރާ ކަމަށެވެ.

ޕަންޓްލޭންޑްގެ ކަލޫލާ ސަރަހައްދަށް ނިސްބަތްވާ އަނެއް މީހާ ބުނި ގޮތުގައި، ކަނޑުފޭރޭ މީހުން އެ ބޯޓަށް ކާބޯތަކެތި އުފުލަނިކޮށް އޭނާއަށް ވަނީ ފެނިފައެވެ.

ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން މިދިޔަ ހަފުތާގައި ބުނެފައިވަނީ، ހުއްދަނެތް ބަޔަކު  އަދަން ކަނޑުން ބޯޓަކަށް އަރައި، އެ ބޯޓު ސޯމާލިއާގެ ކަނޑުގެ ސަރަހައްދަށް މިސްރާބު ބަދަލުކޮށްފައިވާ ކަމަށެވެ. އެ އިދާރާއިން ވަނީ މިއީ ހައިޖެކް ކުރުމުގެ އަމަލެއްގެ ގޮތުގައި ކަނޑައަޅާފަ އެވެ.

ސޯމާލިއާގެ ކަނޑުފޭރޭ މީހުން ވަނީ 2008 އާއި 2018 އާ ދެމެދު އެ ގައުމުގެ ދިގު އައްސޭރިފަށުގެ ސަރަހައްދުތަކުގައި ބޮޑެތި ނުރައްކާތަކެއް ކުރިމަތިކުރުވާފަ އެވެ. ގިނަ ދުވަސްތަކެއް ވަންދެން މައިތިރިވެފައި އޮތުމަށްފަހު، 2023 ވަނަ އަހަރުގެ ފަހުކޮޅުން ފެށިގެން ކަނޑުފޭރުމުގެ އަމަލުތައް އަނެއްކާވެސް ވަނީ އިތުރުވާން ފަށާފަ އެވެ.